ប៉ូឡូញចុះកិច្ចសន្យាទិញគ្រឿងសព្វាវុធកូរ៉េខាងត្បូង ក្នុងទំហំធំ
កាលពីថ្ងៃពុធ ទី២៧កក្កដា រដ្ឋាភិបាលប៉ូឡូញបានចុះកិច្ចសន្យាគ្រោង ទិញគ្រឿងសព្វាវុធដ៏ច្រើនសន្ធឹកសន្ធាប់ពីកូរ៉េខាងត្បូង។ ទំហំទឹកប្រាក់នៃកិច្ចសន្យានេះ មិនត្រូវបានគេបញ្ជាក់ឲ្យដឹងទេ តែគេដឹងថា មួយផ្នែកធំនៃគ្រឿងសព្វាវុធទាំងនេះ នឹងត្រូវលើកយកមកផលិត នៅក្នុងប្រទេសប៉ូឡូញ។ ការស្ទុះស្ទារប្រញ៉ាប់ទិញគ្រឿងសព្វាវុធពីបរទេស ក្នុងទំហំធំបែបនេះ ត្រូវបានរដ្ឋមន្ត្រីការពារជាតិប៉ូឡូញអះអាងថា ដោយសារប៉ូឡូញបានឃើញបទពិសោធន៍ដ៏ជូរចត់របស់អ៊ុយក្រែន បន្ទាប់ពីត្រូវរុស្ស៊ីលើកទ័ពចូលទៅឈ្លានពាន។
ចុះផ្សាយនៅថ្ងៃ៖
ស្តាប់ - ០២:៣៧
រដ្ឋាភិបាលប៉ូឡូញ បានចុះកិច្ចសន្យាគ្រោង ជាមួយក្រុមហ៊ុនឧស្សាហកម្មសព្វាវុធកូរ៉េខាងត្បូង Korean Aerospace Insdustries ក្រុមហ៊ុន Hyundai ដើម្បីទិញគ្រឿងសព្វាវុធជាច្រើន មានដូចជា រថក្រោះK2 ចំនួន១ពាន់គ្រឿង គ្រាប់កាំភ្លើងធំK9 ចំនួន៦៥០គ្រាប់ ព្រមទាំងយន្តហោះចម្បាំង FA-50 ចំនួន៤៨គ្រឿង។ ថ្លែងទៅកាន់អ្នកកាសែត ក្រោយចប់ពិធីចុះកិច្ចសន្យា នៅទីក្រុងវ៉ាសូវី លោក Marius Blaszczak រដ្ឋមន្ត្រីការពារជាតិប៉ូឡូញ បានអះអាងថា ប៉ូឡូញបានទាញបទពិសោធន៍ ពីអ៊ុយក្រែន ដែលគ្មានអ្វីការពារខ្លួនទប់ទល់ជាមួយការឈ្លានពានរបស់រុស្ស៊ី។ លោកបានបន្ថែមទៀតថា ពេលវេលាកាន់តែខើចណាស់ហើយ ប៉ូឡូញត្រូវតែប្រញាប់ប្រញាល់ បំពាក់គ្រឿងសព្វាវុធទំនើប ឲ្យបានឆាប់បំផុត។
យោងតាមក្រសួងការពារជាតិប៉ូឡូញ យន្តហោះចម្បាំង FA-50 ចំនួន៣គ្រឿង នឹងត្រូវប្រគល់ឲ្យនៅរវាងឆ្នាំ២០២៣ ដើម្បីមកជំនួសបណ្តើៗ នូវយន្តហោះ MiG-29 ដែលប៉ូឡូញមានសល់តាំងតែពីសម័យសូវៀត។ លោកអគ្គនាយក Korean Aerospace Insdustries បានបញ្ជាក់ថា គេនឹងលើកការផលិតយន្តហោះ FA-50 មកធ្វើនៅប៉ូឡូញ ចាប់ពីឆ្នាំក្រោយទៅ។ ហើយនៅពេលក្រុមហ៊ុន ផលិតគ្រប់ចំនួនកំណត់ហើយ គេនឹងពង្រីកសកម្មភាពផលិតកម្ម ឲ្យបានធំទូលាយថែមទៀត នៅក្នុងប្រទេសប៉ូឡូញ។
ចំណែករថក្រោះK2 ចំនួន១ពាន់គ្រឿង គឺមាន១៨០គ្រឿងផលិតដោយ Hyundai Rotem នៅកូរ៉េខាងត្បូង។ ចំណែកជាង៨០០គ្រឿងទៀត នឹងត្រូវលើកមកផលិតនៅប៉ូឡូញ ចាប់ពីឆ្នាំ២០២៦ទៅ ឲ្យត្រូវតាមស្តង់ដារ ហើយនឹងមានឈ្មោះថ្មីថា K2PL។ ដូចគ្នាដែរ គ្រាប់កាំភ្លើងធំ K9 ចំនួន៤៨គ្រាប់ នឹង្តរូវបប្រគល់ឲ្យនៅមុនដំណាច់ឆ្នាំនេះ ខណៈគ្រាប់ជាង៦០០គ្រាប់ទៀត នឹងត្រូវចាប់ផ្តើមប្រគល់ឲ្យនៅឆ្នាំ២០២៤ ហើយចាប់ពីឆ្នាំ២០២៦ការផលិតនឹងលើកមកធ្វើនៅប៉ូឡូញដែរ។
គួរបញ្ជាក់ថា ប៉ូឡូញគឺជាសមាជិកអង្គការសម្ព័ន្ធមិត្តអូតង់ ហើយមានព្រំដែនជាប់អ៊ុយក្រែន និងរុស្ស៊ី។ បន្ទាប់ពីបានឃើញគ្រោះថ្នាក់ ដែលអ៊ុយក្រែន កំពុងតែឆ្លងកាត់ ប៉ូឡូញបានព្យាយាមពន្លឿនការទិញគ្រឿងសព្វាវុធទុកការពារខ្លួន។ ក្រៅពីគ្រឿងសព្វាវុធផលិតដោយក្រុមហ៊ុនឧស្សាហកម្មកូរ៉េខាងត្បូងទាំងនេះ ប៉ូឡូញបានបញ្ជាទិញផងដែរ នូវឧត្ថម្ភាគច្រកយោធា AW149 ចំនួន៣២គ្រឿង ផលិតដោយក្រុមហ៊ុនអ៊ីតាលី Leonardo និងរថក្រោះអាមេរិក Abrams ចំនួន៣៣៦គ្រឿង ព្រមទាំងប្រព័ន្ធបាញ់មីស៊ីល CAMM iLauncher ផលិតដោយក្រុមហ៊ុនអឺរ៉ុប MBDA៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ