អ.ស.ប ទាមទារស្វែងរកយុត្តិធម៌ជូនជនរងគ្រោះស៊ីវីល ដោយសារ “សង្គ្រាមមិនគួរកើតឡើង” របស់រុស្ស៊ី
សង្គ្រាមឈ្លានពានអ៊ុយក្រែន បង្កឡើងដោយរុស្ស៊ី បានឈានចូលដល់ឆ្នាំទី២ហើយ នៅថ្ងៃទី២៥កុម្ភៈនេះ។ កន្លងមកមួយឆ្នាំមកនេះ មានប្រជាជនស៊ីវីលអ៊ុយក្រែន ស្លាប់ជាច្រើនពាន់នាក់ និងរបួសជាងមួយម៉ឺននាក់។ ស្នងការដ្ឋានសិទ្ធិមនុស្ស នៃអង្គការសហប្រជាជាតិ បានចេញលិខិតប្រកាសទាមទារ ថាត្រូវតែស្វែងរកយុត្តិធម៌ជូនជនរងគ្រោះអ៊ុយក្រែន ដែលស្លាប់និងរងរបួស ដោយសារតែសង្គ្រាមបង្កឡើងដោយរុស្ស៊ី។ អ្នកទទួលខុសត្រូវនៃសង្គ្រាមនេះ នឹងត្រូវតែទទួលទោសចំពោះមុខតុលាការ។
ចុះផ្សាយនៅថ្ងៃ៖
ស្តាប់ - ០២:៤៤
ក្នុងឱកាសគម្រប់ខួប១ឆ្នាំនៃសង្គ្រាមនៅអ៊ុយក្រែន លោក Volker Türk ឧត្តមស្នងការទទួលបន្ទុកសិទ្ធិមនុស្ស នៃអង្គការសហប្រជាជាតិ បានចេញសេចក្តីថ្លែងការណ៍ អំពាវនាវ ហៅឲ្យសហគមន៍អន្តរជាតិ ត្រូវតែរួមគ្នាប្រឹងប្រែង ដើម្បីឈានទៅរៀបចំយន្តការ ផ្តល់យុត្តិធម៌ជូនជនរងគ្រោះស៊ីវីលអ៊ុយក្រែន ដែលស្លាប់និងរបួស ដោយសារតែសង្គ្រាម ដែលលោកចាត់ទុកថា ជា “សង្គ្រាមមិនគួរកើតឡើងទាល់តែសោះ”។ លោកបានបន្ថែមថា ជនរងគ្រោះ ត្រូវតែទទួលបាននូវការប៉ះប៉ូវសំណងខូចខាត ការជួយជំនុកបម្រុងសង្គ្រោះ ដោយមិនចាំបាច់រងចាំលទ្ធផលស្ថាពរ នៃនីតិវិធីផ្លូវច្បាប់ តាមរយៈតុលាការពិសេសមួយ។
លោកស្រីអគ្គរដ្ឋទូតអ៊ុយក្រែនប្រចាំអងុ្គការសហប្រជាជាតិនៅក្រុងហ្សឺណែវ បានថ្លែងអបអរសាទរ ចំពោះការប្រឹងប្រែង ក្នុងការឈានទៅបង្កើតឲ្យបាន នូវតុលាការវិសាមញ្ញមួយ ដើម្បីកាត់ទោសអ្នកទទួលខុសត្រូវបង្កឧក្រិដ្ឋកម្មប្រឆាំងមនុស្សជាតិ និងឧក្រិដ្ឋកម្មសង្គ្រាម ក្នុងក្របខណ្ឌសង្គ្រាមនៅអ៊ុយក្រែន។ លោកស្រីបានបញ្ជាក់ថា កាតព្វកិច្ចក្នុងការចាប់អ្នកទទួលខុសត្រូវឲ្យទទួលទោស គឺជាការផ្តល់យុត្តិធម៌ គឺជាបង្ការកុំឲ្យអំពើល្មើសបំពានសិទ្ធិមនុស្សរបៀបនេះកើតឡើងទៀត ហើយគឺជាការជំហានក៏សាងសន្តិភាព។
គួររំលឹកថា ទាំងអ៊ុយក្រែន ទាំងរុស្ស៊ី គឺមិនមែនជាប្រទេសហត្ថលេខីនៃសន្ធិសញ្ញាទីក្រុងរ៉ូម ដែលបង្កើតតុលាការព្រហ្មទណ្ឌអន្តរជាតិទេ។ ដូច្នេះរាល់អំពើឧក្រិដ្ឋ ដែលកើតមានក្នុងក្របខណ្ឌសង្គ្រាមអ៊ុយក្រែន គឺគេត្រូវតែបង្កើតតុលាការវិសាមញ្ញមួយ ដើម្បីវិនិច្ឆ័យ។ លោកស្រី Ursula Von de Layen ប្រធានគណកម្មការអឺរ៉ុប ក៏បានសំដែងការគាំទ្រគំនិតនេះដែរ។
សូមបញ្ជាក់ថា យោងតាមតួលេខរបស់ឧត្តមស្នងការដ្ឋានសិទ្ធិមនុស្ស ក្នុងរយៈពេលសង្គ្រាមមួយឆ្នាំមកនេះ មានជនស៊ីវីលអ៊ុយក្រែន ចំនួនយ៉ាងហោច ៨០០៦នាក់ បានស្លាប់ និងរបួស ជាង១៣០០០នាក់។ ជាងនេះទៀត លោកស្រីប្រធានបេសកកម្មសិទ្ធិមនុស្សប្រចាំនៅអ៊ុយក្រែន អះអាងថាតួលេខនេះអាចទាបជាការពិតជាក់ស្តែងច្រើនណាស់។ ក្រៅពីមនុស្សស្លាប់ និងរបួសដោយសារវាយប្រហារទំលាក់គ្រាប់បែករបស់កងទ័ពរុស្ស៊ី ប្រជាជនអ៊ុយក្រែនភាគច្រើនជាមនុស្សចាស់ជរា និងជនពិការ រស់នៅក្នុងស្ថានភាពដ៏លំបាកវេទនាបំផុត នៅតាមតំបន់ដែលជាសមរភូមិមុខ។ អង្គការ UNHCR លើកឡើងថា យ៉ាងហោចណាស់ មានប្រជាជនអ៊ុយក្រែនចំនួន ១៣លាននាក់ ដែលត្រូវបង្ខំចិត្តភៀសខ្លួន ចោលផ្ទះសម្បែង ដែលក្នុងនោះ៨លាននាក់ បានភៀសខ្លួនទៅកាន់បណ្តាប្រទេសអឺរ៉ុបនានា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ