ប្រទេសហូឡង់កំពុងតក់ស្លុតនឹងទង្វើបាញ់ប្រហារលើអ្នកកាសែត កណ្តាលក្រុង
អ្នកកាសែតជនជាតិហូឡង់ មានជំនាញខាងស៊ើបអង្កេតបទឧក្រិដ្ឋធំៗ ដែលរងការគំរាមកំហែងសម្លាប់ ត្រូវបានជនមិនស្គាល់បាញ់ ឱ្យរងរបួសយ៉ាងធ្ងន់ធ្ងរ នៅក្បាល កាលពីល្ងាចថ្ងៃអង្គារ ទី ៦ កក្កដា ២០២១ នៅកណ្តាលក្រុងអាំស្ទែរដាំ។ នាយករដ្ឋមន្ត្រីប្រទេសហូឡង់ ក៏ដូចជាប្រធានក្រុមបឹក្សាសហភាពអឺរ៉ុប បានថ្លែងសារថ្កោលទោសភ្លាមការប៉ុនប៉ងធ្វើឃាតអ្នកកាសែតនេះ ដោយអះអាងថា នេះជាទង្វើឧក្រិដ្ឋកម្មប្រឆាំងនឹងសេរីភាពសារព័ត៌មាន ជាការវាយប្រហារលទ្ធិប្រជាធិបតេយ្យនិងនីតិរដ្ឋ។
ចុះផ្សាយនៅថ្ងៃ៖
ស្តាប់ - ០២:២៨
ការបាញ់ប្រហារលើរូបលោកPeter R. de Vries កំពុងធ្វើឱ្យប្រទេសហូឡង់ ស្ថិតក្នុងស្ថានភាពរន្ធត់យ៉ាងខ្លាំង ព្រោះលោកជាឥស្សរជនឈ្មោះបោះសំឡេងខ្លាំងម្នាក់នៅក្នុងប្រទេស។ លោកធ្លាប់ចេញមុខចេញមាត់ជាញឹកញយតាមកញ្ចក់ទូរទស្សន៍ ក្នុងនាមជាពិធីករទូរទស្សន៍វ័យ៦៤ឆ្នាំ និងអ្នកកាសែតស៊ើបអង្កេត។ លោកមានស្នាដៃច្រើន និងត្រូវបានគេទទួលស្គាល់ថាមនុស្សតស៊ូពុំពារ ដើម្បីស្វែងរកការពិតជូនជនរងគ្រោះ ក្នុងសំណុំរឿងឧក្រិដ្ឋកម្មធំៗ។
កាន់តែកត់ស្លុតទៀតនោះ ពលរដ្ឋហូឡង់ហាក់មានអារម្មណ៍ថា នីតិរដ្ឋកំពុងរងការប្រហារ ជាថ្មីម្តងទៀត។ កាលពីខែកញ្ញាឆ្នាំ២០១៩ មានករណីបាញ់សម្លាប់មេធាវីម្នាក់កណ្តាលរដ្ឋធានីអាំស្ទែរដាំ ដោយហេតុតែមេធាវីនោះបានការពារសាក្សីសំខាន់ម្នាក់ក្នុងសំណុំរឿងឃាតកម្មសម្លាប់មនុស្សនៅកន្លែងលក់គ្រឿងញៀន។ ហើយមួយរយៈក្រោយមកនេះ លោក Peter de Vries បានក្លាយជាមនុស្សជំនិតបំផុតរបស់សាក្សីនោះ។
គេនៅមិនទាន់ដឹងថាតើជនដៃដល់ជានរណា និងអំពីមូលហេតុនៃការបាញ់ទេ។ ប៉ូលិសចាប់បានភ្លាមជនសង្ស័យបីនាក់ ដែលក្នុងនោះម្នាក់ទំនងជាបាញ់ផង។ ការអង្កេតទើបចាប់ផ្តើម។ប៉ុន្តែសារព័ត៌មានហូឡង់ជាច្រើន បានរំលឹកអំពីការព្រួយបារម្ភតាំងពីពីរឆ្នាំមកហើយខ្លាចក្រែង តែលោក ពីទ័រ ជាមនុស្សបន្ទាប់ក្នុងបញ្ជីខ្មៅរបស់ពួកឧក្រិដ្ឋជនគ្រឿងញៀន។
នាយករដ្ឋមន្ត្រី ព្រមទាំងរដ្ឋមន្ត្រីក្រសួងយុត្តិធម៌ និងសន្តិសុខជាតិ បានចុះទៅដល់ទីស្នាក់ការភ្នាក់ងារសន្តិសុខជាតិប្រយុទ្ធប្រឆាំងនឹងអំពើភេរវកម្មភ្លាម ដើម្បីពិគ្រោះពិភាក្សាអំពីសំណុំរឿងនេះ។ សម្រាប់លោកនាយករដ្ឋមន្ត្រីហូឡង់ ក៏ដូចជាប្រធានគណៈកម្មការអឺរ៉ុប ទង្វើបាញ់ប្រហារអ្នកកាសែតនេះ ជាការបាញ់ប្រហារសេរីភាពសារព័ត៌មាន។ គ្រប់គ្នាសុទ្ធតែបានថ្លែងថ្កោលទោស និងសម្តែងសាមគ្គីភាពចំពោះលោក Peter de Vrie ដែលកំពុងស្ថិតក្នុងស្ថានភាពធ្ងន់ធ្ងរខ្លាំងអាចដល់ថ្នាក់ស្លាប់។ អ្នកសារព័ត៌មានអឺរ៉ុប ត្រូវអាចធ្វើការអង្កេត លើសំណុំរឿងឧក្រិដ្ឋកម្ម ពុករលួយ ដោយគ្មានភ័យព្រួយអំពីសន្តិសុខសុវត្ថិភាពផ្ទាល់ខ្លួន។ នេះបើតាមសេចក្តីប្រកាសរបស់របស់តំណាងគណៈកម្មការការពារអ្នកកាសែតនៃសមាគមការពារសេរីភាពសារព័ត៌មាន ដែលមានទីស្នាក់ការនៅសហរដ្ឋអាមេរិក។
បើតាមចំណាត់ថ្នាក់ចុងក្រោយរបស់អង្គការអ្នកយកការណ៍គ្មានព្រំដែនស្តីអំពីសេរីភាពសារព័ត៌មាន ប្រចាំឆ្នាំ២០២១ ប្រទេសហូឡង់ជាប់ចំណាត់ថ្នាក់លេខ៦ ក្នុងចំណោម១៨០ប្រទេស បន្ទាប់ពីន័រវេស ហ្វាំងឡង់ ស៊ុយអែត ដាណឺម៉ាក និងកូស្តារីកា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ