៥ឆ្នាំក្រោយភេរវកម្មនៅប៉ារីស បារាំងនៅតែប្រឈមខ្លាំងនឹងការគំរាមកំហែងពីក្រុមភេរវនិយម
ប្រទេសបារាំង ប្រារព្ធខួប៥ឆ្នាំនៃការវាយប្រហារភេរវកម្ម ដែលបានសម្លាប់មនុស្ស១៣០នាក់ និងរបួស ៣៥០នាក់ កាលពី យប់ថ្ងៃសុក្រទី១៣វិច្ឆិកា ឆ្នាំ ២០១៥។ នៅក្នុងកាលៈទេសៈដែលប្រទេសកំពុងចាត់វិធានការបិទទីក្រុង ដើម្បី ទប់ស្កាត់ការឆ្លងរាតត្បាតជំងឺកូវីដ ពិធីគោរពវិញ្ញាណក្ខន្ធជនរងគ្រោះ នៅតាមកន្លែងដែលរងគ្រោះដោយ ការវាយប្រហារភេរវកម្ម ត្រូវបានធ្វើឡើងដោយត្បិតត្បៀត ជាមួយ ការចូលរួមដ៏តិចបំផុត។ នៅព្រឹកថ្ងៃសុក្រទី ១៣វិច្ឆិកា២០២០ លោកនាយករដ្ឋមន្រ្តី ហ្សង់ កាស្តិចត្រូវអមដំណើរដោយរដ្ឋមន្រ្តីក្រសួងមហាផ្ទៃ រដ្ឋមន្រ្តីយុត្តិធម៌ និងចៅហ្វាយក្រុងប៉ារីស លោកស្រី អាន អ៊ីដាល់ហ្កូ ដើម្បី ដាក់កម្រងផ្កានៅ កន្លែងដែលរងការវាយប្រហាររបស់ក្រុមកងកុម្មង់ដូរ ភេរវជនកាលពី ៥ឆ្នាំមុន។
ចុះផ្សាយនៅថ្ងៃ៖
កាលពី ៥ឆ្នាំមុន នៅ ថ្ងៃទី ១៣វិច្ឆិកា បារាំង បានរងការវាយប្រហារភេរវកម្មសម្លាប់មនុស្សដ៏ច្រើន ដែលមិនធ្លាប់កើតមានទាល់តែសោះនៅ ទឹកដី បារាំង។ ក្នុងរយៈពេលតែប៉ុន្មានម៉ោង ការវាយប្រហារភេរវកម្មនៅបីកន្លែងផ្សេងគ្នា ដែលជាស្នាដៃរបស់កងកុម្ម៉ង់ដូរ ជីហាត ១០នាក់ បានសម្លាប់មនុស្ស១៣០នាក់ និងរបួស ៣៥០នាក់។
នៅ យប់ថ្ងៃ ទី ១៣វិច្ឆិកាដែលត្រូវចំនឹងថ្ងៃសុក្រចុងសប្តាហ៍ ភេរវជនអត្តឃាត៣នាក់ បានបំផ្ទុះគ្រាប់លើខ្លួន នៅ ក្រៅស្តាត ដែលកំពុងមានការប្រកួតបាល់ទាត់រវាងបារាំងនិងអាល្លឺម៉ង់។ ការបំផ្ទុះគ្រាប់បែករបស់ក្រុមអត្តឃាតជនបានសម្លាប់អ្នកបើកឡានតាក់ស៊ី។ នៅក្នុងពេលជាមួយគ្នានោះ មានក្រុមកងកុម្ម៉ង់ដូរ ៣នាក់ផ្សេងទៀត បានបើកឡានទៅបាញ់រះលើមនុស្សម្នារ ដែលកំពុងអង្គុយក្នុងហាងបាយ នៅតាមព្រែកជីក កណ្តាលក្រុងប៉ារីស ដោយបានសម្លាប់មនុស្ស៣៩នាក់។ នៅ មិនឆ្ងាយពីទីតាំងទី២ប៉ុន្មាន ក្រុមភេរវជនមួយក្រុមទៀតបានចូលបាញ់រះ ក្នុងរង្គសាល ឈ្មោះ Bataclan ជាទីមនុស្សជាង ១៥០០នាក់កំពុងចូលរួមស្តាប់ការប្រគំតន្រ្តីរបស់ក្រុមRock អាមេរិកាំង។ មនុស្ស៩០នាក់ បានស្លាប់ក្នុងថ្លុកឈាម ដោយសារការបាញ់រះ និងការបំផ្ទុះគ្រាប់បែកជាប់ខ្លួន របស់ពួកភេរវជន។
នៅក្រោយភេរវកម្ម ដែលក្រុមជីហាតអង្គការរដ្ឋអ៊ីស្លាម បានប្រកាសចេញមុខថា ជាអ្នកទទួលខុសត្រូវ ក្រុមស៊ើបអង្កេតបារាំង បានស្រាវជ្រាវរកឃើញថា ភេរវជនទាំងនោះជាក្រុមជីហាត ដែលមានសម្បុកលាក់ខ្លួន ក្នុង ប្រទេសបែលហ្សិក។ គម្រោងវាយប្រហារបារាំង ត្រូវបានរៀបចំឡើង នៅ ទឹកដីបែលហ្សិក។ នៅក្រោយការស៊ើបអង្កេត និងប្រតិបត្តិការ តាមប្រមាញ់ រកខ្សែបណ្តាញរបស់ក្រុមភេរវជន ប៉ូលិសបារាំងបានឡោមព័ទ្ធតាមចាប់មេរៀបចំផែនការភេរវកម្ម ប៉ុន្តែ ភេរវជនបានចុចបំផ្ទុះគ្រាប់បែកសម្លាប់ខ្លួន ដោយមិនឲ្យប៉ូលិសចាប់ខ្លួនបាន។
ក្នុងចំណោមភេរវជនទាំងអស់ ប៉ូលិសចាប់ខ្លួនបានតែភេរវជនម្នាក់គត់ដែលនៅរស់ គឺ Salah Abdeslam បន្ទាប់ពីបើកប្រតិបត្តិការតាមប្រមាញ់ អស់រាប់ខែ ទាំងនៅទឹកដីបារាំង និងបែលហ្សិក។ សព្វថ្ងៃនេះ ភេរវជនSalah Abdeslam កំពុងជាប់ក្នុងគុក ដើម្បីរង់ចាំការជំនុំជម្រះ របស់តុលាការ ដែលគេគ្រោងនឹងបើកធ្វើនៅ ខែមករា ឆ្នាំ២០២១។
ប្រាំឆ្នាំក្រោយបារាំងនៅតែប្រឈមខ្លាំងនឹងការគំរាមកំហែងវាយប្រហារភេរវកម្ម
នៅក្នុងរយៈពេល ៥ឆ្នាំមកនេះ គេរាប់ឃើញមានការវាយប្រហារភេរវកម្មដល់ទៅ ២០លើក នៅលើទឹកដី បារាំង។ ភេរវកម្មចំនួន ១៩ បានបរាជ័យ មិនបានសម្រេច ចំណែក គម្រោងការធ្វើភេរវកម្មចំនួន ៦១ ត្រូវបានអាជ្ញាធរបារាំង រកឃើញ មុន និងបង្រ្កាបមិនឲ្យកើតមានឡើងទាន់។
ចាប់តាំងពីខែកញ្ញាមក អាជ្ញាធរបារាំងបានដំឡើងកម្រិតគំរាមកំហែងនៃការវាយប្រហារភេរវកម្មដល់កម្រិតមួយខ្ពស់។ ក្នុងរយៈពេលតែមួយខែ កើតមានភេរវកម្មវាយប្រហារដល់ទៅ ៣លើក ដែលមានដូចជាការកាប់សម្លាប់មនុស្សនៅ ក្បែរអតីតទីស្នាក់ការរបស់ទស្សនាវដ្តី Charlie Hebdo ការកាត់កគ្រូបង្រៀន Samuel Paty និងការចាក់សម្លាប់មនុស្សនៅវិហារកាតូលិក នៅទីក្រុងនីសជាដើម។
តាមមន្រ្តីសន្តិសុខជាតិបារាំង កម្រិតគំរាមកំហែងភេរវកម្មនៅទឹកដី បារាំង បានកើនឡើងខ្ពស់ ក្នុងបរិបទដែលតុលាការបារាំង កំពុងបើកសវនាវជំនុំជម្រះ ជនដៃដល់ ដែលជាប់ពាក់ព័ន្ធនឹងភេរវកម្មប្រឆាំងទស្សនាវដ្តីCharlie Hebdo ហើយនិងសវនាការមួយទៀត សម្រាប់ភេរវកម្មថ្ងៃទី១៣វិច្ឆិកា។ ក្រុមឧក្រិដ្ឋជនអាចធ្វើភេរវកម្ម បំផ្លាញ ផលប្រយោជន៍ បារាំង ដូចជាការគប់គ្រាប់បែក នៅ អារ៉ាប៊ី សាអូឌីត កាលពីម្សិលម្ង៉ៃ គឺដើម្បី សំដែងការសាមគ្គីភាព និងគាំទ្រដល់ក្រុមភេរវនិយម ដែលកំពុងប្រឈមនឹងការកាត់ទោសនៅ តុលាការបារាំង។
មួយវិញទៀត កម្រិតគំរាមកំហែងវាយប្រហារប្រទេសបារាំង អាចកើនឡើងផងដែរ ដោយសារតែបរិបទ នយោបាយសព្វថ្ងៃរបស់ប្រធានាធិបតី បារាំង ដែលបានចេញមុខ ធ្វើសង្រ្គាមប្រឆាំងក្រុមអ៊ីស្លាមជ្រុលនិយម។ នៅក្នុងបទសម្ភាសន៍ជាមួយវិទ្យុជាតិបារាំង រដ្ឋមន្រ្តីក្រសួងមហាផ្ទៃបារាំង លោក Gérald Darmanin បញ្ជាក់ដែរថា កម្រិតគំរាមកំហែងវាយប្រហារភេរវកម្ម បានកើនឡើងខ្ពស់បំផុត។ សម្រាប់ រដ្ឋមន្រ្តីក្រសួងមហាផ្ទៃបារាំង ការគំរាមកំហែង របស់ក្រុមភេរវនិយម មានពីរ គឺពីខាងក្រៅផង និងពីខាងក្នុងស្រុកផង។ តាមរដ្ឋមន្រ្តីបារាំង ការគំរាមកំហែងពីខាងក្នុងដែល បង្កឡើងដោយ សត្រូវខាងក្នុង ដូចជាដង្កូវក្នុងសាច់ គឺមានចំនួនច្រើន ជាងការគំរាមកំហែងវាយប្រហារពីបរទេស ដូចករណី ក្រុមជីហាតបែលហ្សិក ដែលបានលើកគ្នា មកធ្វើភេរវកម្ម សម្លាប់មនុស្សនៅប៉ារីស កាលពី ៥ឆ្នាំមុន។ គឺដង្កូវចេញពីក្នុងសាច់ ដែលគ្រោះថ្នាក់ខ្លាំង ព្រោះថា ពួកគេទាំងនោះអាចជាបុគ្គលដែលមិនធ្លាប់មានក្នុងបញ្ជីតាមដានរបស់ក្រុមចារកម្មបារាំង។ ពួកគេអាចប្រើអាវុធសាមញ្ញ បំផុត ដូចជាកាំបិត ដើម្បី ចាក់សម្លាប់មនុស្ស ដើម្បី បង្ហាញ ការគាំទ្រ បុព្វហេតុរបស់ក្រុមជ្រុលនិយមណាមួយ។
នៅក្នុងកាលៈទេសៈ ដែលរលកស្អប់បារាំង មានកាន់តែច្រើន ក្នុងចំណោម អ្នកកាន់សាសនាអ៊ីស្លាម ដោយសារតែប្រសាសន៍ ចេញមុខរបស់លោកម៉ាក្រុង ក្នុងការការពារសិទ្ធិសេរីភាពរូបត្លុក ហើយនិងច្បាប់ស្តីពីការប្រយុទ្ធប្រឆាំងនឹងក្រុមអ៊ីស្លាមបំបែកទឹកដី ដែលបានជំរុញ ឲ្យការប្រឆាំងតវ៉ា ក្នុងចំណោមអ្នកកាន់សាសនាអ៊ីស្លាម គេវាយតម្លៃថា កម្រិតគំរាមកំហែងភេរវកម្ម ប្រឆាំងបារាំង បានកើនឡើងកាន់តែខ្លាំងមិនងាយនឹងថមថយចុះនោះទេ។
បារាំងចាប់បញ្ជូនជនបរទេសដែលមាននិន្នាការជ្រុលនិយម
នៅ ប៉ុន្មានមកថ្ងៃនេះ រដ្ឋមន្រ្តីក្រសួងមហាផ្ទៃបារាំង បានធ្វើដំណើរទៅប្រទេសមួយចំនួន ដូចជា អាល់ហ្សេរី ទុយនីស៊ី និងរុស្ស៊ី ដើម្បី និយាយពីការបញ្ជូន ឧក្រិដ្ឋជន ទៅ ប្រទេសដើមកំណើតវិញ។
តាមរដ្ឋមន្រ្តីក្រសួងមហាផ្ទៃ បារាំង ចាប់តាំងពី ខែកក្កដា បារាំងបានចាប់បញ្ជូនចេញ ឧក្រិដ្ឋជន ដែលរស់នៅ ខុសច្បាប់ក្នុងប្រទេសបារាំង ទៅ ប្រទេសដើមវិញ បានប្រមាណ ៤៨នាក់។ មនុស្សទាំង៤៨នាក់ ស្ថិតក្នុងចំណោមជនបរទេស ២១៣នាក់ ដែលរដ្ឋាភិបាលកំពុងដាក់ក្នុងបញ្ជី ក្រុមអ៊ីស្លាមជ្រុលនិយម។
ដើម្បីប្រយុទ្ធប្រឆាំងក្រុមភេរវនិយម រដ្ឋាភិបាលបារាំង បានបង្កើនផងដែរ ចំនួន មន្រ្តី ស៊ើបការសម្ងាត់ របស់ខ្លួន ប្រមាណ ជាង១២០០នាក់បន្ថែមទៀត សម្រាប់តាមដាន មុខសញ្ញាជនសង្ស័យ ដែលមាននិន្នាការជ្រុលនិយម និងដែលអាចកើតមានគំនិតប្រព្រឹត្តអំពើភេរវកម្ម។
មួយវិញទៀត រដ្ឋាភិបាលបានបង្កើតផងដែរច្បាប់ស្តីពី សន្តិសុខជាតិនិងប្រយុទ្ធប្រឆាំង អំពើភេរវកម្ម។ ជាក់ស្តែង រដ្ឋាភិបាលបានសំអាងប្រើច្បាប់ថ្មីនេះ ដើម្បីបិទកន្លែងសាសនាអ៊ីស្លាមមួយចំនួន ដែលរដ្ឋាភិបាលចោទថា ជាកន្លែងបណ្តុះបណ្តាលមនុស្សឲ្យមានគំនិតអ៊ីស្លាមជ្រុលនិយម នៅទឹកដី បារាំង។
សំណុំរឿងចុងក្រោយដែលរដ្ឋាភិបាលបារាំង ផ្តោតយកចិត្តទុកដាក់ផងដែរ គឺពួកភេរវជនដែលត្រូវចាកចេញពី ពន្ធនាគារ នៅក្រោយជាប់ទោសគ្រប់គ្រាន់ តាម ការកំណត់របស់ច្បាប់។ អ្វីដែលមន្រ្តីសម្ងាត់បារាំង បារម្ភ គឺខ្លាចជាន់ដានប្រទេសអូទ្រីស ព្រោះថា ភេរវជនដែលទើបបានសម្លាប់មនុស្ស៤នាក់ នៅ ទីក្រុងវីយ៉េន ទើបតែត្រូវដោះលែង ឲ្យនៅក្រៅឃុំ នៅ ឆ្នាំ ២០១៩ នៅក្រោយជាប់ពន្ធនាគារអូទ្រីស អស់ ៨ខែ ពីបទប៉ុនប៉ងធ្វើដំណើរទៅប្រទេសស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ