ប៉ូលិសបារាំងម្នាក់ត្រូវឃាតករចាក់សម្លាប់ នៅច្រកទ្វារចូល ស្នងការដ្ឋាន
អាយ្យការបារាំងប្រឆាំងអំពើភេរវកម្ម បានបើកការស៊ើបអង្កេត នៅក្រោយ ប៉ូលិសស្រីម្នាក់ ត្រូវឃាតករ ចូលចាក់សម្លាប់ នៅនឹងមាត់ទ្វារចូល ស្នងការដ្ឋាន ក្នុងទីក្រុង រាំប៊ួយយេ (Rambouillet)ភាគខាងត្បូងទីក្រុងប៉ារីស កាលពីរសៀលថ្ងៃសុក្រ ម្សិលមិញ។ ឃាតករ ត្រូវប៉ូលិសបាញ់ឲ្យរបួសភ្លាមៗ មុននឹងដាច់ខ្យល់ស្លាប់ នៅមន្ទីរពេទ្យ។ នៅមុនធ្វើដំណើរទៅកាន់កន្លែងកើតហេតុ នៅថ្ងៃសុក្រ នាយករដ្ឋមន្រ្តី បារាំង លោកហ្សង់ កាស្តិច បានសរសេរសារទ្វីត ចាត់ទុក ទង្វើរបស់ឃាតករ ថា ព្រៃផ្សៃ និងកំសាក ប្រព្រឹត្តទៅលើមន្រ្តីប៉ូលិសជាតិបារាំង។
ចុះផ្សាយនៅថ្ងៃ៖
ស្តាប់ - ០២:១៧
ហេតុការណ៍ចាក់សម្លាប់ប៉ូលិសបារាំង កើតឡើងនៅពេលរសៀលថ្ងៃសុក្រ នៅស្នងការដ្ឋានប៉ូលិស ដែលស្ថិតនៅ ចម្ងាយប្រមាណ ៦០គីឡូម៉ែត្រពីទីក្រុងប៉ារីស។ ជនរងគ្រោះជាប៉ូលិសស្រី អាយុ ៤៩ឆ្នាំ បម្រើការផ្នែករដ្ឋបាលនៅស្នងការដ្ឋាននៅទីក្រុងRambouillet ដែលត្រូវឧក្រិដ្ឋជន ប្រើកាំបិត ចាក់សម្លាប់ នៅពេលត្រលប់មកពី ទទួលទានអាហារថ្ងៃត្រង់។
ភ្លាមៗ ឧក្រិដ្ឋជនត្រូវប៉ូលិសបាញ់ រងរបួសធ្ងន់ មុននឹងដាច់ខ្យល់ស្លាប់នៅ មន្ទីរពេទ្យ។ តាមប៉ូលិសបារាំង ឃាតករមានដើមកំណើតទុយណេស៊ី អាយុ ៣៦ឆ្នាំ ដែលបានមកដល់ប្រទេសបារាំង ដោយខុសច្បាប់ កាលពីឆ្នាំ ២០០៩។ ជនដៃដល់ដែលក្រោយ មក បានក្រដាសស្នាមរស់នៅស្របច្បាប់ នៅបារាំង គ្មានឈ្មោះ ក្នុងបញ្ជីខ្មៅ តាមដានរបស់ទីភ្នាក់ងារស៊ើបការណ៍សម្ងាត់បារាំងនោះទេ។
នៅពេលគេមិនទាន់ដឹងពីមូលហេតុ ចេតនា ពិតប្រាកដរបស់ឧក្រិដ្ឋជន សាក្សីនៅក្បែរកន្លែងកើតហេតុបាននិយាយថា គេបានលឺឃាតករស្រែក ព្រះអាឡា ដ៏ធំអស្ចារ្យ នៅក្នុងពេលប្រព្រឹត្តបទឧក្រិដ្ឋរបស់ខ្លួន។
តាមរដ្ឋអាជ្ញាបារាំង លោកJean François Ricard អាយ្យការជាតិប្រឆាំងភេរវកម្ម បានសម្រេចបើកការស៊ើបអង្កេត ក្នុងសំណុំរឿងនេះ ដោយយោងទៅលើតួនាទីជាប៉ូលិសរបស់ជនរងគ្រោះ ហើយ និង សំដីសំដៅ របស់ឃាតករ។
សម្រាប់នាយករដ្ឋមន្រ្តី បារាំង លោកហ្សង់ កាស្តិច ដែលបានធ្វើដំណើរទៅដល់កន្លែងកើតហេតុការណ៍ ការប្តេជ្ញាចិត្តរបស់បារាំង ដើម្បី ប្រយុទ្ធប្រឆាំងក្រុមភេរវនិយម នៅតែដូចដើម មិនផ្លាស់ប្តូរ។
នៅមុន រលាយ បែកខ្ចាត់ខ្ចាយ សំបុក នៅទឹកដីស៊ីរី និងអ៊ីរ៉ាក់ ក្រុមជីហាតអង្គការរដ្ឋអ៊ីស្លាម តែងអំពាវនាវឲ្យអ្នកគាំទ្ររបស់ខ្លួន សំដៅ ចាក់សម្លាក់ មន្រ្តីប៉ូលិស កងកម្លាំងរក្សាសន្តិសុខនៅក្នុងប្រទេសលោកខាងលិច។ សោកនាដកម្មថ្មីបានធ្វើឲ្យនឹកទៅដល់ ហេតុការណ៍ឆ្នាំ ២០១៦ ដែលនៅពេលនោះ ប៉ូលិស ប្តីប្រពន្ធបារាំងពីរនាក់ ត្រូវភេរវជន ជីហាត ចូលចាក់សម្លាប់ដល់ផ្ទះ។ នៅខែតុលាឆ្នាំមុន គឺគ្រូបង្រៀន Samuel Paty ត្រូវឃាតករចាក់សម្លាប់នឹងកាំបិត ដោយសារលោក បង្ហាញរូបត្លុក ព្យាការី មហាម៉េត នៅក្នុងម៉ោង បង្រៀនអប់រំ ពីសិទ្ធិសេរីភាព បញ្ចេញមតិ នៅប្រទេសបារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ