អេស្ប៉ាញ៖ ត្រឹម២៤ម៉ោង ជនអន្តោប្រវេសន៍តាមទូកមកដល់កោះកាណារីចំនួនជាង៩០០នាក់
ប្រជុំកោះកាណារីរបស់អេស្ប៉ាញ ដែលស្ថិតនៅក្នុងមហាសមុទ្រអាត្លង់ទិក ខាងលិចទ្វីបអាហ្វ្រិក កំពុងតែប្រឈមកាន់តែខ្លាំងឡើង នូវការមកដល់យ៉ាងគំហុក នៃជនអន្តោប្រវេសន៍តាមទូក។ គ្រាន់តែក្នុង២៤ម៉ោងចុងក្រោយ យ៉ាងហោចណាស់ មានជនអន្តោប្រវេសន៍ជាង៩០០នាក់ បានមកដល់លើកោះដ៏តូចនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:២៩
យោងតាមអាជ្ញាធរសង្គ្រោះផ្លូវសមុទ្រអេស្ប៉ាញ កាលពីថ្ងៃសុក្រ ទី៦តុលា ទូកចំនួន៥ ដែលមានផ្ទុកមនុស្សសរុប ៥២៦នាក់ ត្រូវបានគេសង្គ្រោះ សណ្តោងមកដល់កោះ El Hierro ដែលជាកោះតូចមួយស្ថិតនៅខាងត្បូងប្រជុំកោះកាណារី ខណៈទូក៣ទៀត ត្រូវគេសណ្តោងទៅដល់កោះ Grande Canarie និងទូក២គ្រឿងទៀត បានទៅដល់កោះTenerife។ ទូកទាំង១០នេះ សរុបចំនួនជនអន្តោប្រវេសន៍ទាំងអស់ មាន៩០៨នាក់។ ស្រាប់តែនៅល្ងាចក្បាលព្រលប់ ថ្ងៃសុក្រដដែល ទូកជនអន្តោប្រវេសន៍២ទៀតបានសំដៅទៅកាន់កោះ El Hierro ដែលមានផ្ទុកមនុស្សប្រមាណ១៥០នាក់។
អាជ្ញាធរអេស្ប៉ាញអះអាងថា ជនអន្តោប្រវេសន៍ទាំងអស់ គឺសុទ្ធសឹងតែជាប្រជាជនអាហ្វ្រិក មកពីតំបន់ខាងត្បូងសមុទ្រខ្សាច់សាហារ៉ា។ ជាច្រើនសប្តាហ៍កន្លងមកហើយ ដែលជនអន្តោប្រវេសន៍បានមកដល់ប្រជុំកោះកាណារី យ៉ាងច្រើនបំផុត ធ្វើឲ្យអាជ្ញាធរអេស្ប៉ាញជួបការលំបាកខ្លាំង ដោយសារតែប្រជុំកោះនេះជាកោះតូចៗ ពុំមានហេដ្ឋារចនាសម្ព័ន្ធគ្រប់គ្រាន់ ដើម្បីទទួលជនអន្តោប្រវេសន៍ ក្នុងចំនួនច្រើនបែបនេះ។
ជាក់ស្តែង កាលពីថ្ងៃអង្គារ ទូកតូចតែមួយ មានផ្ទុកជនអន្តោប្រវេសន៍ដល់ទៅ២៨០នាក់ បានមកដល់កោះ El Hierro។ ក្នុងមួយសប្តាហ៍ចុងក្រោយនេះ កោះ El Hierro ដែលមានប្រជាជនរស់នៅប្រមាណតែ១១០០០នាក់ បានឃើញជនអន្តោប្រវេសន៍មកដល់ ដល់ទៅជាង១២០០នាក់។ ផ្អែកតាមអ្នករាយការណ៍ព័ត៌មានបារាំង AFP ដើម្បីបញ្ចៀសបញ្ហាកកស្ទះណែន នៅលើកោះតូចនេះ អាជ្ញាធរអេស្ប៉ាញបានបញ្ជូនជនអន្តោប្រវេសន៍ ចំនួន៥០០នាក់ យកទៅទុកនៅលើកោះTenerife។
គួរកត់សំគាល់ថា ពីមួយឆ្នាំទៅមួយឆ្នាំ តំបន់ប្រជុំកោះកាណារីរបស់អេស្ប៉ាញ បានក្លាយជាច្រកផ្លូវដ៏ធំមួយ ដែលជនអន្តោប្រវេសន៍បានឆ្លងកាត់ ដើម្បីចូលមកដល់ទឹកដីអឺរ៉ុប បន្ទាប់ពីច្រកផ្លូវសមុទ្រម៉េឌីទែរ៉ាណេ ត្រូវគេរាំងខ្ទប់កាន់តែខ្លាំង។ ក្នុងរវាងពីខែមករា ដល់ថ្ងៃទី៣០កញ្ញា ឆ្នាំនេះ មានជនអន្តោប្រវេសន៍ ចំនួន១៤៩២៦នាក់ បានមកដល់កោះកាណារី ពោលគឺកើនឡើង២០% បើប្រៀបធៀបទៅឆ្នាំមុន។ ការធ្វើដំណើរតាមទូក ក្នុងមហាសមុទ្រអាត្លង់ទិក ដើម្បីទៅដល់កោះកាណារី គឺជាការប្រថុយគ្រោះថ្នាក់ខ្លាំងណាស់។ ទោះបើគ្មានតួលេខច្បាស់លាស់ តែអង្គការក្រៅរដ្ឋាភិបាល ជឿថាមានស្លាប់ជាច្រើនរយនាក់ដោយករណីលិចទូកក្នុងសមុទ្រ។
ដំណើរមកដល់យ៉ាងគំហុកនៃជនអន្តោប្រវេសន៍ នៅលើកោះកាណារីនេះ គឺវាជួនចំពេលដែលក្រុមប្រទេសអឺរ៉ុបកំពុងតែជួបប្រជុំគ្នានៅក្រុងGrenade ភាគខាងត្បូងអេស្ប៉ាញ នៅចុងសប្តាហ៍នេះ ដើម្បីជជែកគ្នាអំពីវិបត្តិជនអន្តោប្រវេសន៍ ដែលអឺរ៉ុបកំពុងតែប្រឈមនាពេលបច្ចុប្បន្ន។ គួរបញ្ជាក់ដែរថា កាលពីថ្ងៃពុធ ប្រទេសអឺរ៉ុបបានបោះឆ្នោតយល់ព្រមលើយន្តការថ្មី ដែលកំណត់កាតព្វកិច្ចត្រូវសាមគ្គីជួយគ្នា ប្រសិនបើប្រទេសសាមជិកណាមួយ មានជនអន្តោប្រវេសន៍មកដល់ច្រើន ដូចយ៉ាងករណីប្រទេសអ៊ីតាលី កាលពីពេលថ្មីៗនេះ។ ប៉ូឡូញ និងហុងគ្រីបានបោះឆ្នោតប្រឆាំងកិច្ចព្រមព្រៀងនេះ ខណៈអូទ្រីស ស្លូវ៉ាគី និងឆេក បានបោះឆ្នោតអនុប្បវាទ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ