សហរដ្ឋអាមេរិកប្រកាសលក់រថក្រោះ២៥០គ្រឿងទៅឱ្យប៉ូឡូញ
នាឱកាសបំពេញទស្សនកិច្ចនៅក្រុងវ៉ាសូវី ប្រទេសប៉ូឡូញ រដ្ឋមន្ត្រីក្រសួងការពារជាតិអាមេរិក លោក ឡូយដ៍ អូស្ទីន បានប្រកាសព្រមព្រៀងលក់រថក្រោះចំនួន២៥០គ្រឿងទៅឱ្យប៉ូឡូញ។ ជាប្រទេសជាប់របងជាមួយនឹងអ៊ុយក្រែន ប៉ូឡូញជាសម្ព័ន្ធមិត្តគន្លឹះដែលសហរដ្ឋអាមេរិកបានបង្កើនការគាំទ្រយោធាកាន់តែខ្លាំងឡើងៗ តាំងពីប៉ុន្មានសប្តាហ៍ចុងក្រោយមកនេះ។
ចុះផ្សាយនៅថ្ងៃ៖
ស្តាប់ - ០១:៤៩
គម្រោងលក់អាវុធរបស់អាមេរិកនេះត្រូវឆ្លងកាត់ការអនុម័តពីព្រឹទ្ធសភាសិន។ ប៉ុន្តែ នេះ“ជាកិច្ចសន្យាទិញ-លក់អាវុធដ៏ចម្បងបំផុតនៃប្រវត្តិសាស្ត្រយោធាប៉ូឡូញ និងជាដំណឹងដ៏សំខាន់សម្រាប់សន្តិសុខជាតិ” នេះជាប្រសាសន៍របស់លោករដ្ឋមន្ត្រីក្រសួងការពារជាតិប៉ូឡូញ នៅពេលបានឮសមភាគីអាមេរិកប្រកាសគម្រោងលក់រថក្រោះប្រភេទ Abrams ចំនួន២៥០គ្រឿងមកឱ្យក្រុងវ៉ាសូវី។ សម្រាប់ប៉ូឡូញ នេះជាការពង្រឹងសមត្ថភាពយោធា និងការការពារជាតិ ដ៏មហាសំខាន់ ព្រោះវ៉ាសូវី មានចេតនាចង់មានរថក្រោះប្រភេទនេះតាំងពីរដូវក្តៅមុខមកម្ល៉េះ។
មានព្រំដែនជាប់អ៊ុយក្រែន ប៉ូឡូញ ជាប្រទេសដែលប្រឆាំងនិងរិះគន់រុស្ស៊ីខ្លាំងជាងគេមួយ ហើយត្រូវបានរុស្ស៊ីចាត់ទុកជាប្រទេសដែលគំរាមកំហែងសន្តិសុខរុស្ស៊ីដ៏ចម្បងមួយដែរ។ ក្នុងបរិបទបច្ចុប្បន្ននេះ វ៉ាសូវី បានគូសបញ្ជាក់ហើយគូសបញ្ជាក់ទៀត ជាច្រើនលើកច្រើនសា ជំហរសាមគ្គីភាពជាសម្ព័ន្ធមិត្តលោកខាងលិច និងអំពីភាពចាំបាច់ដែលត្រូវរារាំងមិនឱ្យរុស្ស៊ីចូលឈ្លានពានអ៊ុយក្រែននិងមិនឱ្យផ្ទុះសង្គ្រាមបាន។
ការទាមទាររបស់ប៉ូឡូញ សមហេតុផល និងបានទទួលចម្លើយតបជាវិជ្ជមានមកវិញពីខាងសហរដ្ឋអាមេរិក។ វ៉ាស៊ីនតោនបានថែមទាំងសម្រេចបញ្ជូនកងកម្លាំងយោធាចំនួន ៤៧០០នាក់បន្ថែមទៀតមកដាក់ពង្រាយនៅក្នុងប្រទេសប៉ូឡូញ។ “លោកពូទីនមិនចង់ឃើញមានកម្លាំងទ័ពនៅក្បែរព្រំដែនខ្លួនទេ តែនេះហើយអូតង់ ! អូតង់ជាសម្ព័ន្ធភាពដ៏ខ្លាំងក្លា” នេះជាសេចក្តីប្រកាសរបស់លោក ឡូយដ៍ អូស្ទីន រដ្ឋមន្ត្រីក្រសួងការពារជាតិអាមេរិកពីទីក្រុងវ៉ាសូវី កាលពីម្សិលមិញ។
តែវ៉ាសូវី ក៏ត្រូវត្រៀមខ្លួនប្រឈមនឹងផលវិបាកដែលអាចកើតឡើងជាយថាហេតុមួយ នោះ គឺលំហូរចរន្តជនភៀសខ្លួនអ៊ុយក្រែន មកកាន់ប៉ូឡូញ ប្រសិនប្រើភាពតានតឹងយោធាមានកាន់តែខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ