បារាំង អេស្ប៉ាញ និងព័រទុយហ្កាល់ចាប់ផ្តើមគម្រោងបំពង់បង្ហូរអ៊ីដ្រូសែនបៃតង ទៅកាន់ភាគខាងជើងអឺរ៉ុប
ប្រទេសនៅអឺរ៉ុបបង្កើនការសហការ ដើម្បីធានាការផ្គត់ផ្គង់ថាមពលថ្មី ជំនួសថាមពលរុស្ស៊ី។ នៅថ្ងៃសុក្រ មេដឹកនាំបារាំង អេស្ប៉ាញ និងព័រទុយហ្កាល់ រួមជាមួយ ប្រធានគណៈកម្មការអឺរ៉ុប បានប្រកាសសម្ពោធគម្រោងសាងសង់បំពង់បង្ហូរអ៊ីដ្រូសែន បៃតង សម្រាប់ទៅផ្គត់ផ្គង់ប្រទេសអឺរ៉ុបខាងជើង។ បំពង់បង្ហូរអ៊ីដូ្រសែនបៃតង ក្រោមសមុទ្រ នឹងតភ្ជាប់ពីទីក្រុងបាសឺឡូនភាគខាងជើងរបស់អេស្ប៉ាញ ទៅកាន់ខេត្តម៉ាសីយ៍ ភាគខាងត្បូងប្រទេសបារាំង
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
មានប្រវែង ៤៥៥គីឡូម៉ែត្រ បំពង់បង្ហូរអ៊ីដ្រូសែន ក្រោមសមុទ្រ ត្រូវតភ្ជាប់ពីរោងចក្រផលិតអ៊ីដ្រូសែនបៃតងនៅទីក្រុងបាសឺឡូន របស់អេស្ប៉ាញ ទៅកាន់កន្លែងស្តុកនៅខេត្តម៉ាសីយ៍ប្រទេសបារាំង សម្រាប់ការផ្គត់ផ្គង់នៅអឺរ៉ុបខាងជើង។
តាមការប្រកាសរបស់ប្រធានាធិបតី បារាំង លោកម៉ាក្រុង ដែលធ្វើឡើង នៅក្រោយកិច្ចប្រជុំជាមួយប្រមុខដឹកនាំរដ្ឋាភិបាលអេស្ប៉ាញ និងព័រទុយហ្កាល់ គម្រោងសាងសង់បំពង់បង្ហូរអ៊ីដ្រូសែននឹងចប់សព្វគ្រប់ យ៉ាងយូរបំផុតនៅឆ្នាំ ២០៣០។
គម្រោងសាងសង់ បំពង់បង្ហូរអ៊ីដ្រូសែន ពីអេស្ប៉ាញ និងព័រទុយហ្កាល់ទៅកាន់ទឹកដីបារាំង មានតម្លៃជាទឹកប្រាក់ ២,៥ពាន់លានអឺរ៉ូ។ តាមការបញ្ជាក់របស់នាយករដ្ឋមន្រ្តី អេស្ប៉ាញ បំពង់បង្ហូរក្រោមសមុទ្រពីអេស្ប៉ាញទៅបារាំង នឹងអាចផ្គត់ផ្គង់ អ៊ីដ្រូសែន បៃតង ប្រមាណ ២លានតោន ក្នុងមួយឆ្នាំ ពោល គឺ ១០% នៃតម្រូវការថាមពលសរុបរបស់សហភាពអឺរ៉ុប។
មានឈ្មោះថា H2Med បំពង់បង្ហូរក្រោមសមុទ្រ ពីអេស្ប៉ាញ ទៅខេត្តម៉ាសីយ៍ ដើមឡើយ ត្រូវគ្រោងសាងសង់ឡើង ដើម្បីជំនួសគម្រោងបំពង់បង្ហូរឧស្ម័នMidCat ពីអេស្ប៉ាញ ទៅអឺរ៉ុបខាងជើង ដោយទឹកដីបារាំង។ ប៉ុន្តែ គម្រោងការសាងសង់បំពង់បង្ហូរឧស្ម័នបានរលត់រលាយទៅវិញ ដោយសារការប្រឆាំងរបស់ភាគីបារាំង ក្នុងហេតុផលថា គម្រោងសាងសង់ដែលត្រូវឆ្លងកាត់ តំបន់ភ្នំ Pyrénées អាចប៉ះពាល់ បំផ្លាញបរិស្ថានធ្ងន់ធ្ងរ។
នៅក្រោយសាងសង់ចប់ បំពង់បង្ហូរក្រោមសមុទ្រ H2Med មាននាទីបង្ហូរតែអ៊ីដ្រូសែនតែមួយមុខ ប៉ុន្តែ មិនមែនឧស្ម័នតាមគម្រោងចង់បានពីដើមទី ពោល ដើម្បីឆ្លើយតបនឹងលក្ខខណ្ឌទាមទារ របស់គណៈកម្មការអឺរ៉ុប ដែលជាម្ចាស់ជំនួយហិរញ្ញវត្ថុ មួយផ្នែករបស់គម្រោង។
មានវត្តមាននៅក្នុងជំនួបប្រជុំជាមួយមេដឹកនាំបារាំង អេស្ប៉ាញ និងព័រទុយហ្កាល់ ប្រធានគណៈកម្មការអឺរ៉ុប លោកស្រី វ៉ុលឌែរឡេយេន បាននិយាយស្វាគមចាត់ទុក គម្រោងសាងសង់ ពីអេស្ប៉ាញ ទៅបារាំង ថាកំពុងដើរនៅលើផ្លូវដ៏ត្រឹមត្រូវមួយ ព្រោះវាជួយឲ្យអឺរ៉ុបមានបំពង់បង្ហូរអ៊ីដ្រូសែន ដែលជាប្រភពថាមពលស្អាតស្អំ។
អ៊ីដ្រូសែនបៃតង ជាប្រភេទអ៊ីដ្រូសែនដែលផលិតចេញពីអេឡិចត្រូលីស និងដោយប្រើថាមពលអគ្គិសនីដែលមានប្រភពចេញពីថាមពលបៃតង ដូចជាផ្ទាំងសូឡា និងវាយោអគ្គិសនី។ ប្រភេទអ៊ីដ្រូសែនបៃតងដែលមិនបញ្ចេញឧស្ម័នកាបូនិក អាចជាដំណោះស្រាយជួយទប់ស្កាត់ការឡើងកម្តៅផែនដី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ