ជំនួបកំពូលអូតង់បិទបញ្ចប់ជាមួយការចាត់ទុករុស្ស៊ីជាការគំរាមកំហែងធំចម្បង
អូតង់បិទបញ្ចប់ជំនួបកំពូលរយៈពេល ២ថ្ងៃ នៅថ្ងៃព្រហស្បតិ៍នេះ ជាមួយការពង្រីកវិសាលភាព ដោយទទួលយកហ្វាំងឡង់ និងស៊ុយអែតជាសមាជិកថ្មីបន្ថែម។ នៅក្នុងសេចក្តីថ្លែងការណ៍រួម កាលពីថ្ងៃពុធម្សិលមិញ មេដឹកនាំប្រទេសសមាជិកអូតង់បានសន្យាផងដែរថា នឹងផ្តល់ជំនួយដល់អ៊ុយក្រែន ក្នុងរយៈពេលវែង តាមតែអាចធ្វើទៅបាន ដើម្បីប្រឈមតទល់នឹងអំពើឃោឃៅរបស់រុស្ស៊ី។ ពីរដ្ឋធានីរបស់ប្រទេសតួកមេនីស្ថាន ជាទីដែលលោកកំពុងធ្វើទស្សនកិច្ច ប្រធានាធិបតីរុស្ស៊ី លោកពូទីនបានបរិហាររិះគន់មហិច្ឆតាចក្រពិត្តនិយមរបស់សម្ព័ន្ធអាត្លង់ទិកអូតង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៨
មានចំណុចសំខាន់មួយចំនួនដែលគេត្រូវចងចាំពីជំនួបកំពូលពិសេសរបស់អូតង់ នៅប្រទេសអេស្ប៉ាញដែលត្រូវបិទបញ្ចប់នៅថ្ងៃព្រហស្បតិ៍នេះ។ ទី១ អូតង់បានប្រកាសជាផ្លូវការទទួលយកហ្វាំងឡង់ និងស៊ុយអែត ជាសមាជិកថ្មីបន្ថែម ដែលនឹងធ្វើឲ្យសមាជិកសរុបរបស់អង្គការសម្ព័ន្ធអាត្លង់ទិក កើនឡើងដល់ចំនួន៣២ប្រទេស។ ទី ២ អូតង់បានសើរើគោលយុទ្ធសាស្រ្តរបស់ខ្លួនឡើងវិញ ដើម្បីសម្របខ្លួនទៅនឹងបរិបទពិភពលោកសព្វថ្ងៃ ជាពិសេសនៅក្នុងកាលៈទេសៈដែលកំពុងកើតមានសង្រ្គាមឈ្លានពានអ៊ុយក្រែន។ ទៅតាមគោលយុទ្ធសាស្រ្តថ្មីដែលមេដឹកនាំរបស់ប្រទេសសមាជិកអូតង់បានបោះឆ្នោតអនុម័តកាលពីថ្ងៃពុធម្សិលមិញ អូតង់បានសម្រេចផ្លាស់ប្តូរប្រទេសរុស្ស៊ី ពីប្រទេសដៃគូ មកជាប្រទេសគំរាមកំហែងចម្បង និងផ្ទាល់ សម្រាប់សន្តិសុខរបស់រដ្ឋសមាជិកអូតង់។ ក្រៅពីរុស្ស៊ី អូតង់បានដាក់បញ្ចូលចិន ជាលើកទី១ ទៅក្នុងគោលយុទ្ធសាស្រ្តរបស់ខ្លួន ដោយបានចាត់ទុកមហិច្ឆតារបស់ចិនថា ជាការប្រឈមសម្រាប់ផលប្រយោជន៍ សន្តិសុខ និងតម្លៃរបស់ប្រទេសសមាជិកអូតង់។ សម្រាប់អូតង់ ចិនមិនមែនជាគូប្រជែង ប៉ុន្តែ គេក៏មិនអាចមើលរំលងពីផលប៉ះពាល់ទៅលើសន្តិសុខរបស់អូតង់ បើសិនគេមើលទៅលើការវិនិយោគកាន់តែធំសម្បើមរបស់ចិនទៅលើវិស័យកងទ័ព និងការប៉ុនប៉ងរបស់ចិន ដើម្បីគ្រប់គ្រងប្រព័ន្ធហេដ្ឋារចនាសម្ព័ន្ធ ជាពិសេស បណ្តាញអ៊ីនធ័រនែត 5G។
ទី៣ ដើម្បីបង្ហាញឯកភាពគ្នាជាធ្លុងមួយ ប្រទេសសមាជិកអូតង់ទាំង៣០បានយល់ព្រមបង្កើនចំនួនកងទ័ពដល់៣សែននាក់ សម្រាប់ពង្រឹងវត្តមានទ័ពអូតង់នៅតាមប្រទេសសមាជិកដែលស្ថិតនៅភាគខាងកើតអឺរ៉ុប ពោលគឺទៅក្បែរព្រំដែនប្រទេសរុស្ស៊ី។
ចំណុចទី៤ដែលអូតង់បានសម្រេចព្រមព្រៀងគ្នាកាលពីថ្ងៃម្សិលមិញ គឺផែនការជំនួយថ្មីសម្រាប់ជួយអ៊ុយក្រែន ដូចជាការផ្តល់សព្វាវុធ ហើយនិងការពង្រឹងសមត្ថភាពការពាររបស់អ៊ុយក្រែន ដើម្បីប្រឆាំងនឹងការវាយប្រហារព័ត៌មានវិទ្យា។ នៅក្នុងសេចក្តីថ្លែងការណ៍រួម អូតង់ចោទប្រកាន់រុស្ស៊ីថាបានប្រព្រឹត្តអំពើឃោឃៅ គួរឲ្យរន្ធត់ដែលបានធ្វើឲ្យមនុស្សឈឺចាប់ដ៏ធំធេង និងការផ្លាស់ទីដ៏ច្រើនសន្ធឹកសន្ធាប់។ សម្រាប់អូតង់ រុស្ស៊ីទទួលខុសត្រូវទាំងស្រុងលើគ្រោះមហន្តរាយមនុស្សជាតិនៅអ៊ុយក្រែន។
អូតង់បានសន្យាផងដែរថា នឹងផ្តល់ជំនួយដល់អ៊ុយក្រែន ក្នុងរយៈពេលវែងបើចាំបាច់។ ដោយលើកឡើងពីកាតព្វកិច្ចសីលធម៌ និងនយោបាយរបស់អូតង់ អគ្គលេខាធិការអូតង់ បាននិយាយថា អ៊ុយក្រែនអាចជឿទុកចិត្តលើជំនួយរបស់អូតង់។ នៅថ្ងៃម្សិលមិញ អង់គ្លេសជាសមាជិកសំខាន់មួយរបស់អូតង់បានប្រកាសផ្តល់ជំនួយយោធាបន្ថែមដល់អ៊ុយក្រែន ក្នុងទំហំទឹកប្រាក់ជាង ១ពាន់លានអឺរ៉ូ (១ពាន់លានផោន) ដែលក្នុងនោះមានប្រព័ន្ធការពារដែនអាកាស និងយន្តហោះដ្រូន។
ប្រតិកម្មទៅនឹងជំហររួមរបស់អូតង់ ប្រធានាធិបតីរុស្ស៊ី លោកវ្លាឌីមៀរពូទីនដែលកំពុងធ្វើទស្សនកិច្ចនៅប្រទេសតួកមេនីស្ថាន បាននិយាយ (នៅក្នុងសន្និសីទកាសែត)បរិហារមហិច្ឆតាចក្រពត្តិនិយមរបស់សម្ព័ន្ធអូតង់។ សម្រាប់ប្រធានាធិបតីរុស្ស៊ី មេដឹកនាំរបស់ប្រទេសនាំមុខគេនៅអូតង់ចង់បញ្ជាក់ពីអនុត្តរភាពរបស់ពួកគេ។ “ការអំពាវនាវរបស់អូតង់ឲ្យអ៊ុយក្រែននៅតែបន្តប្រយុទ្ធ និងបដិសេធមិនចរចា បានបញ្ជាក់សម្មតិកម្មរបស់រុស្ស៊ីដែលថា អ៊ុយក្រែន និងប្រជាជនអ៊ុយក្រែនមិនមែនជាគោលដៅរបស់ប្រទេសលោកខាងលិច និងអូតង់ ប៉ុន្តែ វាជាមធ្យោបាយសម្រាប់ការពារផលប្រយោជន៍របស់អូតង់”។ នេះជាការវាយតម្លៃរបស់ប្រធានាធិបតីរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ