លោកទ្រុយដូថា លោកពូទីន គឺជាអ្នកទទួលខុសត្រូវ លើអំពើឧក្រិដ្ឋកម្មសង្គ្រាមនៅអ៊ុយក្រែន
លោកនាយករដ្ឋមន្ត្រីកាណាដា យូស្តាំង ទ្រុយដូ បានធ្វើដំណើរទៅដល់អ៊ុយក្រែន កាលពីថ្ងៃអាទិត្យ ទី ៨ឧសភា។ នៅទីក្រុងគីវ លោក យូស្តាំង ទ្រុយដូ បានថ្លែងថា លោកប្រធានាធិបតីរុស្ស៊ី វ្លាឌីមៀរ ពូទីន គឺជាអ្នកទទួលខុសត្រូវ លើអំពើឧក្រិដ្ឋកម្មសង្គ្រាម ដ៏ព្រៃផ្សៃយង់ឃ្នង ដែលបានកើតឡើងនៅអ៊ុយក្រែន។ លោកទ្រុយដូ បានថ្លែងដូចនេះ បន្ទាប់ពីលោកបានធ្វើដំណើរទៅ កាន់ក្រុងអៀរពីន ជាយរដ្ឋធានីគាវ ជាទីដែលអ៊ុយក្រែន បានចោទថាកងទ័ពរុស្ស៊ី បានសម្លាប់ប្រជាជនស៊ីវីលអ៊ុយក្រែន ដោយឥតរើសមុខ។
ចុះផ្សាយនៅថ្ងៃ៖
ស្តាប់ - ០២:១៥
បន្ទាប់ពីបានចូលរួមប្រជុំ G7 តាមប្រព័ន្ធវីដេអូខុសហ្វឺរិនស៍ លោកនាយករដ្ឋមន្ត្រីកាណាដា យូស្តាំង ទ្រុយដូ បានធ្វើសន្និសីទកាសែតរួមគ្នា នៅរដ្ឋធានីគីវជាមួយលោក វ្លូឌីមៀរ ហ្សេឡិនស្គី។ នៅពេលព្រឹកថ្ងៃអាទិត្យទី ៨ឧសភា លោកនាយករដ្ឋមន្ត្រីកាណាដា បានធ្វើដំណើរទៅដល់ទីក្រុង អៀរពីន Irpin ដើម្បីពិនិត្យស្ថានភាពខូចខាត ព្រមទាំងទីតាំងសោកនាដកម្ម ដែលប្រជាជនអ៊ុយក្រែនជាច្រើននាក់ ត្រូវបានកងទ័ពរុស្ស៊ីសម្លាប់រង្គាល។
នៅចំពោះមុខអ្នកកាសែត លោក យូស្តាំង ទ្រុយដូ បានថ្លែងថា "វាច្បាស់ណាស់ ដែលអ្នកទទួលខុសត្រូវចំពោះអំពើឧក្រិដ្ឋកម្មសង្គ្រាម ដ៏សាហាវយង់ឃ្នងទាំងនេះ គឺគ្មាននរណាក្រៅពីលោកពូទីនទេ"។ លោកទ្រុយដូរបានបន្ថែមថា "លោកគឺជាសាក្សីម្នាក់ នៅចំពោះមុខភាពព្រៃផ្សៃ សាហាវឥតត្រាប្រណី នៃសង្គ្រាមដ៏ខុសច្បាស់ដែលរុស្ស៊ីបានធ្វើមកលើអ៊ុយក្រែន ហើយលោករំពឹងថា លោកពូទីន ត្រូវតែទទួលទោសកំហុស"។
គួរបញ្ជាក់ថា ដំណើរទៅដល់របស់លោកនាយករដ្ឋមន្ត្រីកាណាដានៅអ៊ុយក្រែន គឺមិនត្រូវបានគេប្រកាសឲ្យដឹងមុនឡើយ។ នៅលើទំព័រ Telegram លោក Oleksandre Markouchine អភិបាលក្រុងអៀរពីន បានសរសេរថា លោកយូស្តាំង ទ្រុយដូ មានបំណងធ្វើដំណើរមកកាន់ក្រុងអៀរពីន ដើម្បីឲ្យបានឃើញផ្ទាល់ភ្នែក នូវអំពើព្រៃផ្សៃដែលកងទ័ពរុស្ស៊ីបានធ្វើ។
គួររំលឹកដែរថា អៀរពីន ទីក្រុងមួយស្ថិតនៅភាគពាយ័ព្យរដ្ឋធានីកៀវ ក៏មិនខុសពីទីក្រុងប៊ូតឆាដែរ ពោលគឺត្រូវបានកងទ័ពរុស្ស៊ីវាយដណ្តើម និងគ្រប់គ្រងអស់រយៈពេលពេញមួយខែមីនា។ ក្រោយការចាកចេញទៅវិញរបស់កងទ័ពរុស្ស៊ី នៅដើមខែមេសា គេបានប្រទះឃើញសាកសពមនុស្សជាច្រើនរយនាក់ នៅទីនោះ ដោយខ្លះស្លាប់ទាំងដៃជាប់ចំណង ភ្នែកត្រូវគេចង សាកសពរាយប៉ាយនៅតាមផ្លូវ តាមរបងផ្ទះជាដើម។ ថ្មីៗនេះ លោកអគ្គលេខាធិការអង្គការសហប្រជាជាតិ ក៏បានធ្វើដំណើរ ទៅដល់ប៊ូតឆា អៀរពីន និងគីវដែរ។
នៅរដ្ឋធានីគីវ លោកយូស្តាំង ទ្រុយដូ អមដំណើរដោយលោកស្រីឧបនាយករដ្ឋមន្ត្រីកាណាដា និងលោកស្រីរដ្ឋមន្ត្រីការបរទេសកាណាដា បានរួមគ្នាបង្ហូតទង់ជាតិកាណាដា នៅខាងមុខស្ថានទូតកាណាដា ដើម្បីជានិម្មិតរូបនៃការចាប់ផ្តើមដំណើរការការងាររបស់ស្ថានទូតឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ