អុតស្វា៖ អេស្ប៉ាញ និងប្រេស៊ីល ប្រកាសពីករណីស្លាប់អ្នកជំងឺអុតស្វា ជាលើកទីមួយ នៅក្រៅទ្វីបអាហ្វ្រិក
កាលពីថ្ងៃសុក្រ ទី២៩កក្កដា អាជ្ញាធរសុខាភិបាលអេស្ប៉ាញ និងប្រេស៊ីល បានប្រកាសថាមានអ្នកជំងឺអុតស្វា ចំនួន១នាក់ បានស្លាប់នៅក្នុងប្រទេសគេរៀងៗខ្លួន។ នេះគឺជាករណីស្លាប់លើកទី១ហើយ នៅក្រៅទ្វីបអាហ្វ្រិក ដែលជាតំបន់ដើមកំណើតមេរោគជំងឺអុតស្វា។ តែយ៉ាងណា មិនមានការបញ្ជាក់ឲ្យច្បាស់ទេ ថាអ្នកជំងឺដែលស្លាប់នៅអេស្ប៉ាញ និងនៅប្រេស៊ីលនោះ គឺស្លាប់ដោយសារតែមេរោគជំងឺអុតស្វានេះ ឬដោយសារបញ្ហាសុខភាពផ្សេងទៀត។
ចុះផ្សាយនៅថ្ងៃ៖
ស្តាប់ - ០២:៤៤
បុរសម្នាក់អាយុ៤១ឆ្នាំ ដែលមានផ្ទុកមេរោគជំងឺអុតស្វា បានស្លាប់នៅរដ្ឋ Minas Gerais ប្រទេសប្រេស៊ីល។ យោងតាមលោករដ្ឋលេខាធិការទទួលបន្ទុកសុខភាពប្រចាំរដ្ឋនេះ គឺអ្នកជំងឺរូបនេះ បានសម្រាកព្យាបាលនៅមន្ទីរពេទ្យ ដោយសារមានជំងឺមហារីក ហើយមានសុខភាពចុះទ្រុឌទ្រោមខ្លាំង។ ដោយឡែកនៅអេស្ប៉ាញវិញ រដ្ឋមន្ត្រីសុខាភិបាលបានប្រកាសកាលពីថ្ងៃសុក្រ ថាមានករណីស្លាប់អ្នកផ្ទុកមេរោគជំងឺអុតស្វាម្នាក់ដែរ តែដោយមិនបានបញ្ជាក់ពីមូលហេតុលំអិតនៃការស្លាប់ ព្រមទាំងកាលបរិច្ឆេទទេ។
គួរបញ្ជាក់ថា ករណីស្លាប់អ្នកផ្ទុកមេរោគជំងឺអុតស្វា ទាំង២ករណីនៅប្រេស៊ីលនិងអេស្ប៉ាញនេះ គឺជាករណីស្លាប់ដំបូងគេបង្អស់ ក្រៅទ្វីបអាហ្វ្រិក ជាទីដែលមេរោគនេះត្រូវបានគេប្រទះឃើញ ឆ្លងទៅដល់មនុស្សនៅឆ្នាំ១៩៧០។កាលពីថ្ងៃទី២៤កក្កដា អង្គការសុខភាពពិភពលោក បានប្រកាសចាត់ទុកជំងឺអុតស្វា ជាបញ្ហាអាសន្ននៃសុខភាពសាធារណៈកម្រិតអន្តរជាតិ។ គិតមកត្រឹមពេលនេះ គេបានរកឃើញករណីឆ្លងជំងឺនេះ ចំនួនប្រមាណ១៨០០០ករណី តាមបណ្តាប្រទេសចំនួន៧៨ ក្រៅទ្វីបអាហ្វ្រិក។ ក្នុងនោះ ៧០% ស្ថិតនៅអឺរ៉ុប និងប្រមាណ២៥%នៅទ្វីបអាមេរិក។
អេស្ប៉ាញ ដែលមានករណីឆ្លងដល់ទៅ ៤២៩៨ករណី គឺជាប្រទេសអឺរ៉ុបដែលមានអ្នកផ្ទុកមេរោគអុតស្វា ច្រើនជាងគេ។ ដោយឡែកនៅបារាំង គិតត្រឹមថ្ងៃសុក្រទី២៩កក្កដា មានករណីឆ្លងអុតស្វា ចំនួនជិត២០០០ករណី។ អាជ្ញាធរសុខាភិបាលបារាំង បានចាប់ផ្តើមបើកយុទ្ធនាការចាក់វ៉ាក់សាំងបង្ការ ភាគច្រើននៅក្នុងតំបន់ជុំវិញទីក្រុងបារីស ជាទីដែលគេរកឃើញករណីឆ្លងថ្មី ច្រើនបំផុត ប្រមាណ៦០ ទៅ៧០ករណីជារៀងរាល់ថ្ងៃ។
យោងតាមអង្គការសុខភាពពិភពលោក ក្នុងចំណោមអ្នកឆ្លងមេរោគនេះ ភាគច្រើនលើសលុប គឺជាមនុស្សប្រុសវ័យក្មេង ដែលស្រលាញ់ភេទដូចគ្នា។ អាការៈជំងឺនេះ គឺមានជាអាទិ៍ គ្រុនក្តៅខ្លួនខ្លាំង ឡើងកូនកណ្តុរ និងចេញកន្តួលរមាស់ពងបែកលើស្បែក ដូចជំងឺអុតស្វាយ ឬកញ្ជ្រិលជាដើម។ យោងតាមអ្នកជំនាញ មេរោគជំងឺអុតស្វា មិនឆ្លងតាមរយៈការរួមភេទទេ តែវាឆ្លងតាមរយៈការប៉ះពាល់ដោយផ្ទាល់ ទៅនឹងមុខរបួស ស្នាមកន្ទួល ឬក៏តាមរយៈការប៉ះពាល់ជាមួយសម្លៀកបំពាក់ ឬកម្រាលក្រណាត់ ដែលមានប្រឡាក់ឈាម ឬទឹករងៃរបស់អ្នកផ្ទុកមេរោគ។
លោកអគ្គលេខាធិការអង្គការសុខភាពពិភពលោក បានអំពាវនាវ ឲ្យក្រុមមនុស្សស្រលាញ់ភេទដូចគ្នា កាត់បន្ថយដៃគូរួមភេទ ដើម្បីកាត់បន្ថយហានិភ័យនៃការឆ្លង តែទន្ទឹមគ្នានេះ លោកបានអំពាវនាវ កុំឲ្យមានការចោទប្រកាន់រើសអើង ទៅលើក្រុមអ្នកស្រលាញ់ភេទដូចគ្នា ថាជាអ្នកចម្លងមេរោគនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ