គ្រោះថ្នាក់ធ្លាក់យន្តហោះMH17៖ ភស្តុតាង«ស្តួចស្តើង»ថាលោកពូទីន បញ្ជាឲ្យបាញ់ទម្លាក់
ព្រឹត្តិការណ៍បាញ់មីស៊ីលទម្លាក់យន្តហោះ MH17 សម្លាប់មនុស្សជិត៣០០នាក់ គឺ ត្រូវបិទបញ្ចប់សំណុំរឿង តែមិនប្តឹងបន្តទៀតទេ។ កាលពីថ្ងៃពុធ ទី៨កុម្ភៈ ក្រុមអ្នកស៊ើបង្កេតអន្តរជាតិ បានសន្និដ្ឋានថា មានសញ្ញាណភស្តុតាងមាំទាំ ដែលថា រដ្ឋបាលក្រុងម៉ូស្កូ ពិតជាបានផ្តល់មីស៊ីលឲ្យក្រុមផ្តាច់ខ្លួននៅអ៊ុយក្រែន និងមីស៊ីលនោះបាញ់ត្រូវទម្លាក់យន្តហោះ MH17។ ប៉ុន្តែ គេមានភស្តុតាង«តិចតួចណាស់» ដែលបញ្ជាក់ថា លោកប្រធានាធិបតីរុស្ស៊ី ពូទីន ជាអ្នកបញ្ជាឲ្យបាញ់ទម្លាក់យន្តហោះនោះ។
ចុះផ្សាយនៅថ្ងៃ៖
ស្តាប់ - ០១:៥៩
ព្រឹត្តិការណ៍គ្រោះថ្នាក់បាញ់ធ្លាក់យន្តហោះ MH17 ត្រូវ អ្នកស្រីរដ្ឋអាជ្ញាហូឡង់ Digna Van Boetzelaer បានបញ្ជាក់នៅថ្ងៃទី៨កុម្ភៈថា សំណុំរឿងស៊ើបអង្កេតឈានដល់ដំណាល់កាលចុងក្រោយហើយ។ គ្រប់ច្រកផ្លូវ គ្រប់ដានតម្រុយសម្រាប់ការអង្កេត គឺត្រូវទាញយកមកពិនិត្យមើលអស់ហើយ។ ពេលនេះ ការស៊ើបអង្កេត ត្រូវព្យួរត្រឹមហ្នឹង ព្រោះថា គ្មានភស្តុតាងគ្រប់គ្រាន់ សម្រាប់ប្តឹងបន្តទៅទេ។
យន្តហោះ MH17 ត្រូវ មីស៊ីល បាញ់ធ្លាក់ នៅថ្ងៃទី១៧ កក្កដា ២០១៤។ កាលនោះ យន្តហោះ MH17 ហោះហើរពីក្រុង អាំស្ទែរដាំ តម្រង់ឆ្ពោះទៅ ក្រុងកូឡាឡាំពួរ ក៏ប៉ុន្តែ ពេលហោះដល់ប៉ែកខាងកើតប្រទេសអ៊ុយក្រែន ក៏ត្រូវគ្រាប់មីស៊ីលបាញ់ធ្លាក់ និងបានបណ្តាលឲ្យ ស្លាប់អ្នកដំណើរ ២៩៨ នាក់។
ប៉ុន្មានខែក្រោយមក គេបានរៀបចំក្រុមអ្នកជំនាញស៊ើបអង្កេតរួម៦ប្រទេស ហើយក្រុមអ្នកអង្កេតបានសន្និដ្ឋានថា មីស៊ីលបង្កគ្រោះថ្នាក់ គឺបាញ់ចេញពីម្តុំមូលដ្ឋានយោធារុស្ស៊ី នៅ Koursk គឺប៉ែកខាងលិចរុស្ស៊ី។ ក្រុមអ្នកអង្កេតក៏ខំរុករកតម្រុយពីអ្នកបញ្ជាឲ្យបាញ់មីស៊ីល ហើយគេដាក់ការសង្ស័យទៅលើប្រធានាធិបតីរុស្ស៊ី ពូទីន ទៀតផង។
ទោះជាយ៉ាងណាក្តី រដ្ឋបាលទីក្រុងម៉ូស្កូ បានបដិសេធច្រានចោលចំពោះសេចក្តីសន្និដ្ឋានរបស់ក្រុមអ្នកស៊ើបង្កេតអន្តរជាតិ ដែលយកមីស៊ីលរុស្ស៊ីនិងប្រមុខរដ្ឋពូទីន ទៅពាក់ព័ន្ធនឹងព្រឹត្តិការណ៍គ្រោះថ្នាក់ធ្លាក់យន្តហោះនោះ។
នៅខែវិច្ឆិកាកន្លងទៅ តុលាការហូឡង់ បានកាត់ទោសបុរសបីនាក់ គឺជនជាតិរុស្ស៊ីពីរនាក់ និងជាតិអ៊ុយក្រែនម្នាក់ ឲ្យជាប់ពន្ធនាគារអស់មួយជីវិត។ ជាការកាត់ទោសដោយកំបាំងមុខ គ្មានវត្តមានជនជាប់ចោទ ទេ។ ចៅក្រមហូឡង់ បានគូសបង្ហាញក្នុងសាលក្រមកាលនោះ ថា មីស៊ីលបង្កហេតុគឺផ្គត់ផ្គង់មកពីរុស្ស៊ី ហើយ ពួកក្រុមផ្តាច់ខ្លួនពីអ៊ុយក្រែនគាំទ្ររុស្ស៊ី គឺជាក្រុមជនសង្ស័យក្នុងសោកនាដក្យបាញ់យន្តហោះធ្លាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ