បារាំង៖ ខ្មាន់កាំភ្លើងម្នាក់បាញ់រះតាមផ្លូវកណ្តាលក្រុងប៉ារីស ស្លាប់យ៉ាងហោច៣នាក់
នៅទីក្រុងប៉ារីស ប្រទេសបារាំង កាលពីថ្ងៃសុក្រទី២៣ធ្នូ មានករណីបាញ់រះនៅតាមផ្លូវ បណ្តាលឲ្យស្លាប់មនុស្សចំនួន៣នាក់ និងរបួសធ្ងន់ យ៉ាងហោច៣នាក់ផ្សេងទៀត។ ឃាតករដៃដល់ ជាជនជាតិបារាំង ភេទប្រុសអាយុ៦៩ឆ្នាំ ត្រូវបានសមត្ថកិច្ចចាប់ខ្លួនបានភ្លាមៗ។ យោងតាមប្រភពពីនគរបាលបារាំង ជនដៃដល់ ត្រូវគេស្គាល់ថា ធ្លាប់ជាប់ការសង្ស័យពីបទប៉ុនប៉ងមនុស្សឃាត ចំនួន២លើករួចមកហើយ នៅឆ្នាំ២០១៦ និង២០២១។
ចុះផ្សាយនៅថ្ងៃ៖
ស្តាប់ - ០២:២២
ហេតុការណ៍បានកើតឡើង នៅលើដងផ្លូវ Enghien ផ្លូវដែលមានហាងទំនិញនិងមនុស្សអ៊ូអរមួយ ក្នុងសង្កាត់លេខ១០ កណ្តាលទីក្រុងប៉ារីស។ យោងតាមសាក្សីជាច្រើន បានអះអាងប្រាប់នគរបាលថា ខ្មាន់កាំភ្លើងបានចូលទៅបាញ់រះ នៅក្នុងមជ្ឈមណ្ឌលវប្បធម៌សហគមន៍ជនជាតិកួក ដែលស្ថិតនៅលើផ្លូវនេះ មុននឹងចេញមកវិញ ហើយបាញ់រះសំដៅទៅលើហាងកាត់សក់មួយកន្លែង។
នគរបាលបារាំងបានមកដល់កន្លែងកើតហេតុភ្លាមៗ និងបានបាញ់ស្ទាក់ចាប់ខ្លួនជនដៃដល់។ ចៅសង្កាត់លេខ១០ ដែលបានមកដល់កន្លែងកើតហេតុ បានប្រាប់អ្នកយកព័ត៌មានថា ជនដៃដល់បានរងរបួសដោយគ្រាប់កាំភ្លើងរបស់សមត្ថកិច្ច។
សមត្ថកិច្ចបារាំង បានបើកការស៊ើបអង្កេត ពីបទមនុស្សឃាតដោយចេតនា និងពីបទធ្វើអំពើហិង្សាធ្ងន់ធ្ងរ។ ផ្អែកតាមប្រភពពីនរគបាលបារាំង ជនដៃដល់ ជាជនជាតិបារាំងមានភេទប្រុស អាយុ៦៩ឆ្នាំ។ ជននេះ គឺជាអតីតអ្នកបើករថភ្លើង ហើយធ្លាប់ត្រូវបានគេដឹងថា ធ្លាប់ធ្វើសកម្មភាពហិង្សា យកដាវទៅប៉ុនប៉ងកាប់សម្លាប់មនុស្ស នៅជំរំជនភៀសខ្លួន ក្នុងសង្កាត់លេខ១២ក្រុងប៉ារីស។ ជនដៃដល់រូបនេះ ជាប់ឈ្មោះក្នុងបញ្ជីខ្មៅ របស់អគ្គនាយកដ្ឋានសន្តិសុខផ្ទៃក្នុងបារាំង ផងដែរ។
ផ្អែកតាមធាតុផ្សំទាំងនេះ បានបញ្ជាក់ថា សកម្មភាពបាញ់រះបង្កឡើងដោយជននេះ ទំនងជាសកម្មភាពហិង្សា រើសអើងប្រកាន់ពូជសាសន៍ ស្អប់ជនអន្តោប្រវេសន៍។ លោក Gérald Darmanin រដ្ឋមន្ត្រីក្រសួងមហាផ្ទៃបារាំង បានលើកឡើងថា ជនដៃដល់ ទំនងជាបានធ្វើសកម្មភាពដ៏ព្រៃផ្សៃនេះ សំដៅសម្លាប់ជនបរទេស។
យោងតាមសកម្មជនកួកម្នាក់ បានប្រាប់អ្នកយកព័ត៌មានថា ក្នុងចំណោមអ្នករបួសទាំង៦នាក់ គឺមានអ្នកចម្រៀងជនជាតិកួកដ៏ល្បីឈ្មោះម្នាក់។ នៅកន្លែងកើតហេតុ ខាងមុខមជ្ឈមណ្ឌលវប្បធម៌កួក សហគមន៍ជនជាតិកួក បានសម្តែងការតក់ស្លុតយ៉ាងខ្លាំង នឹងបានចាត់ទុកដោយគ្មានសង្ស័យថា អំពើបាញ់រះនេះ គឺបានសំដៅមកលើក្រុមជនអន្តោប្រវេសន៍កួកតែម្តង។ យ៉ាងណាមិញ ការប្រទូសរាយរវាងក្រុមសហគមន៍ជនជាតិគួក ជាមួយនឹងសមត្ថកិច្ចនគរបាល បានផ្ទុះឡើងនៅកន្លែងកើតហេតុ ដោយក្រុមជនជាតិកួកបានស្រែកតវ៉ាយ៉ាងខ្លាំង ទាមទារឲ្យសមត្ថកិច្ចបារាំងការពារសុវត្ថិភាព ទប់ស្កាត់អំពើហិង្សារើសអើងប្រកាន់ពូជសាសន៍។ សមត្ថកិច្ចបារាំង បានប្រើគ្រាប់បែកផ្សែង ដើម្បីបំបែកក្រុមបាតុករតវ៉ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ