អាល្លឺម៉ង់ចង់សើរើគម្រោងសង់បំពង់បង្ហូរឧស្ម័នចេញពីអេស្ប៉ាញ ទៅបារាំង
ប៉ះពាល់ផ្ទាល់ខ្លាំងជាងគេបន្ទាប់ពី រុស្ស៊ី ប្រកាសបន្តបិទបំពង់បង្ហូរឧស្ម័ន North Stream 1 កាលពីថ្ងៃសៅរ៍ ទី ៣កញ្ញា អាល្លឺម៉ង់ចង់ឲ្យគេសើរើឡើងវិញ គម្រោងសាងសង់បំពង់បង្ហូរឧស្ម័ន ដែលតចេញពីទឹកដីអេស្ប៉ាញ ចូលទៅក្នុងប្រទេសបារាំង។ អេស្ប៉ាញដែលនាំចូលឧស្ម័នអាល់ហ្សេរី និងជាកន្លែងទទួលស្តុកឧស្ម័នធម្មជាតិពង្រាវ នាំចូលពីអាមេរិក កាតា និងនីហ្សេរីយ៉ា ឯកភាពជាមួយ អាល្លឺម៉ង់ ប៉ុន្តែ មកត្រូវប្រទះនឹងជំហរប្រឆាំងរបស់ភាគីបារាំង។
ចុះផ្សាយនៅថ្ងៃ៖
ស្តាប់ - ០២:២៧
ក្រុមហ៊ុនរុស្ស៊ី Gazprom មិនបានបើកបង្ហូរបំពង់ឧស្ម័នNorth Stream1 នៅថ្ងៃសៅរ៍ទី ៣ កញ្ញា ទៅតាមការសន្យារបស់ខ្លួន ក្នុងហេតុផល មានលេចហូរប្រេងក្នុងបំពង់តួរប៊ីន នៅបំពង់បង្ហូរប្រេង ក្នុងទឹកដីរុស្ស៊ី។
លែងជឿជាក់លើរុស្ស៊ី ដែលរងការចោទប្រកាន់ថា បានយកប្រេង និងឧស្ម័នមកធ្វើជាអាវុធធ្វើសង្រ្គាម សហភាពអឺរ៉ុប ជាពិសេស អាល្លឺម៉ង់ ដែលពឹងផ្អែកខ្លាំងជាងគេលើថាមពលប្រេង និងឧស្ម័នរបស់រុស្ស៊ី បានស្វែងរកប្រភពផ្គត់ផ្គង់ថ្មី។
ថ្មីៗនេះ ប្រមុខរដ្ឋាភិបាលអាល្លឺម៉ង់បានលើកឡើងជាញយដងពីជំហរគាំទ្ររបស់អាល្លឺម៉ង់សម្រាប់គម្រោងសាងសង់បំពង់បង្ហូរឧស្ម័នពីអេស្ប៉ាញទៅបារាំង ដែលមានឈ្មោះថា Midcat។ បង្កើតឡើងនៅឆ្នាំ ២០១៩ គម្រោងMidcat ផ្តោតលើការសាងសង់បំពង់បង្ហូរឧស្ម័នប្រវែង ១៩០គីឡូម៉ែត្រ ដែលតភ្ជាប់ពីខេត្តកាតាឡូញរបស់អេស្ប៉ាញ ទៅខេត្តភាគខាងត្បូងរបស់បារាំង។ អេស្ប៉ាញ មានគម្រោងចង់ប្រើបំពង់បង្ហូរឧស្ម័នMidcat សម្រាប់បញ្ជូនឧស្ម័នដែលនាំចូលមកពី អាល់ហ្សេរី និងឧស្ម័នធម្មជាតិពង្រាវផ្សេងទៀត ដែលទិញនាំចូលពីកាតា អាមេរិក និងស្តុកទុកនៅអេស្ប៉ាញ ទៅកាន់បណ្តាប្រទេស នៅភាគខាងជើងអឺរ៉ុប ដូចជាអាល្លឺម៉ង់ជាដើម។
ប៉ុន្តែ គម្រោងសាងសង់បំពង់បង្ហូរឧស្ម័ន Midcat ត្រូវបានកប់ចោលទៅវិញ នៅឆ្នាំ ២០១៩ ដោយសារបារាំងដែលជាភាគីពាក់ព័ន្ធ ប្រឆាំង ក្នុងហេតុផលថា គម្រោងការ Midcatមិនសូវផ្តល់ប្រយោជន៍ច្រើន ប៉ុន្តែ ផ្ទុយទៅវិញ បានប៉ះពាល់ធ្ងន់ធ្ងរដល់ផ្នែកបរិស្ថាន ក្នុងទឹកដីបារាំង។
អេស្ប៉ាញបានលើកយកហេតុផលសង្រ្គាមអ៊ុយក្រែនថា ជាអ្នកធ្វើឲ្យស្ថានការណ៍ប្រែប្រួលខុសពីមុន។ បន្ទាប់ពីរុស្ស៊ីផ្អាក បិទបំពង់បង្ហូរឧស្ម័ន មួយលើក ជាពីរលើក អេស្ប៉ាញ ចង់បញ្ចុះបញ្ចូលសហភាពអឺរ៉ុបឲ្យដាក់សម្ពាធលើរដ្ឋាភិបាលបារាំង ដើម្បី សើរើគម្រោងMidcat ឡើងវិញ។ នៅក្នុងទស្សនកិច្ចទៅកាន់ទីក្រុងប៊ែរឡាំងកាលពីសប្តាហ៍មុន នាយករដ្ឋមន្រ្តីអេស្ប៉ាញបានទទួលការគាំទ្រពីនាយករដ្ឋមន្រ្តីអាល្លឺម៉ង់ លោកអូឡាហ្វ ស្ហុល៍ ដែលសង្កត់ធ្ងន់ថា គេកំពុងខ្សត់ ខ្វះឧស្ម័នខ្លាំងមែនទែន នៅពេលនេះ។
នៅថ្ងៃសៅរ៍ទី ៣ កញ្ញា រដ្ឋមន្រ្តីបារាំង លោកBruno Le Maire បានបញ្ជាក់សាជាថ្មីថា គម្រោងសាងសង់ បំពង់បង្ហូរឧស្ម័នពីអេស្ប៉ាញ មកបារាំងមិនមែនជាអាទិភាព នោះទេ។ ម្យ៉ាងសម្រាប់ភាគីបារាំង គម្រោងMidcat ដែលត្រូវការពេលវេលាសាងសង់ ពី ៥ទៅ ១០ឆ្នាំ នឹងមិនអាចជួយដោះស្រាយវិបត្តិខ្វះថាមពល ដែលកើតឡើងដោយសារសង្រ្គាមរុស្ស៊ីឈ្លានពានអ៊ុយក្រែន នោះទេ។
រដ្ឋមន្រ្តីផ្នែកថាមពលរបស់អេស្ប៉ាញវិញ បានដំឡើងសំឡេង និងទាមទារឲ្យមានសាមគ្គីភាពគ្នា រវាងប្រទេសសមាជិកសហភាពអឺរ៉ុប។ សម្រាប់រដ្ឋមន្រ្តីអេស្ប៉ាញ លោកស្រី Teresa Ribera គម្រោងMidcatមិនមែនពាក់ព័ន្ធ តែបារាំង និងអេស្ប៉ាញ ប៉ុន្តែ វាជារឿងផលប្រយោជន៍របស់សហភាពអឺរ៉ុប ទាំងមូល ដែលកំពុងប្រឈមនឹងការខ្វះខាត និងតម្លៃថាមពលឡើងថ្លៃ ដោយសាររុស្ស៊ីបិទបំពង់បង្ហូរឧស្ម័ន North Stream1៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ