តុលាការបញ្ជាឲ្យហូឡង់ឈប់បញ្ជូនគ្រឿងបន្លាស់យន្តហោះចម្បាំងF-35ទៅឲ្យអ៊ីស្រាអែល
នៅហូឡង់ តុលាការឧទ្ធរណ៍បានចេញសាលដីកាបញ្ជាឲ្យរដ្ឋាភិបាលហូឡង់ឈប់បញ្ជូនគ្រឿងបន្លាស់យន្តហោះចម្បាំងអាមេរិក F-35 ទៅឲ្យអ៊ីស្រាអែលតទៅទៀត។ តាមការយល់ឃើញរបស់ចៅក្រមហូឡង់ មានហានិភ័យយ៉ាងជាក់ច្បាស់ដែលថា អ៊ីស្រាអែលបានយកយន្តហោះចម្បាំងF-35ទៅប្រើ នៅក្នុងសង្រ្គាមហ្កាហ្សា ដោយមិនគិតខ្វល់ពីអាយុជីវិតរបស់ប្រជាជនប៉ាឡេស្ទីន។ តុលាការឧទ្ធរណ៍ហូឡង់បើកការជំនុំជម្រះ ស្តីពីការបញ្ជូនគ្រឿងបន្លាស់យន្តហោះចម្បាំងអាមេរិក ទៅតាមពាក្យបណ្តឹងរបស់អង្គការការពារសិទ្ធិមនុស្សOxfam Novib ដើម្បីប្រជាជននៅហ្កាហ្សា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:១០
តុលាការឧទ្ធរណ៍របស់ប្រទេសហូឡង់បានចេញសាលដីកា នៅថ្ងៃចន្ទ ទី ១២កុម្ភៈ បញ្ជាឲ្យរដ្ឋាភិបាលហូឡង់ត្រូវឈប់បញ្ជូនគ្រឿងបន្លាស់យន្តហោះចម្បាំងF-35 របស់អាមេរិកទៅឲ្យអ៊ីស្រាអែលតទៅទៀត។ តាមការវាយតម្លៃរបស់ចៅក្រម មានចំណុចច្រើនដែលធ្វើឲ្យគេជឿថា គ្រឿងបន្លាស់យន្តហោះចម្បាំង F-35 ដែលហូឡង់បញ្ជូនទៅឲ្យអ៊ីស្រាអែល ចូលរួមនៅក្នុងសកម្មភាពរំលោភសិទ្ធិមនុស្សដ៏ធ្ងន់ធ្ងររបស់អ៊ីស្រាអែល នៅទឹកដីហ្កាហ្សា។
បើតាមចៅក្រមតុលាការឧទ្ធរណ៍ហូឡង់ អ៊ីស្រាអែលមិនបានបង្ហាញថា ខ្លួនបានគិតគូរពីផលវិបាក អាយុជីវិតរបស់ប្រជាជនប៉ាឡេស្ទីន នៅពេលបើកការវាយប្រហារជើងអាកាសរបស់ខ្លួន ទៅលើទឹកដីហ្កាហ្សាឡើយ។ ដោយយល់ឃើញថា អ៊ីស្រាអែលប្រើយន្តហោះចម្បាំងអាមេរិក F-35 នៅក្នុងសង្រ្គាមរំលោភច្បាប់មនុស្សធម៌ នៅហ្កាហ្សា ចៅក្រមហូឡង់សម្រេចថា រដ្ឋាភិបាលត្រូវឈប់បញ្ជូនគ្រឿងបន្លាស់យន្តហោះF-35 នៅរយៈពេល៧ថ្ងៃ ក្រោយចេញសាលដីរបស់តុលាការឧទ្ធរណ៍។
ក្រុមអង្គការការពារសិទ្ធិមនុស្សដឹកនាំដោយអង្គការOxfam Novib ដែលជាម្ចាស់ដើមបណ្តឹងអបអរការសម្រេចរបស់តុលាការឧទ្ធរណ៍ហូឡង់ ដែលជាដំណឹងដ៏ល្អសម្រាប់ប្រជាជនស៊ីវិលប៉ាឡេស្ទីន នៅហ្កាហ្សា។ សាលដីការបស់តុលាការឧទ្ធរណ៍នឹងទៅលុបចោលការសម្រេចរបស់សាលាដំបូងដែលថា ការបញ្ជូនគ្រឿងបន្លាស់យន្តហោះចម្បាំង F-35 មានជាប់ពាក់ព័ន្ធនឹងរឿងនយោបាយដែលតុលាការគ្មានសិទ្ធិលូកដៃអន្តរាគមន៍។
ប៉ុន្តែ នៅក្នុងសាលដីកា នៅថ្ងៃចន្ទ តុលាការឧទ្ធរណ៍វិញសម្រេចថា ការរក្សាទំនាក់ទំនងល្អជាមួយអាមេរិក និងអ៊ីស្រាអែល មិនមែនជាទឡ្ហីករណ៍ត្រឹមត្រូវដើម្បីបន្តបញ្ជូនគ្រឿងបន្លាស់យន្តហោះចម្បាំងទៅឲ្យអ៊ីស្រាអែល។
សាលដីការបស់តុលាការឧទ្ធរណ៍ហូឡង់ផ្តោតទៅលើគ្រឿងបន្លាស់យន្តហោះចម្បាំង F-35 ដែលអាមេរិកស្តុកទុក នៅក្នុងឃ្លាំង ក្នុងទឹកដីហូឡង់ មុននឹងត្រូវបញ្ជូនចេញទៅឲ្យប្រទេសដៃគូដែលប្រើយន្តហោះ F-35 ដូចជាប្រទេសអ៊ីស្រាអែលជាដើម។ អាជ្ញាធរហូឡង់ផ្ទាល់ធ្លាប់លើកឡើងថា គេមិនច្បាស់ថា រដ្ឋាភិបាលហូឡង់មានសិទ្ធិអំណាចលូកដៃ នៅក្នុងរឿងបញ្ជូនគ្រឿងបន្លាស់ទៅអ៊ីស្រាអែលដែរឬទេ ព្រោះថា គ្រឿងបន្លាស់ទាំងនោះមាននៅក្នុងទឹកដីហូឡង់មែន ប៉ុន្តែ វាស្ថិតក្រោមការគ្រប់គ្រងចាត់ចែងផ្ទាល់របស់អាមេរិកដែលជាម្ចាស់កម្មសិទ្ធិ។
មួយវិញទៀត បើតាមអាជ្ញាធរហូឡង់ ហូឡង់ធ្លាប់បានចុះកិច្ចព្រមព្រៀង អនុញ្ញាតឲ្យគេនាំចេញគ្រឿងបន្លាស់ តាំងពីឆ្នាំ២០១៦ ដោយគ្មានកាលកំណត់។ ចៅក្រមតុលាការឧទ្ធរណ៍នៅទីក្រុងឡាអេវិញ យល់ថា ទោះជាចុះកិច្ចព្រមព្រៀងអនុញ្ញាតឲ្យនាំចេញគ្រឿងបន្លាស់យន្តហោះចម្បាំងអាមេរិកដោយគ្មានកាលកំណត់មែនហើយ ប៉ុន្តែ នេះមិនមែនមានន័យថា រដ្ឋាភិបាលហូឡង់ត្រូវបិទភ្នែក មើលមិនឃើញហេតុការណ៍ដែលកំពុងកើតឡើងដែរ។
ត្រូវដឹងថា ការវាយប្រហារផ្លូវអាកាសរបស់កងទ័ពអ៊ីស្រាអែល ដែលអាចប្រើយន្តហោះចម្បាំងអាមេរិក F-35 សម្លាប់ជីវិតប្រជាជនប៉ាឡេស្ទីន មិនលោះថ្ងៃ។ សង្រ្គាមសងសឹករបស់អ៊ីស្រាអែលនៅហ្កាហ្សា កំពុងបង្កឲ្យមានការឈឺចាប់ខ្លោចផ្សារ និងគំនុំគុំគួន គ្មានថ្ងៃបញ្ចប់ នៅក្នុងចំណោមប្រជាជនស៊ីវិលប៉ាឡេស្ទីន ជាច្រើនជំនាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ