អាល្លឺម៉ង់និងអេស្ប៉ាញរងការវាយប្រហារដោយកាំបិត ស្ទើរទន្ទឹមពេលគ្នា
មានស្លាប់យ៉ាងហោចណាស់២នាក់ និងរបួស៧នាក់ ក្នុងការវាយប្រហារដោយកាំបិត នៅលើរថភ្លើង កាលពីល្ងាចថ្ងៃពុធ នៅប្រទេសអាល្លឺម៉ង់។ ស្ទើរទន្ទឹមពេលជាមួយគ្នានោះ នៅក្នុងប្រទេសអេស្ប៉ាញ ក៏មានការវាយប្រហារដោយកាំបិតដែរ។ ជនដៃដល់បានចូលទៅក្នុងវិហារកាតូលិក ចាក់បុព្វជិតម្នាក់ឱ្យរបួសធ្ងន់និងបុព្វជិតម្នាក់ទៀត ស្លាប់។
ចុះផ្សាយនៅថ្ងៃ៖
ស្តាប់ - ០១:៥៩
នៅអាល្លឺម៉ង់ ប៉ូលិសកំពុងស្រាវជ្រាវរកមូលហេតុនៃការវាយប្រហាររបស់ខ្មាន់កាំបិតជាតិប៉ាឡេស្ទីនអាយុ៣៣ឆ្នាំ ដែល បានចាក់សម្លាប់មនុស្សពីរនាក់និងរបួស៧នាក់ ក្នុងនោះបីនាក់ជារបួសធ្ងន់ ថាតើជាទង្វើបែបអ៊ីស្លាមជ្រុលនិយម ជីហាត ឬជាទង្វើរបស់មនុស្សខូចសតិ។ បើតាមប្រភពសិ្នទ្ធអង្កេត ជនសង្ស័យបានមកដល់ប្រទេសអាល្លឺម៉ង់កាលពី ៨ឆ្នាំមុន និងមានប្រវត្តិមិនល្អទេ តែគេគ្មានភស្តុតាងអ្វីបញ្ជាក់ថាទង្វើកាលពីថ្ងៃពុធទី ២៥មករា ក្នុងរថភ្លើង មានមូលហេតុពាក់ព័ន្ធនឹងនយោបាយទេ។ ប៉ុន្តែមួយរយៈចុងក្រោយមកនេះ អាល្លឺម៉ង់ ប្រឈមនឹងការគំរាមកំហែងភេរវកម្មជីហាតយ៉ាងខ្លាំង ជាពិសេសតាំងមានការវាយប្រហារដោយបើកឡានបុកសម្លាប់មនុស្សអស់១២នាក់កាលពីខែធ្នូឆ្នាំ២០១៦មក។ តាំងពីឆ្នាំ២០១៣មកទល់នឹងចុងឆ្នាំ២០២១ ចំនួនជនអ៊ីស្លាមជ្រុលនិយមជីហាត ដ៏គ្រោះថ្នាក់ បានកើនឡើង៥ដងនៅអាល្លឺម៉ង់។
ចំណែកនៅអេស្ប៉ាញវិញ ការវាយប្រហារបែបភេរវកម្ម បានស្ងប់ស្ងាត់ខ្លាំង តាំងពីឆ្នាំ២០១៧មក ប៉ុន្តែអាជ្ញាធរបានសម្រេចបើកអង្កេត “ភេរវកម្ម” ភ្លាម ក្រោយហេតុការណ៍វាយប្រហារដោយកាំបិត ពីសំណាក់ជនសង្ស័យជាតិម៉ារ៉ុក អាយុ២៥ឆ្នាំ។ នៅម៉ោង៧យប់មិញ ខ្មាន់កាំបិត បានស្ទុះចូលទៅចាក់សង្ឃកាតូលិកក្នុងវិហារមួយ រួចបន្តដំណើរទៅចូលក្នុងវិហារកាតូលិកមួយទៀត ដែលនៅក្បែរគ្នា ដេញចាក់បុព្វជិកម្នាក់រហូតទាល់តែស្លាប់។ នេះបើតាមសារជូនដំណឹងរបស់ក្រសួងមហាផ្ទៃអេស្ប៉ាញ ដោយឆ្លៀតបញ្ជាក់ថា គេនៅពុំទាន់អាចកំណត់បានដោយប្រាកដអំពីមូលហេតុនៃការវាយប្រហារនេះនៅឡើយទេ។ សូមបញ្ជាក់ថាកន្លែងកើតហេតុនេះ ស្ថិតនៅភាគខាងត្បូងបំផុតនៃប្រទេសអេស្ប៉ាញ ដែលមានផែសម្រាប់ឱ្យទូកឆ្លងទៅប្រទេសម៉ារ៉ុក។ ភេរវកម្មជីហាតដ៏ធ្ងន់ធ្ងរចុងក្រោយនៅអេស្ប៉ាញបានកើតឡើង កាលពីខែសីហា២០១៧ នៅក្រុងបាសឺឡោន ស្លាប់មនុស្ស១៦នាក់ និងរបួស១៤០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ