OMS/WHO រំពឹងថា នឹងមានករណីអ្នកជំងឺអុតស្វាស្លាប់ច្រើននាក់ទៀត នៅអឺរ៉ុប
កាលពីថ្ងៃសៅរ៍ទី៣០កក្កដា អាជ្ញាធរសុខាភិបាលអេស្ប៉ាញ បានប្រកាសថាមានករណីស្លាប់អ្នកជំងឺអុតស្វាម្នាក់ទៀត។ គិតត្រឹមពេលនេះ គឺមានអ្នកជំងឺអុតស្វា ស្លាប់៣នាក់ហើយក្រៅទ្វីបអាហ្វ្រិក ក្នុងនោះ២នាក់នៅអេស្ប៉ាញ និង១នាក់នៅប្រេស៊ីល។ ដោយចំនួនអ្នកឆ្លងប្រមាណ៧០%ស្ថិតនៅទ្វីបអឺរ៉ុប មន្ត្រីអង្គការសុខភាពពិភពលោកប្រចាំតំបន់នេះ បានលើកឡើងថា គេរំពឹងថា នឹងមានអ្នកជំងឺអុតស្វា ស្លាប់ច្រើននាក់បន្ថែមទៀត នៅអឺរ៉ុប។
ចុះផ្សាយនៅថ្ងៃ៖
ស្តាប់ - ០២:២២
លោកស្រី Catherine Smallwood ប្រធានការិយាល័យអឺរ៉ុប នៃអង្គការសុខភាពពិភពលោក បានបញ្ជាក់នៅរសៀលថ្ងៃទី៣០កក្កដាថា គេរំពឹងថា នឹងមានមនុស្សស្លាប់ច្រើននាក់ទៀតនៅអឺរ៉ុប ដែលពាក់ព័ន្ធនឹងមេរោគជំងឺអុតស្វា។ ការលើកឡើងបែបនេះ គឺបន្ទាប់ពីអាជ្ញាធរសុខាភិបាលអេស្ប៉ាញ បានប្រកាសថាមានករណីស្លាប់២នាក់នៅក្នុងប្រទេសខ្លួន ចន្លោះពីថ្ងៃ២៩ និងថ្ងៃ៣០កក្កដា។
គួរបញ្ជាក់ថា គិតមកត្រឹមពេលនេះ មានគេបានរកឃើញករណីឆ្លងជំងឺអុតស្វា ចំនួន១៨០០០ករណី នៅក្រៅអាហ្វ្រិក។ ៧០%នៃករណីឆ្លង គឺមានផ្តុំនៅអឺរ៉ុប ដែលក្នុងនោះនៅអេស្ប៉ាញមានច្រើនលើសគេ ចំនួនសរុបប្រមាណ៤៣០០ករណី។ អាជ្ញាធរអេស្ប៉ាញ លើកឡើងថាបច្ចុប្បន្នមានអ្នកជំងឺអុតស្វា កំពុងសម្រាកព្យាបាលនៅមន្ទីរពេទ្យ ចំនួន១២០នាក់។
លោកស្រី Catherine Smallwood បានលើកឡើងថា ដោយយោងទៅលើសន្ទុះនៃការឆ្លងរាលដាលនៅអឺរ៉ុប យ៉ាងលឿនរហ័សនេះ គឺប្រទេសអឺរ៉ុបត្រូវតែចាត់វិធានការបន្ទាន់ ដើម្បីកាត់ផ្តាច់ការឆ្លងរាលដាលមេរោគនេះ ឲ្យខាងតែបាន។ ទន្ទឹមគ្នានេះ លោកស្រីបានបញ្ជាក់ថា ជាទូទៅអ្នកឆ្លងមេរោគជំងឺអុតស្វា អាចជាសះស្បើយវិញដោយខ្លួនឯង តែអាចមានករណីកម្រមួយចំនួន ដែលឈានដល់ធ្ងន់ធ្ងរ ហើយត្រូវបញ្ជូនទៅសង្រ្គោះនៅមន្ទីរពេទ្យ។
គិតពីខែឧសភា ដល់ថ្ងៃទី៣០កក្កដា នៅទូទាំងពិភពលោកមានអ្នកផ្ទុកមេរោគជំងឺអុតស្វា ចំនួន៨នាក់ហើយ ដែលបានស្លាប់ ក្នុងនោះ៥នាក់នៅទ្វីបអាហ្វ្រិក។ ៣នាក់ទៀត ដែលស្លាប់ក្រៅអាហ្វ្រិក គឺមាន២នាក់នៅអេស្ប៉ាញ និង១នាក់នៅប្រេស៊ីល។ ដោយគ្រាន់តែប្រាប់ថាអ្នកស្លាប់ទាំង២នាក់ មានភេទប្រុសវ័យក្មេង អាជ្ញាធរអេស្ប៉ាញ មិនបានបញ្ជាក់លំអិតទេ ថាអ្នកជំងឺអុតស្វាទាំង២នាក់នោះ ស្លាប់ដោយសារមូលហេតុអ្វីពិតប្រាកដ។ មន្ត្រីជំនាញកំពុង រងចាំលទ្ធផលកោសលវិច័យ។ ដោយឡែក នៅប្រទេសស៊ីល អាជ្ញាធរសុខាភិបាលបានបញ្ជាក់ថា អ្នកជំងឺមានជំងឺមហារីក និងមានសុខភាពចុះទ្រុឌទ្រោមខ្លាំង។
បារាំង ក៏ដូចជាបណ្តាប្រទេសអឺរ៉ុបផ្សេងទៀត បានចាប់ផ្តើមបើកយុទ្ធនាការចាក់វ៉ាក់សាំង បង្ការការឆ្លងរាលដាលមេរោគនេះ។ យោងតាមអ្នកជំនាញ មេរោគជំងឺអុតស្វា អាចឆ្លងពីមនុស្សម្នាក់ទៅមនុស្សម្នាក់បាន តាមរយៈការប៉ះពាល់ដោយផ្ទាល់ ជាមួយស្នាមមុខរបួស កន្តួលពងបែក ឬក៏ប៉ះជាមួយសម្លៀកបំពាក់ ក្រណាត់កម្រាល ដែលមានប្រឡាក់ស្នាមឈាម ឬទឹករងៃរបស់អ្នកផ្ទុកមេរោគ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ