ហូឡង់៖ អគ្គីភ័យឆាបឆេះនាវាផ្ទុករថយន្តអគ្គីសនីចំនួនជិត៥០០គ្រឿង បង្កការព្រួយបារម្ភពីហានិភ័យបរិស្ថាន
នៅក្បែរឆ្នេរសមុទ្រ ភាគខាងជើងហូឡង់ មាននាវាមួយកំពុងតែរងគ្រោះដោយអគ្គីភ័យឆាបឆេះ តាំងតែពីយប់ថ្ងៃពុធមក។ នៅលើនាវានោះ មានផ្ទុករថយន្តអគ្គីសនីចំនួនប្រមាណជាតិ៥០០គ្រឿង។ ក្រុមសង្គ្រោះមិនទាន់អាចពន្លត់ភ្លើងបានជោគជ័យនៅឡើយទេ ខណៈអាជ្ញាធរប្រទេសហូឡង់ កំពុងតែព្រួយបារម្ភជាខ្លាំង អំពីហានិភ័យធ្ងន់ធ្ងរមកលើបរិស្ថាននៅតំបន់នេះ ប្រសិនបើនាវានេះលិចចូលទៅក្នុងសមុទ្រ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៧
នាវាឈ្មោះ Fremantle Higtway ត្រូវភ្លើងឆាបឆេះ នៅយប់ថ្ងៃពុធ ស្ថិតនៅចំងាយជាង១០គីឡូម៉ែត្រ ពីកោះ Terchelling ភាគខាងជើងប្រទេសហូឡង់។ ផ្អែកតាមក្រុមហ៊ុន K Line ដែលជាក្រុមហ៊ុនដឹកជញ្ជូន គឺនាវានេះ មានផ្ទុករថយន្តចំនួន ៣៧៨៣គ្រឿង ក្នុងនោះ មាន៤៩៨គ្រឿងជារថយន្តអគ្គីសនី។ តែយ៉ាងណា ក្រុមឆ្មាំសមុទ្រហូឡង់ អះអាងថាគេមិនទាន់ព័ត៌មានច្បាស់ការ ស្តីអំពីទំនិញស្តុកក្នុងនាវានេះទេ។ រហូតមកទល់ពេលនេះ គេក៏មិនទាន់អាចសន្និដ្ឋានបានដែរ ថាអគ្គីភ័យនេះ ផ្តើមឆាបឆេះដោយរបៀបណា។
ដោយឡែក យោងតាមក្រុមហ៊ុនជប៉ុន Shoei Kisen Kaisha ដែលជាម្ចាស់នាវានេះ គឺអគ្គីភ័យបានផ្តើមឆាបឆេះ ចេញពីរថយន្តអគ្គីសនីមួយគ្រឿង នៅវេលាយប់ថ្ងៃពុធ ម៉ោង១២រំលងអាធ្រាត្រជាងបន្តិច។ ដូចគ្នាដែរ បណ្តាញទូរទស្សន៍ហូឡង់ RTL បានផ្សាយនៅថ្ងៃព្រហស្បតិ៍ នូវខ្សែអាត់ថតសំឡេងឆ្លងឆ្លើយតាមវិទ្យុទាក់ទង របស់ក្រុមសង្គ្រោះ ដែលក្នុងសារជាសំឡេងនោះ មានសមាជិកក្រុមសង្គ្រោះម្នាក់ បាននិយាយថា ភ្លើងបានចាប់ផ្តើមឆេះចេញពីអាគុយរថយន្តរបស់រថយន្តអគ្គីសនីមួយគ្រឿង។
សូមបញ្ជាក់ថា នាវា Fremantle Higtway ទំងន់១៨៥០០តោន ចេញដំណើរពីកំពង់ផែអាល្លឺម៉ង់ Bremerhaven ឆ្ពោះទៅកាន់អេហ្ស៊ីប មុននឹងបញ្ចប់ដំណើរនៅកំពង់ផែសិង្ហបុរី។ គិតត្រឹមរសៀលថ្ងៃសុក្រ អណ្តាតភ្លើងបានចុះថយបន្តិចហើយ។ ក្នុងចំណោមក្រុមនាវិកចំនួន២៣នាក់ គឺមានម្នាក់បានស្លាប់ និងរបួសច្រើននាក់។ នាវាសង្គ្រោះចំនួន៤គ្រឿងកំពុងតែស្ថិតនៅក្បែរនោះ ខណៈឧត្ថម្ភាគចក្រហោះក្រវែលតាមដានស្ថានការណ៍ជាប្រចាំ។ យោងតាមក្រុមសង្គ្រោះហូឡង់ បច្ចុប្បន្ន នាវានេះស្ថិតនៅចម្ងាយប្រមាណ១៦គីឡូម៉ែត្រ ពីឆ្នេរ កោះ Terchelling ហើយត្រូវគេទាក់ខ្សែសណ្តោង ទប់កុំឲ្យវារសាត់អណ្តែត។
គួរបញ្ជាក់ដែរថា កោះ Terchelling គឺជាកោះ១ក្នុងចំណោម៨ ក្នុងសមុទ្រ Wadden ខាងជើងហូឡង់ ដែលតំបន់នេះ គឺជាតំបន់ធម្មជាតិសម្បតិ្តបេតិភណ្ឌពិភពលោក នៃអង្គការយូណេស្កូ។ តំបន់នេះមានប្រព័ន្ធជីវចម្រុះសំបូរបែប ជាមួយនឹងសត្វចំនួនជាង១ម៉ឺនពូជ ទាំងក្នុងទឹកនិងលើគោក។ លោក Edwin Granneman អ្នកនាំពាក្យឆ្មាំសមុទ្រហូឡង់ បានលើកឡើងថា ក្រុមសង្គ្រោះ បានសម្រេចកាត់បន្ថយការបាញ់ទឹកស្រោច ព្រោះបារម្ភក្រែងវាធ្វើឲ្យនាវា ក្រឡាប់ ផ្អៀង លិចចូលទៅក្នុងសមុទ្រ។ ប្រសិនបើនាវានេះលិចចូលសមុទ្រ នោះវានឹងបង្កជាហានិភ័យបរិស្ថាន ដ៏ធ្ងន់ធ្ងរបំផុតមិនធ្លាប់មានសម្រាប់ហូឡង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ