អង្គការសហប្រជាជាតិព្រួយបារម្ភពីការរើសអើងប្រកាន់ពូជសាសន៍នៅបារាំង
សន្ធឹកនៃការប្រើសំដីបែបរើសអើងពូជសាសន៍ នៅក្នុងប្រទេសបារាំង កំពុងធ្វើឱ្យគណៈកម្មការអង្គការសហប្រជាជាតិព្រួយបារម្ភយ៉ាងខ្លាំង។ បើតាមគណៈកម្មការទោះបីជាអាជ្ញាធរបានប្រឹងប្រែងយ៉ាងខ្លាំងក៏ដោយ ក៏មិនអាចសម្រេចកម្មវត្ថុលុបបំបាត់ការរើសអើងពូជសាសន៍បានដែរ។
ចុះផ្សាយនៅថ្ងៃ៖
ស្តាប់ - ០១:៤៥
ការរើងអើង ការប្រកាន់ពូជសាសន៍ នៅក្នុងប្រទេសបារាំង នៅតែមានទំហំធំគួរឱ្យព្រួយបារម្ភ ជាពិសេសនៅតាមបណ្តាញឃោសនាព័ត៌មាននិងអ៊ីនធ័រនែត។ គណៈកម្មការលុបបំបាត់ការរើងអើងពូជសាសន៍អង្គការសហប្រជាជាតិ (Cerd) ក៏ព្រួយបារម្ភខ្លាំងដែរចំពោះភាសានយោបាយបែបប្រកាន់ពូជសាសន៍របស់អ្នកទទួលខុសត្រូវនយោបាយខ្លះ ទៅលើក្រុមជនជាតិភាគតិច ជាពិសេសជនជាតិរ៉ូម អ្នកពនេចរ អ្នកមានកំណើត ជីដូនជីតាមកពីអាហ្វ្រិក និងដើមកំណើតអារ៉ាប់។ ក្រៅអំពីសំដីបែបរើសអើង គណៈកម្មការ ខ្វល់មួយទៀតនឹងការដាក់ជនជាតិភាគតិចរ៉ូម និងក្រុមពនេចរ ឱ្យនៅក្រៅសង្គម និងរស់ក្នុងភាពក្រីក្រគួរឱ្យអាសូរ។
អំពើហិង្សាប៉ូលិស និងជម្រើសឆែកអត្តសញ្ញាណ ឬឃាត់ខ្លួនឆែកឆេរ បែបរើសមុខ រើសពណ៌សម្បុរ ដៅលើតែអ្នកមិនមែនជនជាតិបារាំង ក៏ត្រូវបានគណៈកម្មការយល់ថាជាចំណាត់ការហួសហេតុ និងមានបង្កប់ទម្រង់រើសអើងពូជសាសន៍ដែរ។
បើតាមអ្នកជំនាញឯករាជ្យទាំង១៨រូបរបស់គណៈកម្មការ ដែលតែងតែចុះត្រួតពិនិត្យជាប្រចាំ នយោបាយបារាំងចំពោះជនជាតិភាគតិច រដ្ឋាភិបាលបារាំងមានឆន្ទៈនិងភាពម៉ឺងមាត់នយោបាយ ប្រយុទ្ធប្រឆាំងនឹងការរើសអើងពូជសាសន៍គ្រប់ទម្រង់ តែប្រយុទ្ធមិនឈ្នះ។ ហេតុដូច្នេះហើយបានជាគណៈកម្មការចេញអនុសាសន៍ឱ្យបារាំងបង្កើនការខិតខំប្រឹងប្រែងទ្វេឡើង ក្នុងការការពារនិងប្រយុទ្ធប្រឆាំងប្រកបដោយប្រសិទ្ធភាពរាល់គ្រប់ទម្រង់នៃការរើសអើង ដោយអនុវត្តច្បាប់និងដាក់ទណ្ឌកម្មរាល់គ្រប់សកម្មភាពរើសអើង និងការប្រកាន់ពូជសាសន៍នៅតាមទីសាធារណៈ ជាពិសេសនៅតាមប្រព័ន្ធផ្សព្វផ្សាយព័ត៌មាននិងអ៊ីនធ័រនែត។
អ្នកជំនាញក៏បានស្នើសុំឱ្យបារាំង បញ្ចូលក្នុងច្បាប់នូវនិយមន័យនិងការហាមឃាត់ការធ្វើប្រវត្តិរូបបែបប្រកាន់ពូជសាសន៍និងជាតិកំណើត ព្រមទាំងផ្ទៀងផ្ទាត់មើលបទបញ្ជាសម្រាប់ឱ្យកងកម្លាំងប៉ូលិស ឬកងសមត្ថកិច្ចអនុវត្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ