ការប្រែប្រែលអាកាសធាតុ៖ សភាអឺរ៉ុបអនុម័តកំណែទម្រង់ទីផ្សារកាបូនដ៏មានមហិច្ឆតា
ដើម្បីធ្វើឲ្យផែនការកាត់បន្ថយការបញ្ចេញឧស្ម័នកាបូនិក ឧស្ម័នផ្ទះកញ្ចក់កាន់តែមានមហិច្ឆតា សភាអឺរ៉ុបបានបោះឆ្នោតអនុម័តកំណែទម្រង់ទីផ្សារកាបោន។ កំណែទម្រង់ទីផ្សារកោបោនដែលសភាអឺរ៉ុបបោះឆ្នោតអនុម័តនៅទីក្រុងព្រុចស៊ែល កាលពីថ្ងៃអង្គារម្សិលមិញផ្តោតសំខាន់ទៅលើការពង្រីកទីផ្សារកាបោនទៅក្នុងវិស័យដឹកជញ្ជូន និងពន្ធកាបោននៅព្រំដែន។ សភាអឺរ៉ុបកំពុងរៀបចំផងដែរ សេចក្តីព្រាងច្បាប់ដើម្បីការពារ ជួយក្រុមហ៊ុនឧស្សាហកម្មអឺរ៉ុប នៅចំពោះមុខការប្រកួតប្រជែងខ្លាំងជាមួយក្រុមហ៊ុនអាមេរិកដែលបានទទួលជំនួយ នៅក្នុងក្របខ័ណ្ឌប្រយុទ្ធប្រឆាំងការប្រែប្រួលអាកាសធាតុ ដែលរដ្ឋបាលលោកចូ បៃដិនចុះហត្ថលេខា នៅឆ្នាំមុន។
ចុះផ្សាយនៅថ្ងៃ៖ កែប្រែថ្ងៃទី៖
កំណែទម្រង់ទីផ្សារកាបោនដែលសភាអឺរ៉ុបបោះឆ្នោត ទើបអនុម័ត កាលពីថ្ងៃម្សិលមិញនឹងជួយឲ្យសហភាពអឺរ៉ុបសម្រេចគោលដៅដ៏មានមហិច្ឆតារបស់ខ្លួនក្នុងការកាត់បន្ថយការបញ្ចេញឧស្ម័នកាបូនិក ឧស្ម័នផ្ទះកញ្ចក់ ដែលជាដើមហេតុនៃការឡើងកំដៅ ផែនដី និងការប្រែប្រួលអាកាសធាតុ។
សហភាពអឺរ៉ុបធ្លាប់បានកំណត់គោលដៅថា នឹងកាត់បន្ថយការបញ្ចេញឧស្ម័នកាបូនិកឲ្យបាន៤៣%ពីពេលនេះ ដល់ឆ្នាំ ២០៣០។ ប៉ុន្តែ ទៅតាមកំណែទម្រង់ថ្មី សហភាពអឺរ៉ុបត្រូវកាត់បន្ថយការបញ្ចេញឧស្ម័នកាបូនិក ឲ្យបាន៦២%។ អំណើះតទៅ ក្រុមហ៊ុនរោងចក្រឧស្សាហកម្មនៅក្នុងទឹកដីអឺរ៉ុប ដាក់ផែនការ បញ្ចេញឧស្ម័នកាបូនិកឲ្យបានកាន់តែតិច តាមរយៈការប្រើប្រាស់ថាមពលស្អាតស្អំ ដូចជា ថាមពលបានមកពីផ្ទាំងសូឡា និងវាយោអគ្គិសនីជាដើម។
មួយវិញទៀត នៅក្នុងកំណែទម្រង់ទីផ្សារកាបោនលើកនេះ ការកំណត់កូតានៃការបញ្ចេញឧស្ម័នកាបូនិក នៅក្នុងរង្វង់សហភាពអឺរ៉ុបនឹងត្រូវលាតសន្ធឹងចូលដល់វិស័យដឹកជញ្ជូន និងអគាររស់នៅ។ ការកំណត់កូតាបញ្ចេញឧស្ម័នកាបូនិក សម្រាប់ការប្រើម៉ាស៊ីនកំដៅអគារ និងការប្រើប្រេងឧស្ម័នសម្រាប់រថយន្ត ជារឿងមួយដែលគេមិននឹកស្មានដល់ថា បានទទួលការគាំទ្រពីសភាអឺរ៉ុប ក្នុងហេតុផលថា វាអាចប៉ះពាល់ដល់ជីវភាពរបស់ប្រជាជនអឺរ៉ុប ដែលកំពុងប្រឈមខ្លាំងរួចទៅហើយ នឹងថាមពលឡើងថ្លៃ ដោយសារសង្រ្គាមរុស្ស៊ី ឈ្លានពានអ៊ុយក្រែន។ តាមកំណែទម្រង់ទីផ្សារកាបោន ចាប់ពីឆ្នាំ ២០២៧ ប្រជាជនអឺរ៉ុបត្រូវចូលរួមបង់ថ្លៃកាបោនតម្លៃ៤៥អឺរ៉ូក្នុងមួយតោន សម្រាប់ម៉ាស៊ីនកំដៅ និងមធ្យោបាយដឹកជញ្ជូន។ ប៉ុន្តែ ក្នុងករណីដែលតម្លៃថាមពលនៅបន្តឡើងថ្លៃដូចសព្វថ្ងៃ កាតព្វកិច្ចបង់ថ្លៃកាបោនរបស់ប្រជាជន ត្រូវលើកពេលទៅអនុវត្តចាប់ពីឆ្នាំ ២០២៨។
ដើម្បីបង្កាទប់ស្កាត់ចលនាប្រឆាំងរបស់ប្រជាជន សភាអឺរ៉ុបអនុម័តផងដែរ ការបង្កើតមូលនិធិ សង្គមសម្រាប់បរិស្ថាន ជាង ៨៦ពាន់លានអឺរ៉ូ ដើម្បីជួយក្រុមហ៊ុនតូចមធ្យម និងប្រជាជនដែលមានជីវភាពខ្វះខាត ដែលប៉ះពាល់ដោយសារកំណែទម្រង់ទីផ្សារកាបោន។
សហភាពអឺរ៉ុបពង្រីកវិសាលភាពទីផ្សារកាបោនទៅលើវិស័យផ្សេងទៀត បន្ទាប់ពីសភា អឺរ៉ុបបង្កើតពន្ធកាបោន នៅព្រំដែន។ រាល់ទំនិញបរទេស នាំចូលមកអឺរ៉ុប ដែលមានដូចជាស៊ីម៉ង់ ដែកថែប អាលុយមីញ៉ូម ភ្លើងអគ្គិសនី ជីគីមី ដែលផលិតឡើង ដោយសារការប្រើថាមពល ធ្យូងថ្ម និងប្រេង ដែលបញ្ចេញឧស្ម័នកាបូនិក លើសពីកូតាកំណត់របស់អឺរ៉ុប នឹងត្រូវបង់ពន្ធកាបោនជាមុនសិន មុននឹងអាចដាក់លក់នៅទីផ្សារអឺរ៉ុប។
សហភាពអឺរ៉ុបនឹងសាកល្បងដាក់ឲ្យដំណើរការពន្ធកាបោននៅព្រំដែនចាប់ពីឆ្នាំនេះ និងរំពឹងថា ទទួលបានប្រាក់ចំណូលពន្ធប្រមាណ ១៤ពាន់លានអឺរ៉ូក្នុងមួយឆ្នាំ សម្រាប់យកទៅបំពេញកេសថវិកាទូទៅរបស់អឺរ៉ុប។ នៅក្នុងករណីដែលសហភាពអឺរ៉ុបអនុវត្តពេញលេញ ពន្ធកាបោននៅព្រំដែនចាប់ពីឆ្នាំ ២០២៦ ដល់ឆ្នាំ ២០៣៤ សហភាពអឺរ៉ុបនឹងលុបចោលបន្តិចម្តងៗ កូតាសិទ្ធិបញ្ចេញឧស្ម័នដោយឥតគិតថ្លៃរបស់ក្រុមហ៊ុនឧស្សាហកម្មអឺរ៉ុប ដើម្បីធ្វើយ៉ាងណាឲ្យពួកគេអាចប្រកួតប្រជែងស្មើភាពជាមួយក្រុមហ៊ុនក្រៅទឹកដីអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ