អាល្លឺម៉ងបារម្ភខ្លាចជម្លោះរវាងជនជាតិអ៊ុយក្រែន និងរុស្ស៊ីហៀរហូរចូលទឹកដីខ្លួន
ចំនួនបាតុកម្មគាំទ្ររុស្ស៊ីបានកើនឡើង នៅប៉ុន្មានថ្ងៃចុងក្រោយនេះនៅប្រទេសអាល្លឺម៉ង់។ នៅថ្ងៃអាទិត្យ មនុស្សប្រមាណ៨០០នាក់បានធ្វើបាតុកម្មនៅហ្រ្វង់ហ្វត ទីក្រុងហិរញ្ញវត្ថុរបស់អាល្លឺម៉ង់ ដើម្បីទាមទារឲ្យឈប់មានសកម្មភាពរើសអើងទៅលើអ្នកនិយាយភាសារុស្ស៊ី នៅប្រទេសអាល្លឺម៉ង់។ បាតុកម្មរបស់អ្នកនិយាយភាសារុស្ស៊ីត្រូវពើបប្រទះនឹងបាតុកម្មគាំទ្រអ៊ុយក្រែន ដែលមានអ្នកចូលរួមប្រមាណ ២៥០០នាក់ គឺច្រើនជាង ចំនួនបាតុករគាំទ្ររុស្ស៊ី ដល់ទៅ ៣ដង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥១
ហាងទំនិញរុស្ស៊ីប្រឡាក់ប្រតេកប្រតាកដោយថ្នាំពណ៌ ចំណែកអ្នកនិយាយភាសារុស្ស៊ីត្រូវគេជេរប្រទេចផ្តាសានៅតាមផ្លូវ។ ករណីរើសអើង រុកកួនសហគមន៍រុស្ស៊ី បានកើនឡើងកាន់តែច្រើននៅអាល្លឺម៉ង់ គិតចាប់តាំងពីរុស្ស៊ីចូលធ្វើសង្រ្គាមឈ្លានពានអ៊ុយក្រែន។
តាមរបាយការណ៍ផ្លូវការរបស់ប៉ូលិសអាល្លឺម៉ង់ នៅក្នុងរយៈពេលជាង១ខែដែលសង្រ្គាមអ៊ុយក្រែនផ្ទុះឡើង គេកត់ត្រាឃើញមានបទល្មើសប្រឆាំងរុស្ស៊ី ចំនួន ៣៨៣ នៅប្រទេសអាល្លឺម៉ង់។ ប៉ូលិសអាល្លឺម៉ង់បានរកឃើញផងដែរមានបទល្មើសប្រឆាំង ជនជាតិអ៊ុយក្រែន ចំនួន ១៨១បទល្មើស។
នៅអាល្លឺម៉ង់ មានប្រជាជនដើមកំណើតរុស្ស៊ី ប្រមាណ ១,២លាននាក់ ចំណែកជនជាតិអ៊ុយក្រែន មានចំនួនតែជាង ៣សែននាក់ប៉ុណ្ណោះ។ ប៉ុន្តែ នៅមួយខែមកនេះ អាល្លឺម៉ង់បានទទួលបន្ថែមទៀតនូវជនភៀសខ្លួនអ៊ុយក្រែន ជាង៣សែននាក់ ដែលរត់គេចចេញពីសង្រ្គាមឈ្លានពានរបស់រុស្ស៊ី នៅអ៊ុយក្រែន។
តាមរដ្ឋមន្រ្តីក្រសួងមហាផ្ទៃអាល្លឺម៉ង់ អាជ្ញាធរផ្នែកសន្តិសុខនឹងតាមដានមើលឲ្យល្អិតល្អន់បំផុតដើម្បីដឹងថា តើជនជាតិរុស្ស៊ី និងជនជាតិអ៊ុយក្រែន ដែលរស់នៅប្រទេសអាល្លឺម៉ង់ អាចប្រឈមនឹងគ្រោះថ្នាក់ដល់កម្រិតណា។ សម្រាប់រដ្ឋមន្រ្តីអាល្លឺម៉ង់ លោកស្រី Nancy Faeser អាជ្ញាធរអាល្លឺម៉ង់ត្រូវតាមមើលរឿងនេះ ដោយប្រយ័ត្នប្រយែងបំផុត ដើម្បីធ្វើយ៉ាងណា ការពារកុំឲ្យជម្លោះរុស្ស៊ី អ៊ុយក្រែន អាចហូរចូលមកដល់ទឹកដីអាល្លឺម៉ង់។
នៅថ្ងៃអាទិត្យ ប៉ូលិសនៅទីក្រុងហ្វ្រង់ហ្វត បានដាក់រនាំង ខណ្ឌ ដើម្បី បង្កាកុំឲ្យក្បួនដង្ហែររបស់ក្រុមបាតុករគាំទ្ររុស្ស៊ី និងក្រុមបាតុករគាំទ្រអ៊ុយក្រែន អាចជល់ប៉ះទង្គិចគ្នា។ ក្រៅពីទីក្រុងហ្វ្រង់ហ្វត បាតុកម្មរបស់អ្នកគាំទ្ររុស្ស៊ី ត្រូវបានរៀបចំនៅតាមទីក្រុងតូចៗ៣ផ្សេងទៀតរបស់អាល្លឺម៉ង់ ដែលនៅក្នុងនោះ បាតុករបានលើកបដាថ្កោលទោសការរើសអើង ស្អប់ ប្រឆាំងអ្នកនិយាយភាសារុស្ស៊ី នៅអាល្លឺម៉ង់។
បាតុកម្មគាំទ្ររុស្ស៊ី ធ្វើឡើងក្នុងហេតុផលប្រឆាំងតវ៉ាសកម្មភាពរើសអើង ប្រកាន់ពូជសាសន៍ទៅលើអ្នកនិយាយរុស្ស៊ី នៅអាល្លឺម៉ង់។ ប៉ុន្តែ អ្នកស្រាវជ្រាវម្នាក់នៅសកលវិទ្យាល័យ Otto von Guericke នៅ Magdebourg វិភាគថា នៅក្នុងចំណោមបាតុករដែលចូលរួមក្នុងបាតុកម្មគាំទ្ររុស្ស៊ី គឺប្រាកដណាស់ មានអ្នកគាំទ្រលោកពូទីន និងមួយចំនួនផ្សេងទៀត ជាអ្នកដែលមិនចូលចិត្តលោកពូទីន ប៉ុន្តែ ពួកគេចង់ ការពារកុំឲ្យរុស្ស៊ីខូចមុខមាត់ខ្លាំង បើទោះបីរុស្ស៊ីធ្វើសង្រ្គាមឈ្លានពានអ៊ុយក្រែនក្តី។
នៅក្នុងលិខិតផ្ញើទៅកាន់ចៅហ្វាយក្រុងប៊ែរឡាំង ឯកអគ្គរដ្ឋទូតអ៊ុយក្រែនប្រចាំប្រទេសអាល្លឺម៉ង់បាននិយាយរិះគន់អាជ្ញាធរអាល្លឺម៉ង់ដែលបានបើកភ្លើងខៀវ អនុញ្ញាតឲ្យមានក្បួនដង្ហែរដ៏គួរឲ្យខ្មាស់អៀនយ៉ាងដូច្នេះ។
ចៅហ្វាយក្រុងប៊ែរឡាំងវិញ បានឆ្លើយតបទៅវិញថា លោកស្រីយល់ពីកំហឹងឈឺចាប់របស់អ៊ុយក្រែន ប៉ុន្តែ អាល្លឺម៉ង់មិនអាចហាមឃាត់បាតុកម្មលើកទង់ជាតិរុស្ស៊ីនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ