កាសែតអេស្ប៉ាញ៖ ចោរព័ត៌មានវិទ្យាចិនលួចទិន្នន័យវ៉ាក់សាំងប្រឆាំងកូវីដ នៅអេស្ប៉ាញ
ក្រុមចោរព័ត៌មានវិទ្យាចិនបានចូលលួចព័ត៌មានជាច្រើនពីមន្ទីរពិសោធន៍អេស្ប៉ាញ ដែលកំពុងស្រាវជ្រាវរកវ៉ាក់សាំងប្រឆាំងជំងឺកូវីដ១៩។ នេះបើតាមការចុះផ្សាយរបស់កាសែត ដ៏ធំជាងគេរបស់អេស្ប៉ាញ ឈ្មោះ El Pais កាលពីថ្ងៃសុក្រ។ ដំណឹងនេះធ្លាក់មកចំពេលដែលក្រុមហ៊ុនផលិតឱសថរាប់រយ នៅក្នុងពិភពលោកកំពុងញាប់ដៃ ញាប់ជើង ដើម្បីស្រាវជ្រាវរកវ៉ាក់សាំងប្រឆាំងជំងឺកូវីដ ដែលបានសម្លាប់មនុស្សជាង៩សែននាក់ និងឆ្លងទៅមនុស្សជាង ៣០លាននាក់ នៅក្នុងពិភពលោក។
ចុះផ្សាយនៅថ្ងៃ៖
ស្តាប់ - ០២:០៣
នៅពេលរដ្ឋ និងក្រុមហ៊ុនផលិតឱសថ ច្រើនរាប់រយកំពុងប្រជែងគ្នា ស្វែងរកវ៉ាក់សាំង ប្រឆាំង ជំងឺកូវីដ ក្រុមចោរអ៊ីនធ័រនែត ដែលគ្មានការខ្មាស់អៀន និងក្រមសីលធម៌ក្នុងខ្លួន បែរជាសំងំ ចូលលួចយកទិន្នន័យស្រាវជ្រាវវ៉ាក់សាំង ដោយព្រងើយ។ តាមប្រធានទីភ្នាក់ងារស៊ើបការណ៍សម្ងាត់របស់អេស្ប៉ាញ ដែលដកស្រង់សំដីដោយកាសែតធំជាងគេនៅអេស្ប៉ាញ ក្រុមចោរព័ត៌មានវិទ្យាបានបង្កើនការវាយប្រហារកាន់តែច្រើន និងខ្លាំងក្លា ទៅលើមន្ទីរពិសោធន៍ស្រាវជ្រាវរកវ៉ាក់សាំង មិនថា នៅក្នុងទឹកដីអេស្ប៉ាញ ឬនៅប្រទេសដទៃទៀត។
ក្រុមចោរអ៊ីនធ័រនែត បានបង្កើនការវាយប្រហារកាន់តែខ្លាំង ចាប់តាំងពីមានការបិទខ្ទប់ប្រទេស ដោយសំដៅជាពិសេសទីភ្នាក់ងារសុខភាព និងក្រុមហ៊ុនផលិតថ្នាំពេទ្យ ដែលគ្មានប្រព័ន្ធការពារស្តុកទិន្នន័យរឹងមាំ។ នៅ១០ឆ្នាំចុងក្រោយនេះ ការវាយប្រហារព័ត៌មានវិទ្យាភាគច្រើនធ្វើឡើងដោយក្រុមចោរ ដែលមានប្រភពពីរុស្ស៊ី និងចិន។ ពួកចោរអ៊ីនធ័រនែតទាំងនោះ អាចជាសមាជិករបស់អង្គការឧក្រិដ្ឋកម្ម ក្រុមដែលគាំទ្រដោយរដ្ឋាភិបាល និងអាចជាសកលវិទ្យាល័យ ដែលចាំចូលលួចយកទិន្នន័យ ដើម្បីលក់បន្ត ដោយខុសច្បាប់ ទៅភាគីទី៣។ តាមមន្រ្តីអេស្ប៉ាញ ក្រុមចោរ ដែលចូលលួចទិន្នន័យស្រាវជ្រាវវ៉ាក់សាំង របស់មន្ទីរពិសោធន៍អេស្ប៉ាញ ជាក្រុមចោរអ៊ីនធ័រនែតចិន។
កាសែតអេស្ប៉ាញមិនបានបញ្ជាក់ពីពេលវេលា ឬប្រភេទព័ត៌មាន ទិន្នន័យដែលចោរព័ត៌មានចិន បានចូលលួចពីមន្ទីរពិសោធន៍អេស្ប៉ាញនោះទេ។
កាលពីពាក់កណ្តាលខែកក្កដាកន្លងទៅ មជ្ឈមណ្ឌលសន្តិសុខព័ត៌មានវិទ្យារបស់អង់គ្លេស National Cyber Security Centre (NCSC បានបង្ហាញថា ស្ថាប័ន និងមន្ទីរពិសោធន៍ ដែលកំពុងធ្វើការ លើការស្រាវជ្រាវផលិតថ្នាំវ៉ាក់សាំងប្រឆាំងកូវីដ១៩ នៅអង់គ្លេស អាមេរិក និងនៅកាណាដា បានរងនូវការវាយប្រហាររបស់ក្រុមចោរព័ត៌មានវិទ្យា ដូចជា ក្រុម APT29 Ducs និង Cozy Bear ដែលជាក្រុម ធ្វើសកម្មភាព ក្នុងក្របខណ្ឌបញ្ជារបស់ភ្នាក់ងារចារកិច្ចរុស្ស៊ី។ តុលាការរបស់រដ្ឋវ៉ាស៊ីនតោនវិញ ធ្លាប់បានចោទប្រកាន់ជនជាតិចិន២រូប ពីបទលួចទិន្នន័យរបស់កុំព្យូទ័រ រាប់រយ នៅក្នុងពិភពលោក សម្រាប់ បម្រើប្រយោជន៍រដ្ឋចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ