អេស្ប៉ាញរងគ្រោះពីព្យុះទឹកកកដ៏ច្រើនសម្បើមមិនធ្លាប់មានក្នុងប្រវត្តិសាស្ត្រ
ប្រទេសអេស្ប៉ាញកំពុងរងគ្រោះខ្លាំងពីព្យុះទឹកកកក្នុងរដូវរងារនាដើមឆ្នាំ ២០២១ នេះ។ ព្យុះទឹកកកបានបណ្តាលឲ្យមនុស្ស ៣នាក់ស្លាប់ និងបង្កជាភាពច្របូកច្របល់ស្ទើរពាសពេញផ្ទៃនៃប្រទេសអេស្ប៉ាញ ដោយមានយានយន្តជាច្រើនត្រូវជាប់គាំងលែងអាចធ្វើដំណើរទៅមកដូចធម្មតាបាន។ ទាំងផ្លូវដែកនិងផ្លូវអាកាសក្នុងក្រុងម៉ាឌ្រីដ ត្រូវបានប្រកាសផ្អាកដំណើរការដោយសារតែព្រឹលចេះតែបន្តធ្លាក់ខ្លាំងឥតឈប់នៅថ្ងៃសៅរ៍ ទី៩ មករា។
ចុះផ្សាយនៅថ្ងៃ៖
ស្តាប់ - ០២:១៣
ចាប់តាំងតែពីថ្ងៃសុក្រមកម្ល៉េះ ប្រទេសអេស្ប៉ាញបានជួបនឹងព្រឹលទឹកកកដែលធ្លាក់ក្នុងចំនួនដ៏ច្រើនសម្បើមមិនធ្លាប់ជួបនោះទេចាប់តាំងពីឆ្នាំ ១៩៧១ មក។ ភ្នាក់ងារអាកាសធាតុអេស្ប៉ាញ បានប្រកាសប្រាប់ថាចំនួនព្រឹលដែលធ្លាក់ដ៏ច្រើននិងខ្លាំងខុសពីធម្មតានេះ បង្កឡើងដោយព្យុះហ្វីឡូមេណា (Filomena)។
ព្យុះហ្វីឡូមេណា បានគ្របដណ្តប់ផ្នែកជាច្រើននៃប្រទេសអេស្ប៉ាញជាមួយនឹងព្រិលដែលធ្លាក់ខ្លាំង ហើយពាក់កណ្តាលនៃប្រទេសនេះបានប្រកាសពីភាពអាសន្នអំពីព្យុះព្រឹលទឹកកកនៅថ្ងៃសៅរ៍។ ភ្នាក់ងារអាកាសធាតុអេស្ប៉ាញ បានព្រមានថាចំនួនព្រឹលក្នុងកម្ពស់រហូតដល់ ២០ សង់ទីម៉ែត ឬស្មើជិត ៨ អ៊ីញ ទំនងជាអាចនឹងធ្លាក់ចុះនៅថ្ងៃសៅរ៍ក្នុងទីក្នុងម៉ាឌ្រីដ និងតំបន់ទំនាបកណ្តាលរបស់អេស្ប៉ាញ។ គេរំពឹងថា ព្រឹលនឹងបន្តធ្លាក់រហូតដល់កម្ពស់ខ្ពស់បំផុត ៥០ សង់ទីម៉ែត។
រដ្ឋមន្រ្តីក្រសួងមហាផ្ទៃអេស្ប៉ាញលោក Fernando Grande-Marlaska បានប្រាប់សន្និសីទសារព័ត៌មានមួយថា បើទោះបីជាអាកាសធាតុបង្កជាភាពលំបាកខ្លាំងយ៉ាងណាក៏ដោយ ដ៏ចំនួនឧប្បត្តិហេតុគ្មានច្រើននោះទេ។ លោកបន្តទៀតថា មកទល់នឹងថ្ងៃសៅរ៍ ទី៩ មករា មានមនុស្ស ៣ នាក់ ត្រូវបានរាយការណ៍ថាស្លាប់។
បុរសវ័យ ៥៤ ឆ្នាំម្នាក់ត្រូវបានគេប្រទះឃើញដេកស្លាប់នៅក្រោមព្រឹលនៅទីក្រុង Zarzalejo ភាគពាយព្យទីក្រុងម៉ាឌ្រីដ ហើយមនុស្សពីរនាក់ផ្សេងទៀតត្រូវទឹកគួចទៅបាត់នៅជិតភាគខាងត្បូងទីក្រុង Malaga។
នៅពេលព្រឹលចាប់ធ្លាក់ខ្លាំងកាលល្ងាចថ្ងៃសុក្រក្នុងក្រុងម៉ាឌ្រីដ គេប្រទះឃើញ រថយន្តមួយចំនួន បានជាប់គាំង នៅលើផ្លូវហាយវេក្បែររដ្ឋធានី។ រំពេចភ្លាមនោះ អាជ្ញាធរក៏បានប្រកាសផងដែរផ្អាកដំណើរការផ្លូវដែកនិងផ្លូវអាកាសក្នុងក្រុងម៉ាឌ្រីដ។
តាមរយៈសារធ្វីត នាយករដ្ឋមន្រ្តីអេស្ប៉ាញលោពេដ្រូ សានឆេ (Pedro Sanchez) បានអំពាវនាវឲ្យប្រជាជនស្នាក់នៅក្នុងផ្ទះ និងអនុវត្តតាមការណែនាំរបស់ភ្នាក់ងារសង្គ្រោះបន្ទាន់។ ទន្ទឹមគ្នានេះ លោកនាយករដ្ឋមន្ត្រីអេស្ប៉ាញ ក៏បានសម្តែងនូវការគោរពចំពោះកិច្ចខិតខំប្រឹងប្រែងរបស់ភ្នាក់ងារជួយសង្គ្រោះ ក្នុងការជួយមនុស្សចំនួនរាប់រយនាក់ដែលរងគ្រោះជាប់នៅក្នុងព្រឹល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ