បារាំងរឹតបន្តឹងការត្រួតពិនិត្យព្រំដែន ឆ្លងចូលពីអេស្ប៉ាញ
សមត្ថកិច្ចបារាំង បានបន្ថែមការយាមល្បាត ត្រួតពិនិត្យយ៉ាងតឹងតែង នៅតាមច្រកព្រំដែន ជាមួយអាស្ប៉ាញ។ ការរឹតបន្តឹងវិធានការត្រួតពិនិត្យនេះ គឺបន្ទាប់ពីមានជនអន្តោប្រវេសន៍ខុសច្បាប់ជាច្រើនពាន់នាក់ បានឆ្លងពីទ្វីបអាហ្វ្រិក មកកាន់ប្រទេសអេស្ប៉ាញ។ ហើយមួយវិញទៀត បារាំងកំពុងតែចាត់វិធានការប្រុងប្រយ័ត្នខ្ពស់ បន្ទាប់ពីកើតហេតុអំពើភេរវកម្មសម្លាប់មនុស្ស នៅទីក្រុងនីស បង្កឡើងដោយជនអ៊ីស្លាមជ្រុលនិយម ដែលជាជនអន្តោប្រវេសន៍ខុសច្បាប់។
ចុះផ្សាយនៅថ្ងៃ៖
ស្តាប់ - ០២:២៤
សមត្ថកិច្ចនគរបាលព្រំដែនបារាំង បានធ្វើការត្រួតពិនិត្យជាស្វ័យប្រវត្តិ ចំពោះអ្នកដំណើរទាំងអស់ ដែលឆ្លងចូលទឹកដីបារាំង ពីប្រទេសអេស្ប៉ាញ តាមច្រកភាគខាងត្បូង។ មិនថា តាមរថភ្លើង ឬតាមរថយន្ត ព្រមទាំងតាមផ្លូវវាងតូចៗក្នុងគំពតព្រៃជាដើម គឺសមត្ថកិច្ចបារាំង បានបន្ថែមកម្លាំង ដើម្បីតាមស្ទាក់ ជនអន្តោប្រវេសន៍ខុសច្បាប់។
អ្នកដែលមានលិខិតអនុញ្ញាតឲ្យធ្វើដំណើរ ចូលក្នុងទឹកដីបារាំង ដោយស្របច្បាប់ ត្រូវបញ្ជូនទៅកាន់ប្រទេសអេស្ប៉ាញវិញ ភ្លាមៗក្នុងរយៈពេល៤ម៉ោង ដោយយោងទៅលើកិច្ចព្រមព្រៀងម៉ាឡាហ្កា ចុះឆ្នាំ២០០២។ ជាមួយនឹងវិធានការរិតបន្តឹងថ្មីនេះ សមត្ថកិច្ចព្រំដែនបារាំង មានកម្លាំងច្រើននាក់ ដែលអាចឆែកឆេរ បានទាំងថ្ងៃទាំងយប់ នៅតាមមធ្យោបាយធ្វើដំណើរ។ សមត្ថកិច្ចក៏បានប្រើយានដ្រូនផងដែរ ដើម្បីតាមដានពីលើផ្លូវវាងតូចៗ តាមជ្រលងភ្នំ នៅតាមបណ្តោយឆ្នេរសមុទ្រ។
លោក Yannick Garden ប្រធានក្រុមនគរបាលព្រំដែន តំបន់ពីរ៉េណេខាងកើត បានលើកឡើងថា បើប្រៀបធៀបទៅឆ្នាំ២០១៩ ចំនួននៃការចាប់ស្ទាក់ជនអន្តោប្រវេសន៍ខុសច្បាប់ បានកើនឡើងចំនួន២៥% ក្នុងរវាង៣ខែដើមឆ្នាំ២០២០ ហើយនៅរវាងខែកក្កដា ដល់ខែកញ្ញា គឺបានកើនឡើង៥០%។ បើគិតចាប់ពីដើមឆ្នាំ២០២០មក សមត្ថកិច្ច បានស្ទាក់បានជនអន្តោប្រវេសន៍ខុសច្បាប់ ឆ្លងចូលបារាំងពីអេស្ប៉ាញ ចំនួនប្រមាណ១១០០០នាក់។
គួរបញ្ជាក់ថា ប៉ុន្មានខែចុងក្រោយនេះ មានជនភៀសខ្លួន និងជនអន្តោប្រវេសន៍ជាច្រើនពាន់នាក់ បានធ្វើដំណើរតាមទូក ឆ្លងពីទ្វីបអាហ្វ្រិក មកកាន់ប្រទេសអេស្ប៉ាញ ត្រង់តំបន់អង់ដាលូហ្ស៊ី ដោយហេតុថា ផ្លូវឆ្លងចូលតាមប្រទេសអ៊ីតាលី មានឧបសគ្គច្រើន និងចាល់មនុស្សខ្លាំង។ ជនអន្តោប្រវេសន៍ទាំងនោះ មានចំរុះ ខ្លះមកពីប៉ាគីស្ថាន អាហ្វហ្កានីស្ថាន ប្រទេសអាហ្វ្រិកភាគខាត្បូងសាហារ៉ា និងប្រទេសអាហ្វ្រិកខាងជើង ម៉ារ៉ុក អាល់ហ្សេរីជាដើម។
នៅក្រោយអំពើភេរវកម្មនៅទីក្រុងនីស បង្កឡើងដោយជនអន្តោប្រវេសន៍សញ្ញាតិទុយណេស៊ី ដែលបានចូលមកបារាំងដោយខុសច្បាប់ រដ្ឋាភិបាលបាលបារាំង បានចេញវិធានតឹងតែង ក្នុងការគ្រប់គ្រងព្រំដែន។ លោកប្រធានាធិបតីម៉ាក្រុង បានលើកឡើងថា លោកមានបំណងធ្វើកំណែទម្រង់ស៊ីជំរៅ ទៅលើបទវិធានគ្រប់គ្រងព្រំដែនផ្ទៃក្នុងសហភាពអឺរ៉ុប ក្នុងតំបន់ឆិនហ្គិន ដើម្បីធ្វើយ៉ាងណា ទប់ស្កាត់លំហូរជនអន្តោប្រវេសន៍ខុសច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ