ស្លាប់កើនឡើងដល់៤០នាក់ ដោយការបាញ់ប្លោងមីស៊ីល នៅក្រុងDnipro ភាគខាងកើតអ៊ុយក្រែន
កាលពីយប់ថ្ងៃសៅរ៍ ចុងសប្តាហ៍កន្លងទៅ រុស្ស៊ីបានបាញ់ប្លោងមីស៊ីល មកលើអាគារផ្ទះប្រជាពលរដ្ឋ នៅក្រុង Dnipro ស្ថិតនៅភាគខាងកើតអ៊ុយក្រែន។ គិតត្រឹមថ្ងៃចន្ទ ទី១៦មករា អាជ្ញាធរអ៊ុយក្រែនអះអាងថា ការវាយប្រហារនេះ បានសំលាប់ជីវិតប្រជាជនស្លូតត្រង់ យ៉ាងហោច៤០នាក់ ខណៈជាង៣០នាក់ កំពុងតែបាត់ខ្លួនក្នុងគំនរអគារបាក់បែក។ តែយ៉ាងណា នៅថ្ងៃចន្ទដែរ អ្នកនាំពាក្យរដ្ឋាភិបាលរុស្ស៊ី បានបដិសេធថា កងទ័ពរុស្ស៊ីមិនដែលធ្លាប់បានបាញ់គ្រាប់មីស៊ីល ទៅលើផ្ទះប្រជាជនស៊ីវីលទេ។
ចុះផ្សាយនៅថ្ងៃ៖
ស្តាប់ - ០២:៤២
ជិត២ថ្ងៃ ក្រោយគ្រាប់មីស៊ីល បានបាញ់ចំអាគារផ្ទះប្រជាជន នៅក្រុង Dnipro ភាគខាងកើតអ៊ុយក្រែន ក្រុមសង្គ្រោះអ៊ុយក្រែន បានអះអាងថាបានកកាយ យកសាកសពមនុស្ស ចំនួន៤០នាក់ចេញពីគំនរបាក់បែក។ មនុស្សរបួសចំនួន៧៥នាក់ ត្រូវបានសង្គ្រោះ តែក្រុមការងារកំពុងបន្តយ៉ាងសស្រាក់សស្រាំង ស្វែងរកអ្នកបាត់ខ្លួនចំនួន ៣៤នាក់ផ្សេងទៀត នៅក្នុងគំនរអគារ។ ពេលវេលាកាន់តែរំកិលទៅមុខ ក្តីសង្ឃឹមថានឹងរកអ្នករស់រានមានជីវិត មានកាត់តែតិច។
រដ្ឋាភិបាលស៊ុយអែត ដែលជាប្រធានវិលជុំនៃសហភាពអឺរ៉ុប បានចេញសេចក្តីថ្លែងការ ចាត់ទុកការវាយប្រហារបាញ់គ្រាប់មីស៊ីល មកលើទីតាំងផ្ទះសម្បែងប្រជាពលរដ្ឋស្លូតត្រង់នេះ ថាជាអំពើឧក្រិដ្ឋកម្មសង្គ្រាម ដែលកងទ័ពរុស្ស៊ី នឹងត្រូវតែទទួលខុសត្រូវចំពោះមុខច្បាប់អន្តរជាតិ នៅថ្ងៃខាងមុខ។
ដោយឡែក នៅថ្ងៃចន្ទទី១៦មករា លោក Dimitri Peskov អ្នកនាំពាក្យវិមានក្រេមឡាំង បានឆ្លើយបដិសេធ ដោយបានចោទត្រឡប់ទៅវិញថា សោកនាដកម្មនៅ Dnipro គឺប្រហែលជាស្នាដៃរបស់ប្រព័ន្ធការពារផ្លូវអាកាសរបស់កងទ័ពអ៊ុយក្រែន។ អ្នកនាំពាក្យរដ្ឋាភិបាលរុស្ស៊ីរូបនេះ អះអាងទៀតថា កងទ័ពរុស្ស៊ី មិនដែលវាយប្រហារ ទៅលើទីតាំងអគារផ្ទះប្រជាជន ឬហេដ្ឋារចនាសម្ព័ន្ធស៊ីវីលទេ គឺវាយប្រហារតែទៅលើចំណុចគោលដៅកងទ័ពតែប៉ុណ្ណោះ។
តែយ៉ាងណាក៏ដោយ ជាការកត់សំគាល់ ជាច្រើនខែមកនេះ កងទ័ពរុស្ស៊ីបានវាយប្រហារបាញ់មីស៊ីល យ៉ាងសន្ធឹកសន្ធាប់ មកលើអគារផ្ទះប្រជាជន និងជាពិសេសនោះ គឺបានសំដៅកំទេចហេដ្ឋារចនាសម្ព័ន្ធស៊ីវីលអ៊ុយក្រែន ដែលមានដូចជារោងចក្រផលិតចរន្តអគ្គិសនីជាដើម ដើម្បីធ្វើបាបប្រជាជនអ៊ុយក្រែន ឲ្យរស់នៅក្នុងសីតុណ្ហភាពត្រជាក់គ្មានអគ្គិសនីប្រើប្រាស់។
គួរបញ្ជាក់ដែរថា ក្រៅតែពីនៅសមរភូមិមួយចំនួននៅភាគខាងកើត កងទ័ពរុស្ស៊ីមិនសូវវាយប្រយុទ្ធទេ ដោយបាញ់ប្លោងមីស៊ីលតែពីចំងាយតែប៉ុណ្ណោះ។ ប្រឈមនឹងគ្រាប់មីស៊ីលរុស្ស៊ី ធ្លាក់ដូចគ្រាប់ភ្លៀងនៅអ៊ុយក្រែននេះ ក្រុមប្រទេសសម្ព័ន្ធមិត្តលោកខាងលិច បានសន្យានៅដើមឆ្នាំ២០២៣នេះ ប្រគល់បន្ថែមនូវគ្រឿងសព្វាវុធធុនធ្ងន់ជាច្រើនទៅឲ្យអ៊ុយក្រែន។ បារាំង អាល្លឺម៉ង់ អាមេរិក បានសន្យាផ្តល់រថពាសដែកធុនស្រាលសម្រាប់ចល័តទ័ព។ អង់គ្លេស និងប៉ូឡូញវិញ បានសន្យាផ្តល់រថក្រោះធុនធ្ងន់ Chalenger និង Leopard ។ ហើយកាលពីថ្ងៃអាទិត្យទី១៥មករា លោកអគ្គលេខាធិការអង្គការអូតង់ បានអះអាងថា ក្រុមសម្ព័ន្ធមិត្ត នឹងសម្រេចប្រគល់គ្រឿងសព្វាវុធធុនធ្ងន់បន្ថែមទៀត ព្រោះកាលៈទេសៈពេលនេះ ជាពេលដែលត្រូវសំរុកជួយកងទ័ពអ៊ុយក្រែន ឲ្យយកឈ្នះឲ្យបានឆាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ