រដ្ឋាភិបាលបារាំងរងការបន្ទោសថាមិនប្រឹងអស់សមត្ថភាពការពារត្រីដូហ្វាំង
ក្នុងមួយឆ្នាំៗ មានត្រីដូហ្វាំងជាច្រើនរយក្បាលបានមកទើងាប់លើឆ្នេរខាងលិច (ឆ្នេរសមុទ្ទអាត្លង់ទិក)របស់បារាំង។ ព្រួយបារម្ភកាន់តែខ្លាំងនឹងបាតុភូតដូហ្វាំងងាប់ដែលបានកើនឡើងជាលំដាប់ អង្គការក្រៅរដ្ឋាភិបាលនិងអ្នកវិទ្យាសាស្ត្របានទាមទារអ្នកនេសាទបញ្ឈប់សកម្មភាពមួយរយៈ តែរដ្ឋាភិបាលបារាំងចង់ប្រើដំណោះស្រាយបែបបច្ចេកទេសច្រើនជាង សម្រាប់ពេលនេះ។
ចុះផ្សាយនៅថ្ងៃ៖
ស្តាប់ - ០២:០១
សម្ព័ន្ធការពារសត្វបក្សី បានចេញសេចក្តីអំពាវនាវដល់ពលរដ្ឋទូទៅ និងដល់ប្រធានាធិបតីបារាំង អេម៉ានុយអែល ម៉ាក្រុងផ្ទាល់ ថាដល់ពេលដែលបារាំងត្រូវបញ្ចេញសកម្មភាពឱ្យអស់ពីលទ្ធភាពការពារសត្វត្រីដូហ្វាំងពីការធ្វើបាប និងពីគ្រោះរលត់ផុតពូជហើយ។ ដើម្បីការពារជីវិតដូហ្វាំង អង្គការបានសំណូមពរដោយផ្អាកសកម្មភាពនេសាទ ភ្លាម និងសម្រាប់រយៈពេលជាច្រើនសប្តាហ៍ ព្រោះការនេសាទជាដើមហេតុនាំឱ្យដូហ្វាំងទាក់សំណាញ់ រងរបួស បាក់ស្លាប ដាច់ព្រុយ ពិការ ហែលមិនរួចមកទើលើឆ្នេរ ងាប់ទាំងហ្វូងៗ។ នេះបើតាមការលម្អិតរបស់អង្គការសម្ព័ន្ធការពារសត្វបក្សី ដោយមានរូបថតជាបង្អែកផង។
កាលពីថ្ងៃទី ១៦មករា ក្រុមអភិរក្សសត្វដែលចាប់ធ្វើតួលេខដូហ្វាំងងាប់តាំងពីឆ្នាំ១៩៧០មក បានរាប់ឃើញត្រីដូហ្វាំងមកទើងាប់ចំនួន ២៨២ក្បាល គិតចាប់ពីថ្ងៃទី១ធ្នូឆ្នាំ២០២២មក ក្នុងនោះ១២៧ក្បាលងាប់នៅចន្លោះពីថ្ងៃទី ១-២៤មករា២០២៣។ តែរដ្ឋាភិបាលរាប់ឃើញត្រឹម៩១ក្បាលតែប៉ុណ្ណោះ ពីថ្ងៃ១ដល់ថ្ងៃទី៣១ធ្នូ២០២២។ ក្នុងមួយឆ្នាំៗ មានដូហ្វាំងពី៨០០០ទៅ១១០០ក្បាលបានងាប់ តែ៨០%លិច និងរលាយក្នុងទឹក។ ២០២០ជាឆ្នាំដែលដូហ្វាំងទើងាប់ទាំងហ្វូងៗ យ៉ាងច្រើនបំផុត (១២៩៩ក្បាល) និងត្រឹម៦៦៩ក្នុងឆ្នាំ២០២២។
នៅឆ្នាំនេះ បាតុភូតដូហ្វាំងមកទើងាប់ ដ៏ច្រើនហួសកំរិត ឆាប់កើតឡើងខ្លាំងណាស់។ តាមធម្មតា ខែកុម្ភៈនិងមីនា ជារដូវដែលដូហ្វាំងតែងឡើងមកជិតឆ្នេរ ដើម្បីរកចំណីអាហារ តែត្រូវពើបប្រទះជាមួយក្រុមទូកនេសាទ ដែលក៏ជារដូវរកត្រីដែរ។ អ៊ីចឹងហើយបានជាស្ថាប័នអ្នកវិទ្យាសាស្ត្របានណែនាំតាំងពីជាច្រើនឆ្នាំមកហើយ ឱ្យមានផ្អាកសកម្មភាពនេសាទខ្លះនៅរដូវរងារនេះ។ អង្គការក្រៅរដ្ឋាភិបាលជាច្រើនទាមទារឱ្យអនុវត្តវិធានការនេះដែរ តែផ្នែកឧស្សាហកម្មនេសាទប្រឆាំង។
ប្រឈមនឹងការងាប់ហួសចំណុះបែបនេះ អង្គការក្រៅរដ្ឋាភិបាលបានបរិហារកង្វះសកម្មភាពជាក់ស្តែងរបស់រដ្ឋាភិបាលបារាំងក្នុងការពារដូហ្វាំងសត្វអភិរក្សរបស់បារាំងនិងអឺរ៉ុប ដោយព្រមានកាលពីសប្តាហ៍មុនចង់ដាក់ពាក្យបណ្តឹងប្រឆាំងនឹងរដ្ឋបារាំងតែម្តងផង។ ក្រោមគំនាប រដ្ឋាភិបាលបារាំងបានទទួលស្គាល់ថាកំណើនដូហ្វាំងមកទើងាប់ជាកង្វល់ធំ និងបានចេញផែនការថ្មី៨ចំណុចបន្ថែមលើវិធានការចាស់ឆ្នាំ២០១៩ ដែលផ្តល់អាទិភាពលើដំណោះស្រាយបច្ចេកទេស ដោយឱ្យនាវានេសាទដាក់កាមេរ៉ាឬប្រដាប់សំឡេងបណ្តេញដូហ្វាំងឱ្យទៅឆ្ងាយ។ តែជាវិធានការដែលមិនគ្រប់គ្រាន់ មិនអាចប្តូរផ្លាស់ស្ថានការណ៍ និង ខាតពេលវេលាឥតប្រយោជន៍។ នេះបើតាមសម្ព័ន្ធការពារសត្វបក្សីបារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ