អាល្លឺម៉ង់និងហូឡង់ ផ្អាកការបញ្ជូនជនចំណាកស្រុកត្រលប់ទៅអាហ្វហ្កានីស្ថានវិញ
ប្រទេសអាល្លឺម៉ង់ និងហូឡង់ ប្រកាសកាលពីថ្ងៃពុធ ១១សីហា ថាបានផ្អាកគម្រោងបញ្ជូនជនចំណាកស្រុកត្រលប់ទៅអាហ្វហ្កានីស្ថានវិញ។ ការប្រកាសនេះធ្លាក់មកដោយហេតុថាសន្តិសុខនៅក្នុងប្រទេសអាហ្វហ្កានីស្ថានកាន់តែធ្លាក់យ៉ាប់យ៉ឺនខ្លាំង ហើយក្រុមតាលីបង់វិញក៏នៅតែសម្រុកវាយដណ្តើមកាន់កាប់ទីតាំងសំខាន់ៗបានកាន់តែច្រើន។
ចុះផ្សាយនៅថ្ងៃ៖
ស្តាប់ - ០២:១០
រដ្ឋាភិបាលអាល្លឺម៉ង់នឹងបញ្ឈប់ការបញ្ជូនជនចំណាកស្រុកអាហ្វហ្គានីស្ថានទៅកាន់ស្រុកកំណើតជាបណ្តោះអាសន្នសិន ដោយសារតែស្ថានភាពសន្តិសុខនៅទីនោះកាន់តែធ្លាក់ដុនដាបខ្លាំង។ នេះបើយោងតាមក្រសួងមហាផ្ទៃអាល្លឺម៉ង់ប្រាប់សារព័ត៌មាន DW នៅថ្ងៃពុធ ១១ សីហា។
សេចក្តីសម្រេចរបស់អាល្លឺម៉ង់នេះ ធ្លាក់មកទន្ទឹមគ្នានឹងប្រទេសហូឡង់ដែលបានប្រកាសផ្អាកការបញ្ជូនជនចំណាកស្រុក ត្រលប់ទៅអាហ្វហ្កានីស្ថានវិញ រយៈពេល ៦ ខែ។ អ្នកនាំពាក្យក្រសួងមហាផ្ទៃអាល្លឺម៉ង់ លោក Steve Alter បាននិយាយថាមានជនជាតិអាហ្វហ្កានីស្ថានចំនួនជិត ៣ ម៉ឺននាក់ កំពុងស្នាក់នៅនិងស្វែងរកសិទ្ធិជ្រកកោនក្នុងប្រទេសអាល្លឺម៉ង់។
ពីខាងទីក្រុងឡាអេវិញ រដ្ឋមន្ត្រីក្រសួងយុត្តិធម៌និងសន្តិសុខហូឡង់ លោកស្រី អានឃីប្រូកឃើរ-ខ្នុល (Ankie Broekers-Knol) បានសរសេរ នៅក្នុងលិខិតមួយទៅកាន់សភាហូឡង់ថា ការពន្យារនេះនឹងត្រូវអនុវត្តរយៈពេល ៦ ខែ ហើយនឹងអនុវត្តចំពោះរាល់ជនបរទេសដែលមានសញ្ជាតិអាហ្វហ្កានីស្ថាន។
គួរបញ្ជាក់ថា សេចក្តីសម្រេចរបស់អាល្លឺម៉ង់និងហូឡង់ កាលថ្ងៃពុធម្សិលមិញខុសគ្នាផ្ទុយស្រឡះពីគោលជំហររបស់ពួកគេកាលពីមុន។ ទាំងអាល្លឺម៉ង់ និងហូឡង់កាលពីថ្ងៃអង្គារ ១០ សីហា បានចូលរួមជាមួយប្រទេសអឺរ៉ុប៤ ផ្សេងទៀតរួមមាន អូទ្រីស បែលហ្ស៊ិក ដាណឺម៉ាក និងក្រិក ជំរុញការបញ្ជូនជនចំណាកស្រុកអាហ្វហ្កានីស្ថានត្រលប់ទៅស្រុកកំណើតវិញ ប្រសិនបើការស្នើសុំសិទ្ធិជ្រកកោនរបស់ ពួកគេទទួលបរាជ័យ។
យ៉ាងណាក៏ដោយ គេមិនទាន់ដឹងនៅឡើយនោះទេថាប្រទេសអឺរ៉ុប ៤ ផ្សេងទៀតប្តូរគោលជំហរដូចអាល្លឺម៉ង់ និងហូឡង់ឬក៏អត់។ ក៏ប៉ុន្តែ សេណារីយ៉ូដែលប្រទេសទាំងអស់នោះសម្រេចដូចគ្នា ផ្អាកការបញ្ជូនជនចំណាកស្រុកទៅអាហ្វហ្កានីស្ថាន គឺជាអ្វីដែលក្រុមអង្គការសមាគមទន្ទឹងរងចាំជាទីបំផុត។
គួរជ្រាបដែរថា កាលពីខែកក្កដាកន្លងទៅ រដ្ឋាភិបាលក្រុងកាប៊ុលបានទទូចសុំសហភាពអឺរ៉ុបឲ្យផ្អាកការបញ្ជូនជនចំណាកស្រុកអាហ្វហ្កានីស្ថានរយៈពេល ៣ ខែសិន ព្រោះថាទាហានរដ្ឋាភិបាលអាហ្វហ្កានីស្ថាន កំពុងនៅតស៊ូប្រយុទ្ធប្រឆាំងនឹងការវាយលុកយ៉ាងសន្ធឹកពីសំណាក់ពួកតាលីបង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ