តុលាការកំពូលបារាំង បើកការជំនំជំរះ ស្តីអំពី “អំណាចយុត្តាធិការជាសកល” នៃប្រព័ន្ធយុត្តិធម៌បារាំង
តុលាការកំពូលបារាំង បានចាប់ផ្តើមសវនាកា កាលពីថ្ងៃសុក្រ ទី១៧មីនា ទាក់ទិននឹង ការទទួលស្គាក់អំណាចយុត្តាធិការ ជំនំជំរះសំណុំរឿងរបស់ជនជាតិស៊ីរី២នាក់ ដែលត្រូវបានគេចោទពីបទ “ឧក្រិដ្ឋកម្មសង្គ្រាម” និង “ឧក្រិដ្ឋកម្មប្រឆាំងមនុស្សជាតិ” កើតឡើងនៅក្នុងប្រទេសស៊ីរី។ សូមបញ្ជាក់ថា នេះគឺជាសវនាការដ៏សំខាន់ ដែលសាលក្រមអាចកំណត់លើកឡើង អំពី “គោលការណ៍កំពូលនៃអំណាចយុត្តាធិការជាសកល” នៃប្រព័ន្ធយុត្តិធម៌បារាំង បើទោះបីជនជាប់ចោទ មិនមែនជាជនជាតិបារាំង ហើយអង្គហេតុ មិនបានកើតនៅក្នុងទឹកដីបារាំងក៏ដោយ។
ចុះផ្សាយនៅថ្ងៃ៖
ស្តាប់ - ០២:៤៣
តុលាការកំពូលបារាំង បើសវនាកាសំរេចសេចក្តី អំពី"អំណាចយុត្តាធិកា" ក្នុងការជំនះជំរះលើសំណុំរឿង២ ទីមួយពាក់ព័ន្ធនឹងជនឈ្មោះ Abdulhamid Chaban អតីតទាហានស៊ីរី ជាប់ចោទពីបទ “ឧក្រិដ្ឋកម្មប្រឆាំងមនុស្សជាតិ” ប្រព្រឹត្តិនៅស៊ីរី។ សំណុំរឿងទី២ ជនជាប់ចោទឈ្មោះ Majdi Nema ជនជាតិស៊ីរី ជាប់ចោទពីបទ ឧក្រិដ្ឋកម្មសង្គ្រាម។ ជននេះ គឺជាអតីតអ្នកនាំពាក្យក្រុមប្រដាប់អាវុធស៊ីរីមួយក្រុម ឈ្មោះ Jayish al-Islam ហើយ ត្រូវបានសមត្ថកិច្ចបារាំង ចាប់ឃាត់ខ្លួនកាលពីខែមករា២០២០។
ជនជាប់ចោទទាំង២ មិនត្រឹមតែបានប្រកែកមិនទទួលស្គាល់អង្គហេតុប៉ុណ្ណោះទេ តែថែមទាំងបដិសេធមិនទទួលស្គាល់អំណាចយុត្តិធិការរបស់តុលាការបារាំង ដោយអះអាងថា ពួកគេជាជនជាតិស៊ីរី ហើយអង្គហេតុកើតឡើងនៅស៊ីរី មិនមានអ្វីពាក់ព័ន្ធនឹងបារាំងសោះឡើយ។ តែយ៉ាងណា ដើមចោទ បានលើកអំពី “អំណាចយុត្តាធិការជាសកល” នៃប្រព័ន្ធយុត្តិធម៌បារាំង ទាក់ទិននឹងឧក្រិដ្ឋកម្មធំៗទាំង២នេះ។
ទោះជាយ៉ាងនេះក្តី មេធាវីជនជាប់ចោទ បានអះអាងថា យោងតាមច្បាប់បារាំង ចុះថ្ងៃទី៩ សីហា ២០១០ គឺតុលាការបារាំងអាចមាន “អំណាចយុត្តាធិការជាសកលបាន” គឺទាល់តែបទល្មើសនោះ មានចែងយ៉ាងច្បាស់ ទាំងក្នុងច្បាប់របស់បារាំង ហើយនិងច្បាប់ក្នុងប្រទេសដើមកំណើតរបស់ជនជាប់ចោទ។ ពាក់ព័ន្ធនឹង បទឧក្រិដ្ឋកម្មប្រឆាំងមនុស្សជាតិ គឺច្បាប់ស៊ីរីមិនមានចែងកំណត់ទេ ហើយស៊ីរី ក៏មិនមែនជាប្រទេសហត្ថលេខី នៃសន្ធិសញ្ញាទីក្រុងរ៉ូមដែរ។ ជាងនេះទៀត ប្រព័ន្ធតុលាការស៊ីរី មិនបានសហការជាមួយតុលាការបារាំងទេ ដែលនឹងធ្វើឲ្យដំណើរការជំនំជំរះកាត់ទោសជនជាប់ចោទ មិនអាចប្រព្រឹត្តិទៅដោយត្រឹមត្រូវយុត្តិធម៌ឡើយ។
ដោយឡែក ផ្អែកតាមការវិភាគរបស់លោក François Molins អគ្គរដ្ឋអាជ្ញាអមតុលាការកំពូលបារាំង គឺតុលាកំពូលអាចនឹងប្រកាសថា តុលាការមានអំណាចយុត្តាធិការ ទោះជនជាប់ចោទមិនមែនជាជនជាតិបារាំង ហើយអង្គហេតុមិនកើតឡើងនៅបារាំងក៏ដោយ។ ពុំនោះទេ ទៅថ្ងៃមុខ បារាំងនិងក្លាយជាដែនដី ដែលឧក្រិដ្ឋជន ប្រព្រឹត្តិបទល្មើស ឧក្រិដ្ឋកម្មសង្គ្រាម ឬឧក្រិដ្ឋកម្មប្រឆាំងមនុស្សជាតិ អាចមកសំងំលាក់ខ្លួនបានយ៉ាងស្រួល។
ចម្លើយរបស់ចៅក្រមតុលាការកំពូលបារាំង កំពុងតែត្រូវបានក្រុមអង្គការសង្គមស៊ីវីល ការពារសិទ្ធិមនុស្ស រងចាំតាមដានរងចាំជាខ្លាំង ព្រោះវានឹងអាចប៉ះពាល់ ដល់សំណុំរឿងជាច្រើនផ្សេងទៀត ដែលកំពុងតែរងចាំការជំនំជំរះ ទាក់ទិននឹងបទឧក្រិដ្ឋធំៗទាំង២នេះ។ ចៅក្រុមតុលាការកំពូល នឹងប្រកាសសាលក្រមនៅថ្ងៃទី ១២ឧសភា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ