WHO សន្យាចាត់វិធានការសមស្របក្នុងសំណុំរឿងចោទប្រកាន់លើនាយកប្រចាំតំបន់អាស៊ីប៉ាស៊ីហ្វិក
នៅថ្ងៃព្រហស្បតិ៍ ទី២៧ មករា អង្គការសុខភាពពិភពលោក WHO បានសន្យាចាត់វិធានការសមស្របទៅលើនាយកប្រចាំតំបន់អាស៊ីប៉ាស៊ីហ្វិកជាជនជាតិជប៉ុនលោកតាកឺស្ហ៊ី កាសៃ។ នាយក WHO ប្រចាំតំបន់អាស៊ីប៉ាស៊ីហ្វិករូបនេះបានរងការចោទប្រកាន់ពីបទប្រកាន់ពូជសាសន៍ និងទង្វើមិនគប្បីមួយចំនួនទៀតទៅលើក្រុមបុគ្គលិកក្រោមឱវាទរបស់ខ្លួន។ តបនឹងការចោទប្រកាន់នេះ លោកកាសៃបានបញ្ជាក់ពីការត្រៀមខ្លួនសហការនៅក្នុងគ្រប់ការស៊ើបអង្កេត។
ចុះផ្សាយនៅថ្ងៃ៖
ស្តាប់ - ០២:០៩
រឿងរ៉ាវជុំវិញនាយក WHO ប្រចាំតំបន់អាស៊ីប៉ាស៊ីហ្វិកលោកតាកឺស្ហ៊ី កាសៃត្រូវបានទម្លាយដំបូងដោយទីភ្នាក់ងារ AP។ យោងតាម AP មានបុគ្គលិកជាច្រើននាក់ដែលស្ថិតក្រោមឱវាទរបស់លោកកាសៃបានដាក់ពាក្យបណ្តឹងផ្ទៃក្នុងកាលពីខែតុលាឆ្នាំ ២០២១។ ក្រោយមកនៅពាក់កណ្តាលខែមករាកន្លងទៅថ្មីៗនេះ ពួកគេក៏បានបញ្ជូនលិខិតមួយទៅឲ្យប្រទេសសមាជិកនៃក្រុមប្រឹក្សាប្រតិបត្តិរបស់អង្គការសុខភាពពិភពលោក WHO។ នៅក្នុងលិខិតនោះ ពួកគេបានចោទលោកតាកឺស្ហ៊ី កាសៃពីបទជាអ្នកដឹកនាំផ្តាច់ការ និងប្រកាន់ពូជសាសាន៍ ពីបទឧស្សាហ៍ចែករំលែកព័ត៌មានសម្ងាត់ផ្ទៃក្នុងជាមួយក្រសួងការបរទេសជប៉ុន ពីបទមិនចង់រិះគន់ទិតៀនចិន ឬមួយពីបទចាយវាយខ្ជះខ្ជាយលុយរបស់ប្រទេសផ្តល់ជំនួយជាដើម។
WHO បានត្រឹមបញ្ជាក់នៅក្នុងលិខិតមួយផ្ញើឲ្យ AFP ថា ខ្លួនពិតជាបានដឹងរឿងនេះ និងសន្យាចាត់វិធានការសមស្រប។ តែមិនបានលំអិតអ្វីបន្ថែមទេ។ ចំណែកលោកតាកឺស្ហ៊ី កាសៃបានថ្លែងពីការត្រៀមខ្លួនចូលរួមសហការយ៉ាងពេញលេញជាមួយនឹងនីតិវិធីស៊ើបអង្កេតលើបញ្ហាដែលបានលើកឡើង ពិសេសទាក់ទងនឹងរចនាបថនៃការគ្រប់គ្រងដោយលោកសន្យាធ្វើការផ្លាស់ប្តូរ។ តែលោកបានច្រានចោលលើការចោទលោកក្នុងរឿងប្រកាន់ពូជសាសន៍។ បន្ទាប់មក លោកកាសៃក៏បានបដិសេធលើការចោទលោកទាក់ទងនឹងរឿងចែករំលែកព័ត៌មានសម្ងាត់ស្តីពីវ៉ាក់សាំងបង្ការកូវីដ១៩ ជាមួយរដ្ឋាភិបាលជប៉ុន។
យ៉ាងណាក៏ដោយ ប្រទេសបារាំងក៏ដូចអង់គ្លេសបានប្រាប់ឲ្យដឹងពីការតាមដានរឿងរ៉ាវមួយនេះយ៉ាងយកចិត្តទុកដាក់ជាទីបំផុត។ បេសកកម្មបារាំងប្រចាំ WHO ក្នុងក្រុងហ្សឺណែវបានបញ្ជាក់ប្រាប់ AFP ថា បើការចោទប្រកាន់លោកតាកឺស្ហ៊ី កាសៃជារឿងពិតមែន នោះអគ្គនាយក WHO លោកទេដ្រូសជាអ្នកចាត់វិធានការដែលលោកយល់ថាសមស្រប ហើយបើចាំបាច់ លោកទេដ្រូសអាចពិគ្រោះយោបល់ជាមួយក្រុមប្រឹក្សាប្រតិបត្តិ WHO ដើម្បីបញ្ចប់តំណែងលោកកាសៃជាយថាហេតុ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ