ជិះកង់ជិតៗជំនួសឡាន អាចកាត់បន្ថយឧស្ម័នកាបូនិកបានរាប់លានតោន
ពិភពលោកអាចកាត់បន្ថយឧស្ម័នពុលកាបូនិកCO2 បានប្រមាណជិត៧០០លានតោនក្នុងមួយឆ្នាំ (ស្មើនឹងបរិមាណនៃការបញ្ចេញផ្សែងពុលប្រចាំឆ្នាំរបស់ប្រទេសកាណាដាមួយទាំងមូល) ប្រសិនបើគ្រប់គ្នាកុំប្រើឡាន ហើយនាំគ្នាធ្វើដំណើរប្រចាំថ្ងៃ ទៅទីជិតៗ ដោយជិះកង់ដូចពលរដ្ឋហូឡង់។ នេះបើតាមការសិក្សាដែលមានចុះផ្សាយនៅក្នុងទស្សនាវដ្តីCommunication Earth and Environment។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២១
ឧស្ម័នផ្ទះកញ្ចក់ដែលជាប់ចោទជាដើមហេតុបង្កឱ្យមានការប្រែប្រួលអាកាសធាតុនិងឡើងកម្តៅនៃភពផែនដី ចំនួនមួយភាគបួន ជាផ្សែងពុលបញ្ចេញដោយវិស័យដឹកជញ្ជូន និងដែលពាក់កណ្តាលជាផ្សែងឡាន។ ហើយពិភពលោក ត្រូវការយានយន្ត (ឡាន) កើនឡើងមួយជាបី នៅពាក់កណ្តាលសតវត្សរ៍។ ប្រទេសនីមួយៗ តាមដានតួលេខនៃការលក់ឡាន យ៉ាងជាប់ស្អិត និងមិនសូវចាប់អារម្មណ៍នឹងទីផ្សារលក់កង់។
ក្នុងខណៈដែលពិភពលោកផ្ចង់គំនិតផលិតឡានអគ្គីសនី ដើម្បីជួយផែនដី មានអ្នកស្រាវជ្រាវអន្តរជាតិមួយក្រុម បានចងក្រងប្រមូលទិន្នន័យនៃការលក់និងប្រើប្រាស់កង់ នៅលើពិភពលោក ក្នុង៦០ប្រទេសតាំងពីឆ្នាំ១៩៦០មក ដើម្បីសិក្សាអំពីតួនាទីរបស់កង់ក្នុងការកាត់បន្ថយការបញ្ចេញឧស្ម័នពុលកាបូនិក ក្នុងវិស័យដឹកជញ្ជូន។
បើតាមអ្នកស្រាវជ្រាវ ដែលដឹកនាំដោយលោក Gang Liu សាស្ត្រាចារ្យនៅដេប៉ាតឺម៉ង់បច្ចេកវិទ្យាបៃតងនៃសាកលវិទ្យាល័យដាណឺម៉ាកខាងត្បូង នៅអំឡុងពេលពីឆ្នាំ១៩៦២ដល់ឆ្នាំ២០១៥ ពិភពលោកផលិតកង់ច្រើនជាងឡាន។ ក្នុងចំណោមកង់ផលិតបានចំនួន១២៣លាននៅឆ្នាំ២០១៥ ជិតពីរភាគបីធ្វើនៅប្រទេសចិន។ តែការប្រើប្រាស់កង់ជាមធ្យោបាយធ្វើដំណើរ មានកំរិតត្រឹមតែប្រមាណ៥%ប៉ុណ្ណោះជាមធ្យម។ សហរដ្ឋអាមេរិក មានកង់ច្រើនខ្លាំងណាស់ ប៉ុន្តែម្ចាស់ម្នាក់ៗ មានទំនោរប្រើកង់ជាការកំសាន្ត ច្រើនជាងប្រើជាមធ្យោបាយធ្វើដំណើរ។ ទៅណាបន្តិចបន្តួច ទោះជិតៗក៏ដោយ ក៏ពលរដ្ឋអាមេរិកជិះឡានដែរ។
ប្រសិនបើមនុស្សម្នាគ្រប់រូប ប្តូរទម្លាប់មក ជិះកង់ ពេលត្រូវការធ្វើដំណើរជិតៗ ជាមធ្យមតែ១៦០០ម៉ែត្រ ក្នុងមួយថ្ងៃ ពោលគឺដូចទម្លាប់របស់ប្រជាពលរដ្ឋដាណឺម៉ាក នោះពិភពលោកអាចកាត់បន្ថយការបញ្ចេញឧស្ម័នផ្ទះកញ្ចក់ CO2 បានប្រមាណ ៤១៤លានតោនក្នុងមួយឆ្នាំ គឺស្មើនឹងបរិមាណឧស្ម័នកាបូនិកបញ្ចេញ ប្រទេសអង់គ្លេសមួយទាំងមូល។ នេះបើតាមការគណនារបស់ក្រុមអ្នកស្រាវជ្រាវដដែល។ បើធ្វើដំណើរ ដោយជិះកង់ជាមធ្យម២៦០០ម៉ែត្រ ក្នុងមួយថ្ងៃ ដូចពលរដ្ឋហូឡង់ នោះគេអាចបន្ថយឧស្ម័នពុលបាន ៦៨៦លានតោនក្នុងមួយឆ្នាំ។ ថយឧស្ម័នពុលហើយ គេនឹងបានទទួលគុណប្រយោជន៍យ៉ាងច្រើនចំពោះសុខភាពនិងធ្វើឱ្យគុណភាពនៃខ្យល់បរិយាកាសបានប្រសើរឡើងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ