សវនាការជំនុំជម្រះករណីភេរវកម្ម១៣វិច្ឆិកាចាប់បើកធ្វើនៅប៉ារីស
ជនជាប់ចោទចំនួន ២០នាក់, មេធាវី ៣៣០នាក់, ដើមបណ្តឹងរដ្ឋប្បវេណីជិត ១៨០០នាក់... សវនាការ ដែលគេចាត់ទុកជាប្រវត្តិសាស្រ្តមួយ ចាប់ផ្តើមបើកធ្វើ នៅថ្ងៃពុធ ៨កញ្ញានេះ ដើម្បីជំនុំជម្រះលើករណីភេរវកម្ម នៅទីក្រុងប៉ារីស កាលពីថ្ងៃទី១៣ ខែវិច្ឆិកា ឆ្នាំ២០១៥កន្លងទៅ។
ចុះផ្សាយនៅថ្ងៃ៖
ភេរវកម្ម នៅយប់ថ្ងៃទី១៣ ខែវិច្ឆិកា ឆ្នាំ២០១៥ ដែលមានទាំងការបំផ្ទុះគ្រាប់បែកអត្តឃាត នៅក្រៅកីឡាដ្ឋានជាតិ ការចាប់ចំណាប់ខ្មាំងក្នុងសាលប្រគំតន្ត្រីបាតាក់ឡង់ (Batacklan) និងការបាញ់រះនៅតាមហាងមួយចំនួន ក្នុងនោះក៏មានទាំងភោជនីយដ្ឋានខ្មែរឈ្មោះ Le Petit Cambodge មួយផងដែរ បានបណ្តាលឲ្យមនុស្ស ១៣០នាក់ត្រូវបាត់បង់ជីវិត និង៣៥០នាក់រងរបួស។
៦ឆ្នាំ ក្រោយភេរវកម្ម ដំណើរការកាត់ទោសជនជាប់ចោទ ចាប់ផ្តើមបើកធ្វើនៅថ្ងៃពុធនេះ ក្រោមការចាត់វិធានការសន្តិសុខយ៉ាងតឹងរ៉ឹង ក្នុងបរិបទនៃការគំរាមកំហែងភេរវកម្ម ដែលនៅតែមាន ក៏ដូចជា នៅក្នុងបរិបទនៃវិបត្តិកូវីដ។ សវនាការនេះធ្វើឡើង នៅចំពោះមុខតុលាការព្រហ្មទណ្ឌពិសេស នៅក្នុងសាលសវនាការ ដែលត្រូវបានសាងសង់ឡើងជាពិសេស សម្រាប់ដំណើរការជំនុំជម្រះ ដែលគេចាត់ទុកថាជាប្រវត្តិសាស្ត្រ។
ក្នុងចំណោមជនជាប់ចោទទាំង២០នាក់ មានតែម្នាក់ប៉ុណ្ណោះ គឺ សាឡា អាប់ដេស្លាម ដែលជាប់សង្ស័យថាស្ថិតក្នុងក្រុមភេរវជន ដែលជាជនដៃដល់។ ចំណែកឯក្រៅពីនោះ ជាប់សង្ស័យថា ជាមេគំនិត ឬជាអ្នកសមគំនិត។ ភេរវជនដែលជាជនដៃដល់ផ្សេងទៀត ត្រូវបានស្លាប់ នៅក្នុងហេតុការណ៍ភេរវកម្ម ដោយខ្លះស្លាប់ក្នុងការបំផ្ទុះគ្រាប់បែកអត្តឃាត ហើយខ្លះទៀត ស្លាប់ក្នុងការប្រយុទ្ធតទល់នឹងកម្លាំងប៉ូលិស។
លោកហ្វ្រង់ស័រ ហូឡង់ ដែលជាប្រធានាធិបតីបារាំង នៅក្នុងអំឡុងពេលមានភេរវកម្ម ហើយដែលនឹងចូលរួមក្នុងសវនាការក្នុងនាមជាសាក្សី បានថ្លែងក្នុងបទសម្ភាសន៍ជាមួយវិទ្យុបារាំងអន្តរជាតិថា ដំណើរការកាត់ទោសនេះមានសារៈសំខាន់ សម្រាប់ជាប្រវត្តិសាស្រ្តផង ហើយវាក៏សំខាន់ផងដែរ សម្រាប់ក្រុមគ្រួសារជនរងគ្រោះ ដែលចង់ដឹងលម្អិត អំពីអ្វីដែលបានកើតឡើង។
ដំណើរការកាត់ទោសនេះនឹងត្រូវធ្វើរហូតដល់ចុងខែឧសភា ឆ្នាំ២០២២ ពោលគឺ ត្រូវមានរយៈពេលសរុបរហូតដល់ទៅជិត ៩ខែ ហើយត្រូវថតជាវីដេអូទុកជាឯកសារប្រវត្តិសាស្រ្ត។
អ្នកនាំពាក្យរដ្ឋាភិបាលបារាំងវិញ បានលើកឡើង អំពីហានិភ័យផ្នែកសន្តិសុខ ចំពោះដំណើរការកាត់ទោសនេះ។ ហេតុដូច្នេះហើយបានជានៅជុំវិញទីតាំងសវនាការ វិធានការសន្តិសុខត្រូវបានគេរឹតបន្តឹងយ៉ាងតឹងតែង។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ