អឺរ៉ុប កំពុងឆ្លងកាត់រលកគ្រោះថ្នាក់បំផុត នៃការឆ្លងរាលដាលកូវីដ១៩
យោងតាមតួលេខរបស់អង្គការសុខភាពពិភពលោក ចំនួនអ្នកឆ្លងមេរោគកូរ៉ូណាវីរុសថ្មី បានកើនកាលពីថ្ងៃសៅរ៍កន្លងទៅ ចំនួនប្រមាណ ៤៦៥៣១៩នាក់ នៅទូទាំងពិភពលោក។ រលកឆ្លងរាលដាលនេះ កំពុងតែមានសន្ទុះ យ៉ាងខ្លាំងបំផុតនៅតាមបណ្តារប្រទេសនៅអឺរ៉ុប ដូចជានៅបារាំង អ៊ីតាលី អាល្លឺម៉ង់ អង់គ្លេស អេស្ប៉ាញជាដើម។
ចុះផ្សាយនៅថ្ងៃ៖
ខណៈដែលរដូវស្លឹកឈើជ្រុះបានឈានចូលមកដល់ ជាមួយនឹងសីតុណ្ហភាពដែលធ្លាក់ចុះត្រជាក់ ការឆ្លងរាលដាលជំងឺកូវីដ១៩ បានស្ទុះឡើងយ៉ាងខ្លាំង នៅតាមប្រទេសសឹងតែទាំងអស់នៅអឺរ៉ុប។ នៅអេស្ប៉ាញ និងបារាំង ចំនួនអ្នកឆ្លងសរុប ទើបតែបានឈានឡើងលើស១លាននាក់ កាលពីចុងសប្តាហ៍កន្លងទៅ។
នៅថ្ងៃចន្ទទី ២៦តុលា រដ្ឋាភិបាលអេស្ប៉ាញ បានសម្រេចប្រកាសអាសន្នសុខាភិបាល ពីនេះរហូតដល់ខែឧសភាឆ្នាំ២០២១ ដោយបានចេញបម្រាមគោលចរទូទាំងប្រទេស ហាមចេញក្រៅ ចាប់ពីម៉ោង ១១យប់ដល់ម៉ោង៦ព្រឹក។
ចំណែកនៅបារាំងវិញ ២៤ម៉ោង ចុងក្រោយគេបានរកឃើញអ្នកឆ្លងកូវីដថ្មីបន្ថែម ដល់ទៅជាង៥២០០០នាក់។ ចំនួនអ្នកជំងឺកូវីដ១៩ ដែលត្រូវទទួលការសង្គ្រោះបន្ទាន់ បានកើនឡើងរហូតដល់ ២៥០០នាក់។ ពាក្យចចាមអារ៉ាម ដែលថារដ្ឋាភិបាលបារាំង នឹងបិទខ្ទប់ប្រទេសទាំងស្រុងឡើងវិញ កំពុងតែធ្វើឲ្យគ្រប់គ្នាព្រួយបារម្ភ។
នៅអ៊ីតាលី ខេត្តធំ ៗចំនួន៣ បានសម្រេច អនុវត្តបំរាមគោលចរ ហាមចេញដើរហើរ ក្នុងវេលាយប់។ ចំនួនអ្នកឆ្លងថ្មី ២៤ម៉ោងចុងក្រោយ នៅអ៊ីតាលី គឺមានប្រមាណ២១២៧៣នាក់។
នៅអាល្លឺម៉ង់វិញ ចំនួនអ្នកឆ្លងថ្មី នៅថ្ងៃអាទិត្យទី២៥តុលា គឺមានប្រមាណ ៨៦៨៥នាក់ ដែលនេះគឺជាកម្រិតកើនឡើងខ្ពស់បំផុត។
អ្នកជំនាញសុខាភិបាល តាមប្រទេសនៅអឺរ៉ុប បានទាញសញ្ញាអាសន្នគ្រប់គ្នា ឲ្យរដ្ឋាភិបាលត្រូវចាត់វិធានការរិតបន្តឹងបន្ថែម ដូចជាការឈានទៅបិទខ្ទប់ទីក្រុង ឬតំបន់ខ្លះទាំងស្រុងតែម្តង។ អ្នកជំនាញខ្លះ អះអាងថា ការបិទសកម្មភាពសេដ្ឋកិច្ច នាពេលនេះ ចំនួនយ៉ាងហោច២សប្តាហ៍ វាអាចនឹងហុចផលវិជ្ជមាន ហើយវិស័យសេដ្ឋកិច្ចពាណិជ្ជកម្ម អាចនឹងបើកដំណើរការឡើងវិញបាន នៅក្នុងរដូវបុណ្យណូអែលខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ