ក្រុមគ្រួសារលោកអាឡិចសី ណាវ៉ាល់នី ទាមទារឲ្យអាជ្ញាធររុស្ស៊ីប្រគល់សាកសពជាបន្ទាន់
គិតមកទល់ពេលនេះ មិនទាន់មានការបញ្ជាក់ណាមួយពីអាជ្ញាធរុស្ស៊ី ទាក់ទិននឹងមូលហេតុពិតប្រាកដ ដែលបណ្តាលឲ្យលោក អាឡិចសី ណាវ៉ាល់នី ស្លាប់ឡើយ។ ក្រុមគ្រួសារ ក៏ដូចជាសកម្មជនស្និទ្ធនឹងលោកណាវ៉ាល់នី បានទាមទារឲ្យអាជ្ញាធររុស្ស៊ី ត្រូវតែប្រគល់សាកសពលោកជាបន្ទាន់។ សូមបញ្ជាក់ដែរ ថាចាប់ពីរសៀលថ្ងៃសុក្រទី១៦មករា សមត្ថកិច្ចរុស្ស៊ីបានចាប់ឃាត់ខ្លួន មនុស្សជាង២០០នាក់ នៅតាមទីក្រុងធំៗនៅរុស្ស៊ី បន្ទាប់ពីពួកគេបានជួបជុំគ្នាដាក់បាច់ផ្កា រំឭកវិញ្ញាណក្ខន្ធរបស់លោក អាឡិចសី ណាវ៉ាល់នី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:២៩
លោកស្រី Kira Iarmich អ្នកនាំពាក្យរបស់លោកអាឡិចសី ណាវ៉ាល់នី បានឲ្យដឹងថា ម្តាយរបស់លោកអាឡិចសី ណាវ៉ាល់នី រួមទាំងមេធាវី បានធ្វើដំណើរទៅដល់មន្ទីរឃុំឃាំងនៅឯតំបនអាកទិកដ៏សែនត្រជាក់ នៅថ្ងៃសៅរ៍ទី១៧កុម្ភៈ។ បន្ទាប់ពីបានចាំអស់រយៈពេល២ម៉ោង អាជ្ញាធរគ្រប់គ្រងមន្ទីរឃុំឃាំងបានប្រគល់លិខិតមួយ មកឲ្យម្តាយលោកណាវ៉ាល់នី ដែលបញ្ជាក់ថា លោក អាឡិចសី ណាវ៉ាល់នី បានស្លាប់នៅវេលាម៉ោង២និង១៧នាទី រសៀលថ្ងៃសុក្រទី១៦កុម្ភៈ នៅក្នុងមន្ទីរឃុំឃាំង IK-3។
ប្រភពពីអ្នកនាំពាក្យរូបនេះ បន្ថែមទៀតថាបុគ្គលិកម្នាក់នៃមន្ទីរឃុំឃាំង បានប្រាប់ថាក្រុមមន្ត្រីជំនាញ បានយកសាកសពលោកណាវ៉ាល់នី ទៅទីក្រុង Salekhard បាត់ហើយ។ លោកស្រី Kira Iarmich បានបញ្ជាក់ថា តាងនាមឲ្យក្រុមគ្រួសារលោកអាឡិចសី ណាវ៉ាល់នី គឺលោកស្រីសូមទាមទារ ឲ្យអាជ្ញាធររុស្ស៊ី ត្រូវតែប្រគល់សាកសពលោកណាវ៉ាល់នី ឲ្យបានឆាប់ជាទីបំផុត។
សូមបញ្ជាក់ថា គិតត្រឹមពេលនេះ អាជ្ញាធររុស្ស៊ី បានត្រឹមតែប្រកាសពីការស្លាប់របស់លោកអាឡិចសី ណាវ៉ាល់នី ហើយក៏ស្ងាត់បាត់ដំណឹងសូន្យ ទាក់ទិននឹងមូលហេតុនៃការស្លាប់។ ក្រុមគ្រួសារលោកណាវ៉ាល់នី កំពុងរងចាំយ៉ាងអន្ទះសារ ដើម្បីយកសាកសពមករៀបចំពិធីបុណ្យ។ នៅក្នុងសារវីដេអូ ផ្សាយតាមបណ្តាញសង្គម លោកស្រី Kira Iarmich អ្នកនាំពាក្យរបស់លោកអាឡិចសី ណាវ៉ាល់នី បានអះអាងថា គេបានសម្លាប់លោកណាវ៉ាល់នី នៅក្នុងគុក ហើយគេចង់បំបាត់ភស្តុតាង ដោយយកសាកសពទៅលាក់ទុក។ បណ្តាញព័ត៌មាន Novaïa Gazeta ចុះផ្សាយថានៅថ្ងៃព្រហស្បតិ៍ ពោលគឺមុនស្លាប់មួយថ្ងៃ លោកណាវ៉ាល់នី បានបង្ហាញមុខក្នុងវីដេអូសវនាការចំនួន២ ហើយមិនបានថ្អូញថ្អែរអ្វីពីបញ្ហាសុខភាពទេ។ ចំណែកម្តាយលោកណាវ៉ាល់នី បានអះអាងថាខ្លួនបានទទួលសារវីដេអូលើហ្វេសបុក ដែលក្នុងនោះកូនប្រុសគាត់ហាក់មានសុខភាពធម្មតា។
គួរបញ្ជាក់ថា អាជ្ញាធររុស្ស៊ីស្ងាត់បាត់មាត់ មិននិយាយអ្វីពីមូលហេតុនៃការស្លាប់របស់លោកណាវ៉ាល់នី ក៏ពិតមែន តែវិមានក្រេមឡាំងវិញ បានប្រតិកម្មក្តែងៗ ទៅនឹងពាក្យចោទពីបណ្តាប្រទេសលោកខាងលិច ដែលចាត់ទុកលោកពូទីន ថាជាអ្នកទទួលខុសត្រូវចំពោះការស្លាប់របស់លោកណាវ៉ាល់នី។
សូមបញ្ជាក់ដែរថា ក្រោយដំណឹងមរណៈភាពរបស់លោក អាឡិចសី ណាវ៉ាល់នី សកម្មជននយោបាយប្រឆាំងដ៏ធំបំផុតនៅរុស្ស៊ីនេះ មនុស្សម្នាជាច្រើននាក់នៅរុស្ស៊ី និងនៅតាមទីក្រុងអឺរ៉ុបផ្សេងៗទៀត បានជួបជុំគ្នាអុជទៀន និងដាក់បាច់ផ្កា ដោយក្តីក្តុកក្តួលរំជួលចិត្តជាទីបំផុត។ ពួកគេមានក្តីអាលោះអាល័យ ដល់វីរៈភាពរបស់លោក ណាវ៉ាល់នី ដែលបានបូជាជីវិត ដើម្បីបុព្វហេតុប្រជាធិបតេយ្យ និងសិទ្ធិសេរីភាព និងយុត្តិធម៌នៅរុស្ស៊ី។
គួរកត់សំគាល់ថា ផ្អែកតាមការអះអាង របស់អង្គការ OVD-Info គិតត្រឹមរសៀលថ្ងៃសៅរ៍ទី១៧កុម្ភៈ សមត្ថកិច្ចរុស្ស៊ីបានចាប់ឃាត់ខ្លួនមនុស្ស ចំនួន២១២នាក់ នៅតាមទីក្រុងធំចំនួនជាង១០ ក្នុងពេលដែលពួកគេមកជួបជុំរំឭកវិញ្ញាណក្ខន្ធលោកណាវ៉ាល់នី។ អាជ្ញាធរសន្តិសុខរុស្ស៊ី ហាក់កំពុងត្រៀមកំលាំងប្រុងប្រយ័ត្នបំផុត ដើម្បីទប់ស្កាត់មិនឲ្យមានបាតុកម្មណាមួយផ្ទុះឡើងទេ ព្រោះថាការបោះឆ្នោត នៅពាក់កណ្តាលខែមីនា កាន់តែខិតជិតមកដល់ហើយ។ ស្របពេលដែលបណ្តាញព័ត៌មានអន្តរជាតិចុះផ្សាយព្រោងព្រាត អំពីការស្លាប់របស់លោកណាវ៉ាល់នី បណ្តាញព័ត៌មានផ្លូវការរុស្ស៊ីឯនោះវិញ ហាក់ដូចជាមិនអើពើប៉ុន្មានទេ។ តែផ្ទុយទៅវិញ បណ្តាញព័ត៌មានផ្លូវការរុស្ស៊ីបានផ្សព្វផ្សាយគំរាម បំភ័យប្រជាជនកុំឲ្យជួបជុំគ្នាធ្វើបាតុកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ