សមាគមជនរងគ្រោះ ធូរស្រាលចិត្តនិងមានមោទនភាពចំពោះសវនាការកាត់ក្តីសំណុំរឿងភេរវកម្មថ្ងៃ១៣វិច្ឆិកា
ជនជាប់សង្ស័យ ទាំង២០នាក់ ក្នុងសំណុំរឿងភេរវកម្មថ្ងៃ១៣វិច្ឆិកា២០១៥ គឺត្រូវ តុលាការបារាំងផ្នែកប្រឆាំងនឹងបទល្មើសភេរវកម្ម បានកាត់ក្តីផ្តន្ទាទោសគ្រប់ៗគ្នា។ សាឡា អាប់ដេស្លាម (Salah Abdeslam) ដែលភេរវជនតែម្នាក់គត់ នៅរស់រានមានជីវិត ពី «ព្រឹត្តិការណ៍ភេរវកម្ម ថ្ងៃទី១៣ ខែវិច្ឆិកា» គឺត្រូវកាត់ទោសឲ្យជាប់ពន្ធនាគារអស់មួយជីវិត។ ទោសជាប់ពន្ធនាគារអស់មួយជីវិត ត្រូវធ្លាក់លើ មហាម៉េត អាប្រ៊ីនី ( Mohamed Abrini) ម្នាក់ទៀត ដែលបានបដិសេធមិនលូកដៃនៅក្នុងព្រឹត្តិការណ៍មែន តែរូបគេបានដឹងរឿងគម្រោងការទាំងអស់ ប៉ុន្តែមិនព្រមធ្វើអ្វីសោះដើម្បីរារាំងអំពើភេរវកម្ម។ ជនជាប់សង្ស័យនិងអ្នកផ្សំគំនិត ១១នាក់ទៀត ត្រូវជាប់ឃុំ ពី ២ឆ្នាំ ដល់៣០ឆ្នាំ នៅក្រោយចម្រឹងដែក។ ចំណែកឯ ជនសង្ស័យ ៣នាក់ ត្រូវតុលាការ ដោះលែងឲ្យមានសេរីភាព ពីព្រោះថា មានទោសស្រាល ដែលខ្លះមានការបន្ធូរបន្ថយ ព្រោះទោសរបស់គេបានត្រូវអនុវត្តរួចហើយ នារយៈពេលក្នុងគុកជាច្រើនឆ្នាំកន្លងមកនេះ។ ទន្ទឹមនឹងគ្នានេះដែរ សមាគមជនរងគ្រោះ បានធូរស្រាលចិត្តនិងមានមោទនភាពចំពោះសវនាការដែលបានបិទបញ្ចប់ដោយជោគជ័យ។
ចុះផ្សាយនៅថ្ងៃ៖
ស្តាប់ - ០២:៥១
សូមស្តាប់ប្រសាសន៍របស់លោក អាក់ទួរ ដឺណូវូ (Arthur Denouveaux) ជាប្រធានសមាគមជនរងគ្រោះ Life for Paris:
«ខ្ញុំទទួលអារម្មណ៍ធូរស្រាលចិត្តជាខ្លាំង ហើយនិងមានមោទនភាពយ៉ាងច្រើនដែរ។ ធូរស្រាលចិត្ត ព្រោះតែសវនាការកាត់ក្តីសំណុំរឿងភេរវកម្មនេះ បានបញ្ចប់ ដ្បិតថា សវនាការនេះ រឿងក្តីធំ ហើយ ធូរចិត្ត ក៏ព្រោះថា ជំហានបន្ទាប់ ជាការកសាងនិងជួសជុលផ្លូវចិត្តឡើងវិញ។ ខ្ញុំថា ខ្ញុំមានមោទនភាពដែរ ពីព្រោះយើងបានបង្ហាញថា ក្នុងនាមជាដើមបណ្តឹងរដ្ឋប្បវេណី យើងមានកម្លាំងមាំខ្លាំង។ យើងបានទៅផ្តល់សក្ខីកម្ម ទៅថ្លែងការណ៍ដោយសេចក្តីថ្លៃថ្នូរ ហើយយើងដឹងថា សក្ខីកម្មរបស់យើងមានសារប្រយោជន៍សម្រាប់ដំណើរការកាត់ក្តីស្វែងរកយុត្តិធម៌។ ទន្ទឹមនឹងគ្នានេះ យើងយល់ថា វាលំបាកនឹងរកបានសាលក្រមដែលយុត្តិធម៌ តាមចិត្តយើងចង់បានទាំងស្រុងណាស់។
ខ្ញុំក៏មោទនភាពដែរ ចំពោះប្រទេសបារាំងរបស់ខ្ញុំ ដែល បារាំង បានសម្រេចកាត់ក្តីសំណុំរឿងភេរវកម្មដ៏ធំសម្បើម ឲ្យដំណើរការក្តីប្រព្រឹត្តទៅតាមសម្រួល ជាធម្មតា។ បារាំងហ៊ាននិយាយ ហើយ ជនជាប់ចោទខ្លួនឯង ក៏នៅទីបំផុត បានបញ្ចេញសំឡេង។ រីឯ យើង ក៏បានយល់ពីគ្នាច្រើនជាងមុន ដែលយើងមិនគិតថានឹងបានដឹងទាល់តែសោះ។ អាស្រ័យហេតុនេះ ពេលនេះ គឺជាពេលវេលានៃយុត្តិធម៌ត្រូវឈ្នះ។
ល្ងាចមិញ បន្ទាប់ពីការប្រកាសសាលក្រមរួច យើងជុំគ្នាផឹកអីមួយកែវ។ មិនមែនដើម្បីអបអរសប្បាយក្អាកក្អាយទេ តែយើងបានជួបជុំគ្នាឲ្យធូរស្រាលចិត្តនឹងសវនាការដែលត្រូវបញ្ចប់ ហើយយើងជុំគ្នាសំណេះសំណាលគ្នាផង។ ពេលនោះ គឺមាន ពិរុទ្ធជនបីនាក់ ដែលតុលាការកាត់ក្តីថាមានទោសរួចហើយ តែត្រូវដោះលែងឲ្យមានសេរីភាព ក៏បានទៅចូលរួមផឹកមួយពែងដែរ។ យើងជុំគ្នាច្រើនភាគី ទាំងខាងក្រុមដើមបណ្ដឹងរដ្ឋប្បវេណី ខាងក្រុមដើមចោទ អយ្យការ និងជនជាប់ទោសដែលទើបរួចខ្លួន។ យើងនិយាយរកគ្នាជាធម្មតា ហើយនិងបាននិយាយគ្នាពីអនាគតទៅថ្ងៃមុខផង។
ខ្ញុំគិតថា សវនាការក្តីភេរវកម្មនេះ បានសបញ្ជាក់យើងច្រើនជំពូកណាស់។ យើងបានឆ្លងកាត់ស្ថានការណ៍លំបាកជាច្រើន ហើយយើងបានត្រឡប់ចេញមកវិញ ជាមួយនូវភាព ជាមនុស្សជាតិ។ យើងមានការយល់ដឹងច្រើនជាងមុន អ្វីជាមនុស្សធម៌ និងការព្រមទទួលយក។ ម្យ៉ាងទៀត យើងបានយល់ពីមនុស្សខ្លះដែលក្នុងពេលមួយ អាចធ្លាក់ដល់ដំណាក់កាលប្រព្រឹត្តល្មើស ហើយដើរផ្លូវមិនល្អ យើងត្រូវផ្តល់ឱកាសឲ្យគេកែប្រែខ្លួន។ ខ្ញុំគិតថា វាមានន័យខ្លឹមសារច្រើន ដែលយើងឃើញថា ជនជាប់ចោទ ៣នាក់ បានរួចខ្លួន មានសេរីភាពមកវិញ ហើយចូលរួមអង្គុយជជែកគ្នាជាមួយយើងពីល្ងាចមិញ។»
សូមជ្រាបថា ពិរុទ្ធជន សាឡា អាប់ដេស្លាម គឺជា ភេរវជនតែម្នាក់គត់ ដែលនៅរស់រានមានជីវិត ពី «ព្រឹត្តិការណ៍ភេរវកម្ម ថ្ងៃទី១៣ ខែវិច្ឆិកា ឆ្នាំ២០១៥» នៅក្នុងក្រុងប៉ារីស។ នេះគឺជាអំពើភេរវកម្មដ៏រន្ធត់ ដែលបានបណ្តាលឲ្យមនុស្ស១៣០នាក់ ត្រូវបាត់បង់ជីវិត និង ៣៥០នាក់រងរបួស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ