រុស្ស៊ីឆេះដុំ ក្រោយប៉ូឡូញហាមឃាត់មិនឲ្យលោក ស៊ែរហ្កី ឡាវរ៉ូវ ទៅប្រជុំOSCE នៅប៉ូឡូញ
លោករដ្ឋមន្ត្រីការបរទេសរុស្ស៊ី ស៊ែរហ្កី ឡាវរ៉ូវ ត្រូវបានរដ្ឋាភិបាលប៉ូឡូញ ហាមឃាត់មិនឲ្យជាន់ដីប៉ូឡូញទេ។ លោកនឹងមិនអាចទៅចូលរួម ការប្រជុំក្របខណ្ឌរដ្ឋមន្ត្រីការបរទេស នៃអង្គការដើម្បីសន្តិសុខ និងសហប្រតិបត្តិការអឺរ៉ុប ហៅកាត់ថា OSCE ដែលគ្រោងធ្វើនៅប្រទេសប៉ូឡូញ ដើមខែធ្នូខាងមុខនេះទេ។ ការសម្រេចនេះ ត្រូវបានក្រសួងការបរទេសរុស្ស៊ីប្រកាដថ្កោលទោសភ្លាមៗ ដោយបានចាត់ទុកថា ជាទង្វើរករឿងមកលើរុស្ស៊ី និងបំផ្លាញតួនាទីការងារ របស់អង្គការ OSCE។
ចុះផ្សាយនៅថ្ងៃ៖
ស្តាប់ - ០២:៣២
កិច្ចប្រជុំថ្នាក់រដ្ឋមន្ត្រីការបរទេស នៃប្រទេសសមាជិកទាំង៥៧ របស់អង្គការដើម្បីសន្តិសុខ និងសហប្រតិបត្តិការអឺរ៉ុប ហៅកាត់ថា OSCE នឹងត្រូវរៀបចំធ្វើនៅថ្ងៃទី១ធ្នូ នៅទីក្រុង Lodz ប្រទេសប៉ូឡូញ ដោយមានប៉ូឡូញជាប្រធានវិលជុំ ជាអ្នករៀបចំ។ តែរដ្ឋាភិបាលប៉ូឡូញ ទើបតែបានប្រកាសឲ្យដឹងថា លោក ស៊ែរហ្កី ឡាវរ៉ូវ រដ្ឋមន្ត្រីការបរទេសរុស្ស៊ី នឹងមិនត្រូវបានអនុញ្ញាតឲ្យជាន់ដីប៉ូឡូញជាដាច់ខាត។ ដូច្នេះ រដ្ឋាភិបាលរុស្ស៊ី ត្រូវតែបញ្ជូនឈ្មោះមនុស្សផ្សេងទៀត ឲ្យមកចូលរួមក្នុងកិច្ចប្រជុំនេះ។
ប្រភពពីរដ្ឋាភិបាលប៉ូឡូញ បានប្រាប់អ្នកកាសែតបារាំងAFP ថា រដ្ឋាភិបាលរុស្ស៊ីអាចបញ្ជូនតំណាងមកចូលរួមបាន គឺទាល់តែជននោះ មិនមានជាប់ឈ្មោះនៅក្នុងបញ្ជីទណ្ឌកម្ម ដែលសហភាពអឺរ៉ុបបានដាក់ទៅលើរុស្ស៊ី បន្ទាប់ពីរុស្ស៊ីបានលើកទ័ពធ្វើសង្គ្រាមឈ្លានពានអ៊ុយក្រែន។ យោងតាមបញ្ជីនេះ គឺលោកស៊ែរហ្កី ឡាវរ៉ូវ មានឈ្មោះជាប់ទណ្ឌកម្ម មិនអាចចូលជាន់ទឹកដីសហភាពអឺរ៉ុប បានជាដាច់ខាត។
ក្រោយការប្រកាសរបស់រដ្ឋាភិបាលប៉ូឡូញ ក្រសួងការបរទេសរុស្ស៊ីបានចេញលិខិតប្រកាស ថ្កោលទោសភ្លាមៗ នៅរសៀលថ្ងៃសៅរ៍ទី១៩វិច្ឆិកា ដោយបានចាត់ទុកការសម្រេចរបស់ប៉ូឡូញ ថាកាយវិការរករឿង បង្កជម្លោះជាមួយរុស្ស៊ី។ លិខិតដដែលនេះ បន្ថែមថា មិនត្រឹមប៉ុណ្ណោះទេ ការសម្រេចរបស់ប៉ូឡូញ បានមកបំផ្លាញដល់តួនាទីការងារ នឹងដំណើរការទូទៅរបស់អង្គការដើម្បីសន្តិសុខ និងសហប្រតិបត្តិការអឺរ៉ុប ធ្វើឲ្យអង្គការនេះ ក្លាយជាវេទិកាបក្សពួក ប្រឆាំងនឹងរុស្ស៊ី។ យ៉ាងណាក៏ដោយ ក្រសួងការបរទេសរុស្ស៊ីបញ្ជាក់ថា លោកឯកអគ្គរដ្ឋទូតរុស្ស៊ីប្រចាំអង្គការ OSCE នឹងដឹកនាំគណៈប្រតិភូ ចូលរួមកិច្ចប្រជុំនៅថ្ងៃទី១ និងទី២ធ្នូខាងមុខនៅប៉ូឡូញ។
សូមរំលឹកថា អង្គការដើម្បីសន្តិសុខ និងសហប្រតិបត្តិការអឺរ៉ុប ដែលមានសមាជិក៥៧ប្រទេស គឺត្រូវបានបង្កើតឡើងនៅឆ្នាំ១៩៧៥ ក្នុងបរិបទសង្គ្រាមត្រជាក់។ អង្គការដែលមានទីតាំងស្នាក់ការកណ្តាលនៅទីក្រុងវីយែនប្រទេសអូទ្រីសនេះ មានកម្មវត្ថុ បង្កើតបរិយាកាសនិយាយប្រាស័្រយទាក់ទងគ្នា រវាងគូបដិបក្សទាំង២ គឺក្រុមប្រទេសអឺរ៉ុបខាងលិច និងក្រុមអឺរ៉ុបខាងកើត។ កិច្ចប្រជុំថ្នាក់រដ្ឋមន្ត្រីការបរទេសប្រចាំឆ្នាំ គឺជាគ្រោងឆ្អឹងដ៏សំខាន់របស់OSCE។ ស្ថិតក្នុងបរិបទសង្គ្រាមនៅអ៊ុយក្រែន អង្គការនេះត្រូវបានគេសង្ឃឹមថាជាមធ្យោបាយមួយ ដើម្បីញ៉ាំងឲ្យមានទំនាក់ទំនងនិយាយគ្នា រវាងរុស្ស៊ី និងក្រុមប្រទេសលោកខាងលិច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ