រុស្ស៊ី ផ្អាកលក់ឧស្ម័នឲ្យប្រទេសច្រើនរួចមក ពេលនេះដល់វេន ឡេតូនី ប្រទេសជិតខាង
ថ្ងៃសុក្រ ទី៣០កក្កដា ក្រុមហ៊ុនឧស្ម័នរុស្ស៊ី Gazprom បានប្រកាសថា ឈប់ផ្ទេរឧស្ម័នលក់ឲ្យប្រទេស ឡេតូនី ព្រោះតែប្រទេសជិតខាងមួយនេះ បានរំលោភលើលក្ខខណ្ឌ។ ការប្រកាសរបស់រុស្ស៊ីនេះ ជាការដាក់សម្ពាធបន្ថែមផ្នែកថាមពលទៅលើប្រទេសសហភាពអឺរ៉ុប ហើយក៏ជាការវាយបកទៅនឹងទណ្ឌកម្មសេដ្ឋកិច្ចដែលអឺរ៉ុបដាក់មកលើក្រុងម៉ូស្កូ។ ក៏ប៉ុន្តែ មន្ត្រីជាន់ខ្ពស់ ឡេតូនី អះអាងថា ឡេតូនី មិនសូវជាបារម្ភពេកទេ ព្រោះប្រទេសខ្លួនបានគ្រោងស្រេចហើយថាឈប់ទិញឧស្ម័នពីរុស្ស៊ី។
ចុះផ្សាយនៅថ្ងៃ៖
ស្តាប់ - ០២:០៣
ការប្រកាសផ្អាកលក់ឧស្ម័នឲ្យ ឡេតូនី ប្រទេសជាប់របងក្បែរខាង ពីសំណាក់រុស្ស៊ី គឺប្រកាសនៅតាមប្រព័ន្ធបណ្តាញសង្គមលេតេក្រាម។ ក្រុមហ៊ុនរុស្ស៊ី Gazprom បានសង្កត់ធ្ងន់ថា ឡេតូនី រំលោភលើលក្ខខណ្ឌបង់ប្រាក់ ដែលរុស្ស៊ីតម្រូវឲ្យទូទាត់សាច់ប្រាក់ ជារូបិយបណ្ណជាតិរុស្ស៊ី។ ការសម្រេចចិត្តរបស់ក្រុមហ៊ុនឧស្ម័នរុស្ស៊ី គឺបន្ទាប់ពី ឡេតូនី នៅតែចចេះរឹងថាទូទាត់ជាប្រាក់អឺរ៉ូ។
ករណីស្រដៀងគ្នានេះដែរ រុស្ស៊ីបានបិទផ្អាកផ្ទេរលក់ឧស្ម័នឲ្យប្រទេសអឺរុបជាច្រើនរួចមកហើយ តួយ៉ាង ប្រទេស ប៉ូឡូញ ប៊ុលហ្ការី ហ្វាំងឡង់ ហូឡង់ និងដាណឺម៉ាក់ ខណៈដែលប្រទេសនៅអឺរ៉ុបជាច្រើន កំពុងតែព្រួយខ្វល់ចិត្ត ក្នុងការប្រមូលឧស្ម័ន ត្រៀមទុកសម្រាប់រដូវរងា ខាងមុខ។
ទោះជាម្តេចក្តី អនុរដ្ឋលេខាធិការ ទទួលបន្ទុកនយោបាយថាមពល នៃក្រសួងសេដ្ឋកិច្ចឡេតូនី Edijs Saicans បានប្រកាសឆ្លើយតបវិញភ្លាមៗដែរ ថាការសម្រេចចិត្តរបស់ក្រុមហ៊ុនឧស្ម័នរុស្ស៊ី គឺអាចមិនសូវជាប៉ះពាល់អ្វីធ្ងន់ធ្ងរទេ ព្រោះរដ្ឋាភិបាល ឡេតូនី ក៏បានសម្រេចចិត្តខ្លួនឯងដែរថានឹងឈប់ទិញនាំចូលឧស្ម័នពីរុស្ស៊ី ចាប់ពីដើមខែមករា ឆ្នាំ២០២៣ ឆ្នាំថ្មីទៅ។
ដើម្បីចូលរួមកាត់បន្ថយហានិភ័យ ប្រទេសសហភាពអឺរ៉ុបទាំង២៧ ពីថ្ងៃអង្គារ៍ បាននាំគ្នាយល់ព្រមកាត់បន្ថយ និង សន្សំសំចៃការប្រើប្រាស់ឧស្ម័ន ឲ្យបានយ៉ាង១៥% បើធៀបនឹងប្រាំឆ្នាំចុងក្រោយ។ បើគិតត្រឹមឆ្នាំទៅវិញ ឧស្ម័នរុស្ស៊ី តំណាងឲ្យ៤០% នាំការនាំចូលឧស្ម័នរបស់សហភាពអឺរ៉ុប។ នាពេលកន្លងទៅ ប្រទេសនៅបច្ចិមលោក បានដាក់ទណ្ឌកម្មសេដ្ឋកិច្ចរុស្ស៊ី ពិសេសសំណុំរឿងថាមពល ដែលដចេញពីសង្គ្រាមនៅអ៊ុយក្រែន។ ប្រទេសអឺរ៉ុបបានចោទរុស្ស៊ីថាយកថាមពលឧស្ម័ន ជាចំណាប់ខ្មាំង និងធ្វើជាអាវុធ សម្រាប់វាយបកទល់នឹងសម្ពាធរបស់បច្ចិមលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ