សង្គ្រាមអ៊ុយក្រែន៖ តុលាការព្រហ្មទណ្ឌអន្តរជាតិចេញដីកាចាប់ខ្លួនលោកពូទីន
តុលាការព្រហ្មទណ្ឌអន្តរជាតិបានប្រកាសឲ្យដឹង នៅថ្ងៃទី១៧មីនាថា បានចេញដីកាចាប់ខ្លួនលោកវ៉្លាឌីមៀរ ពូទីន ដោយចោទប្រកាន់ពីបទជម្លៀសកុមារអ៊ុយក្រែនដោយខុសច្បាប់ ចាប់តាំងពីពេលចាប់ផ្តើមសង្គ្រាមនៅអ៊ុយក្រែន។ ការជម្លៀសកុមារដោយខុសច្បាប់ ដែលត្រូវបានចាត់ទុកជាឧក្រិដ្ឋកម្មសង្គ្រាម។
ចុះផ្សាយនៅថ្ងៃ៖
« ឧក្រិដ្ឋកម្មត្រូវបានប្រព្រឹត្ត នៅក្នុងទឹកដីអ៊ុយក្រែនដែលស្ថិតក្រោមការកាន់កាប់ដោយរុស្ស៊ី យ៉ាងតិច ចាប់តាំងពីថ្ងៃទី២៤ ខែកុម្ភៈ ឆ្នាំ២០២២ » នេះបើយោងតាមការលើកឡើងរបស់តុលាការព្រហ្មទណ្ឌអន្តរជាតិ នៅក្នុងសេចក្តីប្រកាសព័ត៌មាន កាលពីថ្ងៃសុក្រ ១៧មីនា ដោយនៅក្នុងនោះ តុលាការក៏បានបញ្ជាក់ផងដែរថា « មានហេតុផលដែលគួរឲ្យជឿបានថា លោកពូទីន មានការទទួលខុសត្រូវដោយផ្ទាល់ ចំពោះឧក្រិដ្ឋកម្មខាងលើ »។
លោកប្រធានាធិបតីអ៊ុយក្រែន ហ្សេឡិនស្គី បានសម្តែងនូវការអបអរសាទរ ដោយចាត់ទុក ការចេញដីកាចាប់ខ្លួននេះថា វិធានការជាប្រវត្តិសាស្រ្តមួយ។ ក៏ប៉ុន្តែ ពីទីក្រុងម៉ូស្គូវិញ អ្នកនាំពាក្យក្រសួងការបរទេសរុស្ស៊ីបានលើកឡើងថា ការចេញដីកាចាប់ខ្លួននេះ គឺគ្មានតម្លៃអ្វីទាំងអស់សម្រាប់រុស្ស៊ី ហើយថា រុស្ស៊ីនឹងមិនសហការជាមួយតុលាការព្រហ្មទណ្ឌអន្តរជាតិនោះទេ។
គួរបញ្ជាក់ថា រុស្ស៊ីមិនមែនជាប្រទេសសមាជិកអនុសញ្ញាក្រុងរ៉ូម ដែលជាអនុសញ្ញាបង្កើតតុលាការព្រហ្មទណ្ឌអន្តរជាតិនោះទេ។ ដូច្នេះ គេមិនរំពឹងថា តុលាការអាចនឹងចាប់ខ្លួនលោកពូទីនពីក្នុងទឹកដីរុស្ស៊ីបានទេ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ