អ៊ីរ៉ង់ ដោះលែងអ្នកទោសស្រីអេស្ប៉ាញម្នាក់ តែនៅទុកបុរសអេស្ប៉ាញម្នាក់ទៀត
ថ្ងៃអាទិត្យ ទី២៦កុម្ភៈ ក្រសួងការបរទេសអេស្ប៉ាញ ប្រកាសថា ពលរដ្ឋរបស់ខ្លួនម្នាក់ ត្រូវរដ្ឋអំណាចអ៊ីរ៉ង់ ដោះលែងឲ្យមានសេរីភាព និងបានធ្វើដំណើរចាកចេញពីទឹកដីអ៊ីរ៉ង់ហើយ។ ក៏ប៉ុន្តែ ប្រមុខការទូតអេស្ប៉ាញ នៅតែជំរុញឲ្យ អ៊ីរ៉ង់ បន្តដោះលែងពលរដ្ឋរបស់ខ្លួនបន្ថែមទៀត ដែលអេស្ប៉ាញសង្កត់ធ្ងន់ថា អ៊ីរ៉ង់បានចាប់ឃុំខ្លួនដោយគ្មានសមហេតុផល។
ចុះផ្សាយនៅថ្ងៃ៖
ស្តាប់ - ០២:១០
នារីអេស្ប៉ាញ អាណា បេនែរា (Ana Beneira) ត្រូវរដ្ឋអំណាចអ៊ីរ៉ង់ ចាប់ឃុំខ្លួន នៅក្នុងខែវិច្ឆិកា ឆ្នាំ២០២២ និងត្រូវដោះលែងវិញ នៅថ្ងៃសៅរ៍២៦កុម្ភៈ។ នៅថ្ងៃអាទិត្យ ប្រមុខការបរទេសអេស្ប៉ាញ លោករដ្ឋមន្ត្រី José Manuel Albares មានប្រសាសន៍ទៅកាន់បណ្តាអ្នកកាសែតថា នាងមានសេរីភាពហើយ ប៉ុន្តែ យើងមិនទាន់វាយឃ្មោះទូងស្គរជាសាធារណៈភ្លាមៗ គ្រាដែលជើងយន្តហោះហើររបស់នាងមិនទាន់ចាកចេញពីអ៊ីរ៉ង់។ នៅពេលនេះ យន្តហោះបានដឹកនាងចេញពីអ៊ីរ៉ង់ ឆ្ពោះតម្រង់មកអេស្ប៉ាញ ឆ្លង់កាត់តាម ឌុយបៃ និង ហ្សឺណែវ។
ពេលទទួលដំណឹងភ្លាម ក្រុមគ្រួសាររបស់នារីអេស្ប៉ាញរូបនេះ បានថ្លែងក្តីក្រេកអររំភើប ហើយសង្ឃឹមជួបនាង Ana Beneira នៅយប់ថ្ងៃអាទិត្យ បន្ទាប់ពីរង់ចាំមើលផ្លូវនាង ជាង ៣ ខែ ។ ជុំវិញស្ថានភាពដែល នារីអេស្ប៉ាញវ័យ២៤ឆ្នាំរូបនេះ ត្រូវរដ្ឋអំណាចអ៊ីរ៉ង់ ចាប់ខ្លួននិងដោះលែង គឺ គ្រួសារនិងក្រសួងការបរទេសអេស្ប៉ាញ មិនស្រាយឬបញ្ចេញយោបល់អ្វីច្រើនទេ គឺបានទុកសិទ្ធិឲ្យសាមីជនសម្រេចខ្លួនឯង ថាចង់និយាយបែបណាឬពេលណា ទៅកាន់សារព័ត៌មាន។
បើប្រភពពីអង្គការអ៊ីរ៉ង់ដើម្បីការពារសិទ្ធិមនុស្ស គឺ នាង Ana Beneira ត្រូវចាប់ខ្លួន ក្រោយពីព្រឹត្តិកាណ៍ផ្ទុយបាតុកម្ម ខែកញ្ញា។ បាតុកម្មនេះ ដចេញពី មរណភាពរបស់នាង មាស្ហា អាមីនី ដែលស្លាប់នៅប៉ុន្មានថ្ងៃក្រោយពីរដ្ឋអំណាចអ៊ីរ៉ង់ចាប់ឃុំខ្លួន ព្រោះតែនាងមិនបានទទូលក្រណាត់គ្របក្បាលឲ្យសមរម្យ។ ចាប់ពីពេលនោះមក គឺផ្ទុះចលនាបាតុកម្មទាំងក្នុងនិងក្រៅស្រុក។ ក្នុងប្រទេសអ៊ីរ៉ង អាជ្ញាធរបញ្ជាក់ថា បានចាប់ខ្លួនជនបរទេសប្រមាណ១០នាក់ ពាក់ព័ន្ធនឹងករណីចូលរួមបាតុកម្មប្រឆាំងរដ្ឋាភិបាល ដែលមានជនជាតិ បារាំង ប៉ូឡូញ អេស្ប៉ាញ អ៊ីតាលី ជាដើម។
ចំពោះអេស្ប៉ាញ នៅមាន បុរសអេស្ប៉ាញម្នាក់ទៀត ឈ្មោះ Santiago Sanchez Cogedor កំពុងតែបន្តជាប់ឃុំតាំងពីខែតុលា ២០២២។ រដ្ឋមន្ត្រីការបរទេស José Manuel Albares ទាមទារឲ្យ អាជ្ញាធរអ៊ីរ៉ង់ ដោះលែងជាបន្ទាន់។ ប្រមុខទូតអេស្ប៉ាញយល់ឃើញថា ការចាប់ខ្លួនបុរសនោះ គឺគ្មានមូលដ្ឋានច្បាប់ទាល់តែសោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ