G7ចាត់ទុកការបាញ់មីស៊ីលកម្ទេចផ្សារទំនើបនៅអ៊ុយក្រែនរបស់រុស្ស៊ី ថាជាឧក្រិដ្ឋកម្មសង្គ្រាម
ជំនួបកំពូលក្រុមប្រទេស G7 មិនទាន់ទាំងចប់ស្រួលបួលផង រុស្ស៊ីបានបាញ់ប្លោងមីស៊ីលមកភាគកណ្ដាលអ៊ុយក្រែន ចំទីតាំងផ្សារទំនើបមួយកន្លែង កាលពីល្ងាចថ្ងៃចន្ទទី ២៧មិថុនា។ គិតមកត្រឹមពេលនេះ មានស្លាប់មនុស្សប្រមាណ ១៨នាក់ និងរបួសប្រមាណ៥៩នាក់ផ្សេងទៀត ដែលសុទ្ធតែជាប្រជាជនស៊ីវីល។ ក្រុមប្រទេស G7 បានប្រកាសថ្កោលទោសថា ការវាយប្រហារមកលើទីតាំងផ្សារ ដែលជាទីតាំងស៊ីវីលនេះ គឺអាចចាត់ទុកបានថាជា ឧក្រិដ្ឋកម្មសង្គ្រាមយ៉ាងច្បាស់ណាស់ ហើយដែលលោកពូទីន ត្រូវតែទទួលខុសត្រូវ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
ក្រុមសង្គ្រោះបានធ្វើការយ៉ាងសស្រាក់សស្រាំង ពេញមួយយប់ថ្ងៃចន្ទ ឈានចូលថ្ងៃអង្គារ ដើម្បីកកាយបំណែកថ្មអាគារ ដែលបានបាក់រំលំ និងស្វែងរកមនុស្ស ដែលជាប់ក្នុងគំនរបាក់បែកទាំងនោះ។ យោងតាមកងទ័ពអាកាសអ៊ុយក្រែន រុស្ស៊ីបានប្រើគ្រាប់មីស៊ីល ប្រភេទបាញ់កំទេចនាវា ឈ្មោះ Kh-22 បាញ់ចេញពីតំបន់ Koursk ក្នុងទឹកដីរុស្ស៊ី សំដៅមកលើផ្សារទំនើប ក្នុងក្រុងKrementchouk ដែលស្ថិតនៅចំងាយប៉ុន្មាន ៣៣០គីឡូម៉ែត្រ ភាគអាគ្នេយ៍រដ្ឋធានីកៀវ។
នៅរសៀលថ្ងៃចន្ទម្សិលមិញដែរ កងទ័ពរុស្ស៊ីបានបាញ់ប្លោងគ្រាប់ ទៅលើហ្វូងប្រជាជនស៊ីវីល ដែលកំពុងតែជុំគ្នាទទួលចំណែកទឹកស្អាត ពីស៊ីទែន នៅទីក្រុង Lyssytchansk។ យ៉ាងហោចណាស់ មានមនុស្សស្លាប់៨នាក់ ក្នុងហេតុការណ៍នេះ។
លោកវ្លូឌីមៀរ ហ្សេឡេនស្គី បានថ្លែងចាត់ទុក ការបាញ់គ្រាប់មីស៊ីលមកលើទីតាំងផ្សារ ដែលមានសុទ្ធតែប្រជាជនសាមញ្ញនេះ ថាគឺអំពើព្រៃផ្សៃយង់ឃ្នងរបស់កងទ័ពរុស្ស៊ី។ កងទ័ពរុស្ស៊ីវាយប្រហារ ដោយគ្មានការពិចារណា សូម្បីតែទីតាំងផ្សារលក់ទំនិញ ដែលមានតែប្រជាជនស៊ីវីល ស្ត្រី និងកុមារ។
ដូចគ្នាដែរ ថ្នាក់ដឹកនាំក្រុមប្រទេស G7 ដែលកំពុងតែជួបប្រជុំគ្នានៅភាគខាងត្បូងប្រទេសអាល្លឺម៉ង់ បានថ្លែងការថ្កោលទោស ចំពោះអំពើនេះ។ G7 ចាត់ទុកថា ការវាយប្រហារដោយឥតរើសមុខ មកលើទីតាំងប្រជាជនស៊ីវីល គឺវាជាឧក្រិដ្ឋកម្មសង្គ្រាម។ លោកប្រធានាធិបតីម៉ាក្រុង បានបន្ថែមថា ប្រជាជនរុស្ស៊ីត្រូវតែបើកភ្នែក មើលការពិត ចំពោះទង្វើដ៏ព្រៃផ្សៃរបស់កងទ័ពរុស្ស៊ីនៅពេលនេះ។ លោកបូរីស ចនសុន វិញអះអាងថា ទង្វើរបស់រុស្ស៊ីនេះ វានឹងរុញក្រុមសម្ព័ន្ធមិត្តលោកខាងលិច ឲ្យពង្រឹងពួតដៃគ្នាកាន់តែរឹងមាំ ដើម្បីជួយអ៊ុយក្រែន។
យ៉ាងណាមិញ ការបាញ់ប្លោងគ្រាប់ផ្ទួនៗ របស់កងទ័ពរុស្ស៊ី មកលើទីតាំងប្រជាជនស៊ីវិលអ៊ុយក្រែននេះ គឺជាកម្មវត្ថុនៃការប្រជុំបន្ទាន់មួយ នៅក្រុមប្រឹក្សាសន្តិសុខ នៃអង្គការសហប្រជាជាតិ។ លោក Stephane Dujarric អ្នកនាំពាក្យអង្គការសហប្រជាជាតិ បានរំលឹកថា គ្រប់ភាគីជម្លោះត្រូវតែគោរពច្បាប់អន្តរជាតិ ដែលកំណត់ថាត្រូវតែការពារប្រជាជនស្លូតត្រង់ និងហេដ្ឋារចនាសម្ព័ន្ធស៊ីវីល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ