ទីក្រុងវីយែនប្រទេសអូទ្រីស រងគ្រោះដោយភេរវកម្មបាញ់រះ ស្លាប់និងរបួសច្រើននាក់
កាលពីយប់ថ្ងៃចន្ទ ទី២វិច្ឆិកា មានហេតុការណ៍ភេរវកម្មបាញ់រះមួយ បានកើតឡើង នៅកណ្តាលទីក្រុងវីយែន រដ្ឋធានីប្រទេសអូទ្រីស។ យ៉ាងហោចណាស់ មានមនុស្សស្លាប់ចំនួន៤នាក់ និងរបួស១៨នាក់។ ជនដៃដល់ម្នាក់ ដែលជាជនអ៊ីស្លាមជ្រុលនិយម ត្រូវបានសមត្ថកិច្ចអូទ្រីស បាញ់សម្លាប់នៅនឹងកន្លែង តែយ៉ាងណា អាជ្ញាធរអូទ្រីសសង្ស័យថា អាចមានភេរវជនផ្សេងទៀត ដែលកំពុងរត់គេចខ្លួន។
ចុះផ្សាយនៅថ្ងៃ៖
ស្តាប់ - ០២:៥៣
ទីក្រុងវីយែន ដែលតែងតែត្រូវគេចាត់ទុក ថាជាទីក្រុងដ៏សុខដុមរមនា ប្រកបដោយសុវត្ថិភាព ពេលនេះបានរងនូវអំពើបាញ់រះ គួរឲ្យតក់ស្លុតជាទីបំផុត។ ហេតុការណ៍នេះ បានកើតឡើង នៅវេលាម៉ោងប្រមាណជា៨យប់ ថ្ងៃទី២វិច្ឆិកា ស្របពេលដែលមានមនុស្សអ៊ូរអ តាមហាងកាហ្វេ ភោជនីយដ្ឋាន ប៉ុន្មានម៉ោងមុននឹងវិធានការបិទខ្ទប់ប្រទេសចូលជាធរមាន ដើម្បីទប់ស្កាត់ការឆ្លងរាលដាលកូវីដ១៩។
យោងតាមសាក្សីជាច្រើននាក់ ការបាញ់រះ បានកើតឡើងនៅទីតាំងផ្សេងៗគ្នា ដូចជានៅក្បែរវិហារស៊ីណាហ្គូកសាសនាជ្វីហ្វធំជាងគេនៅទីក្រុងវីយែន និងនៅក្បែររោងល្ខោនជាតិអូប៉េរ៉ា។ ជនដៃដល់ បានប្រើកាំភ្លើងយន្ត បាញ់រះមិនតិចជាង៥០គ្រាប់ ធ្វើឲ្យមនុស្សម្នារត់ផ្អើលឈូរឆ រកកន្លែងពួន។ សមត្ថកិច្ចបានអន្តរាគមន៍ភ្លាមៗ ដោយបានបាញ់សម្លាប់ជននេះ ដែលមានពាក់ខ្សែក្រវ៉ាត់គ្រាប់បែកក្លែងក្លាយ នៅនឹងខ្លួន។
លោក Sebastian Kurz អធិកាបតីអូទ្រីស បានថ្លែងភ្លាមៗ ដោយចាត់ទុកថា នេះគឺជាអំពើភេរវកម្មបែបអ៊ីស្លាមជ្រុលនិយម ដែលបានវាយប្រហារបេះដូងនៃប្រទេសអូទ្រីស។ លោក Karl Nehammer រដ្ឋមន្ត្រីមហាផ្ទៃអូទ្រីស បានបញ្ជាក់ថា យ៉ាងហោចណាស់ នៅមានភេរវជនម្នាក់ទៀត ដែលកំពុងរត់គេចខ្លួន។ ពេញមួយយប់ថ្ងៃចន្ទ ឈានចូលថ្ងៃអង្គារ សមត្ថកិច្ច បានបង្កើនការការពារសន្តិសុខ អមដោយឧត្ថម្ភាគចក្រហោះឆ្វែល ជាញឹកញាប់។ អាជ្ញាធរព្រំដែនសាធារណៈរដ្ឋឆេក ក៏បានប្រកាសរឹតបន្តឹងការត្រួតពិនិត្យដែរ។
ដោយឡែក ប្រភពពីនិពន្ធនាយកកាសែត Falter បានអះអាងថា ជនដៃដល់ដែលត្រូវបាន សមត្ថកិច្ចបាញ់សម្លាប់ មានភេទប្រុសអាយុប្រមាណ២០ឆ្នាំ ដើមកំណើតអាល់បានី តែកើតនៅក្នុងទីក្រុងវីយែន។ ជននេះគឺជាជនអ៊ីស្លាមជ្រុលនិយម ដែលជឿងុបដើរតាមក្រុមជីហាតអង្គការរដ្ឋអ៊ីស្លាម។ ប្រភពដដែលអះអាងថា ជននេះមានជាប់ឈ្មោះក្នុងបញ្ជីខ្មៅរបស់សមត្ថកិច្ច ក្នុងចំណោមជនអ៊ីស្លាមជ្រុលនិយម៩០នាក់ផ្សេងទៀត ដែលធ្លាប់បានព្យាយាមធ្វើដំណើរចេញទៅស៊ីរី។
គួរបញ្ជាក់ថា ហេតុការណ៍ភេរវកម្មវាយប្រហារទីក្រុងវីយែននេះ បានកើតឡើងប៉ុន្មានថ្ងៃ ក្រោយអំពើភេរវកម្មសម្លាប់មនុស្សនៅក្នុងវិហារកាតូលិក នៅទីក្រុងនីស ភាគខាងត្បូងប្រទេសបារាំង ដែលបានបណ្តាលឲ្យស្លាប់មនុស្ស៣នាក់។ មានប្រជាជនសរុបជាង៨លាននាក់ អូទ្រីសមានសហគមអ្នកកាន់សាសនាអ៊ីស្លាម រស់នៅច្រើនគួរសម តែជាទូទៅ មិនដែលជួបបញ្ហាវិបត្តិភេរវកម្ម ដូចប្រទេសផ្សេងទៀតនៅអឺរ៉ុបទេ។ ក្រោយអំពើដ៏ព្រៃផ្សៃនេះ ការប្រកាសថ្កោលទោស បានធ្លាក់មកជាបន្តបន្ទាប់ ពីសំណាក់ថ្នាក់ដឹកនាំអឺរ៉ុប និងពីសំណាក់លោកដូណាល់ ត្រាំ ដោយបានចាត់ទុកអំពើនេះ ជាអំពើដ៏កំសាកថោកទាប ដែលមានកម្មវត្ថុវាយប្រហារ មកលើតម្លៃសង្គម របស់ទ្វីបអឺរ៉ុបទាំងមូលតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ