អេស្ប៉ាញបិទខ្ទប់ប្រជាពលរដ្ឋជាថ្មី ឥណ្ឌាក្លាយជាចំណុចផ្ទុះកូវីដថ្មីប្រចាំអាស៊ី
ករណីឆ្លងកូវីដ១៩ បានកើនឡើងជាថ្មីគួរឱ្យព្រួយបារម្ភ នៅអេស្ប៉ាញ។ ប្រឈមនឹងស្ថានភាពបែបនេះ អាជ្ញាធរបានសម្រេចបិទខ្ទប់ប្រជាពលរដ្ឋឱ្យនៅក្នុងផ្ទះជាថ្មី ប៉ុន្តែលើកជានេះជាបង្ឃាំងតែក្នុងតំបន់កាតាឡូញ៉ា ដែលមានផ្ទុះករណីឆ្លងខ្លាំងប៉ុណ្ណោះ។ បន្ទាប់ពីសហរដ្ឋអាមេរិក ករណីឆ្លងថ្មីក៏កំពុងស្ទុះឡើងខ្លាំងដែរនៅឥណ្ឌា។ ឥណ្ឌាកំពុងក្លាយជាជង្រុកផ្ទុះកូវីដ១៩ថ្មីប្រចាំតំបន់។
ចុះផ្សាយនៅថ្ងៃ៖
ការដើរហើរចេញចូលត្រូវមានកំរិត និងការជួបជុំលើសពី១០នាក់ត្រូវហាមឃាត់ ... តំបន់កាតាឡូញ៉ារបស់អេស្ប៉ាញ ដែលមានផ្ទៃក្រឡា១៤០០គីឡូម៉ែត្រការ៉េ និងប្រជាជនប្រមាណ២សែននាក់ ត្រូវជាប់បម្រាមបិទបង្ឃាំងឱ្យនៅតែក្នុងផ្ទះជាថ្មី តាំងពីថ្ងៃត្រង់ថ្ងៃសៅរ៍ទី ៤កក្កដាមក។
អេស្ប៉ាញ ជាប្រទេសរងគ្រោះដោយកូវីដ១៩ខ្លាំងជាងគេមួយ ដោយរាប់មានស្លាប់សរុបយ៉ាងហោច ២៨៣៨៥នាក់ កំពុងស្គាល់សន្ទុះកំណើនអ្នកឆ្លងថ្មីយ៉ាងខ្លាំង និងមានករណីអ្នកស្លាប់ច្រើនជាថ្មីទៀត។ បើតាមប្រភពផ្លូវការ ពលករមកពីក្រៅជាប្រភពនាំឱ្យមានការចម្លងថ្មីលើទឹកដីអេស្ប៉ាញ។
អាចគ្រប់គ្រងការចម្លងកូវីដ១៩បាន តាមរយៈវិធានការបិទខ្ទប់ប្រទេសដ៏តឹងតែងបំផុតអស់រយៈពេលជាងបីខែ អាជ្ញាធរអេស្ប៉ាញសម្រេចបិទខ្ទប់តំបន់និងខេត្តក្រុងណាដែលមានផ្ទុះការចម្លងថ្មីច្រើន និង បានពង្រឹងវិធានការបន្ថែមនៅតាមអាកាសយានដា្ឋន ចាំត្រួតពិនិត្យអ្នកចំណូលថ្មី។ សូមបញ្ជាក់ថា ដំណឹងនៃការបិទខ្ទប់តំបន់កាតាឡូញ៉ា ធ្លាក់មកចំថ្ងៃដែលអេស្ប៉ាញបានបើកព្រំដែនទទួលពលរដ្ឋចំនួន១២ប្រទេសផ្សេង។ អេស្ប៉ាញបានបើកព្រំដែនឡើងវិញជាដំបូងជាមួយតែបណ្តាប្រទេសក្នុងសហភាពអឺរ៉ុបដូចគ្នាតាំងពីថ្ងៃទី២១មិថុនាមក។
ក្នុងពេលអឺរ៉ុបកំពុងចាប់បើកព្រំដែនឡើងវិញដោយប្រុងប្រយ័ត្នបំផុត និងចាត់វិធានការបិទខ្ទប់ដោយដុបៗតាមតំបន់ប្រឆាំងនឹងកូវីដ១៩ នៅប្រទេសឥណ្ឌាវិញ កំណើនករណីឆ្លងថ្មី បានស្ទុះឡើងយ៉ាងខ្លាំងគួរឱ្យព្រួយបារម្ភបំផុត ជាពិសេសនៅតំបន់ភាគខាងត្បូងនិងខាងលិចនៃប្រទេស។ ក្នុងរយៈពេល២៤ម៉ោងចុងក្រោយនេះ ឥណ្ឌាមាន ការឆ្លងថ្មីដល់ទៅ២២០០០ករណី ពោលគឺជាចំនួនដ៏ច្រើនបំផុតដែលប្រតេសពុំធ្លាប់ជួបពីមុនមកទេ។ ជាសរុបឥណ្ឌាមានអ្នកឆ្លងកូវីដ១៩ចំនួន ជាង៦៤ម៉ឺននាក់ និងស្លាប់ជាង១៨០០០នាក់។ ជាមួយតួលេខនេះ ឥណ្ឌាបានក្លាយជាចំណុចផ្ទុះកូវីដថ្មីប្រចាំតំបន់អាស៊ី។ ឥណ្ឌាបានចាត់វិធានការទន្ទឹមនឹងអឺរ៉ុប បិទខ្ទប់ប្រទេសយ៉ាងតឹងជាងគេបំផុតនៅពិភពលោក តែបានចាប់លើកបម្រាមចេញបន្តិចម្តងៗដើម្បីទ្រទ្រង់សេដ្ឋកិច្ច។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ