ហូឡង់៖ ឯកសារសំងាត់បង្ហាញថា ក្រុមហ៊ុនធំៗខ្លះ ចំណាយប្រាក់លើអ្នកប្រឆាំងបរិស្ថាន
ក្រុមហ៊ុនធំៗរបស់ហូឡង់ ដែលក្នុងនោះមានក្រុមហ៊ុនប្រេង Shell និងក្រុមហ៊ុនKLM ជាដើម ត្រូវគេទំលាយឯកសារសំងាត់ បង្ហាញថាធ្លាប់បានផ្តល់ប្រាក់ឲ្យអ្នកជំនាញ ដើម្បីផ្សព្វផ្សាយប្រឆាំងនឹងការយល់ឃើញ ស្តីពីការកើនឡើងកំដៅផែនដី ឬការប្រែប្រួលអាកាសធាតុ។ នេះគឺជាលទ្ធផលស៊ើបអង្កេត របស់ក្រុមអ្នកកាសែតស៊ើបអង្កេតឯករាជ ហើយដែលត្រូវបានបណ្តាញសារព័ត៌មានធំៗរបស់ហូឡង់ យកមកចុះផ្សាយ នៅថ្ងៃសៅរ៍ទី២២កុម្ភៈ។
ចុះផ្សាយនៅថ្ងៃ៖
ស្តាប់ - ០២:១៩
ឆ្លងកាត់ការស្រាវជ្រាវស៊ើបអង្កេត រយៈពេល៥ខែ ទីបំផុតក្រុមអ្នកកាសែតឯករាជ (PAJ) បានធ្វើសេចក្តីសន្និដ្ឋាន ក្នុងរបាយការណ៍របស់ខ្លួន ដោយដាក់ឈ្មោះថា Shell Papers។ មានក្រុមហ៊ុនធំៗរបស់ហូឡង់ ជាច្រើន បានជាប់ពាក់ព័ន្ធនៅក្នុងរឿងរ៉ាវ ចំណាយប្រាក់ឲ្យអ្នកជំនាញវិទ្យាសាស្ត្រ ដើម្បីឲ្យអ្នកជំនាញទាំងនោះ ទៅនិយាយផ្ទុយ ឬប្រឆាំងនឹងការព្រួយបារម្ភ ទាក់ទិននឹងការកើនឡើងនូវកំដៅផែនដី។
យោងតាមការស៊ើបអង្កេត នៅរវាងឆ្នាំ១៩៨៩ ដល់ឆ្នាំ១៩៩៨ សាស្ត្រាចារ្យជំនាញម្នាក់ ឈ្មោះ Frits Böttcher បានទទួលប្រាក់យ៉ាងហោច ៤៥ម៉ឺនអឺរ៉ូ ពីក្រុមហ៊ុនធំៗ ដូចជាក្រុមហ៊ុន Shell និងក្រុមហ៊ុន KLM។ លោក Frits Böttcher ដែលបានស្លាប់កាលពីឆ្នាំ២០០៨ ត្រូវបានគេដឹងថា គឺធ្លាប់ជាសាស្ត្រាចារ្យផ្នែករូបវិទ្យា នៅសកលវិទ្យាល័យLeiden ហើយគឺជាអ្នកជំនាញម្នាក់ ដែលបានធ្វើសកម្មភាពយ៉ាងច្រើន ប្រឆាំងនឹងគំនិតដែលយល់ឃើញថា កម្រាស់ឧស្ម័នកាបូនិកក្នុងបរិយាកាស ធ្វើឲ្យផែនដីឡើងកំដៅ។ លោកសាស្ត្រាចារ្យរូបនេះ ធ្លាប់ទាំងបានអះអាងថា មានឧស្ម័នកាបូនិកច្រើន មិនមែនអាក្រក់ទេ គឺវាល្អទៅវិញទេ សម្រាប់រុក្ខជាតិ។ លោកបានអះអាងទៀតថា ការកើនឡើងកំដៅផែនដី ឬការប្រែប្រួលអាកាសធាតុ គឺគ្រាន់តែជាជំនឿផ្តេសផ្តាស គ្មានមូលដ្ឋាន។
កាសែត De Volkskrant ដ៏ល្បីរបស់ហូឡង់ ដែលបានចុះផ្សាយការសន្និដ្ឋាននៃការស៊ើបអង្កេតនេះ បានលើកឡើងថា ការនិយាយឃោសនាប្រឆាំង បែបឡប់ប៊ី របស់លោកសាស្ត្រាចារ្យ Frits Böttcher បានចូលរួមធ្វើឲ្យ ហូឡង់ មានការយឺតយ៉ាវ ក្នុងការដាក់ចុះនូវគោលនយោបាយការពារបរិស្ថាន និងទប់ស្កាត់ការកើនឡើងនូវកំដៅផែនដី។
ក្រោយការចេញផ្សាយរឿងអាស្រូវនេះ ក្រុមហ៊ុនខ្លះបានបដិសេធ មិនទទួលស្គាល់ ហើយថារឿងរ៉ាវកើតឡើងជាង២០ឆ្នាំមកហើយ មិនអាចទៅស្វែងរកឯកសារមកបញ្ជាក់បានទេ។ ចំណែកក្រុមហ៊ុនខ្លះវិញ បានទទួលស្គាល់ តែបានធានាថាក្រុមហ៊ុនខ្លួន បានធ្វើការកែប្រែ ហើយងាកមកអនុវត្តគោលនយោបាយគាំព៌ាបរិស្ថាន យ៉ាងពេញទំហឹង។
ដោយឡែក សម្ព័ន្ធការពារបរិស្ថាននៅហូឡង់ ឈ្មោះ Milieudefensie បានស្នើសុំទៅសភាហូឡង់ ឲ្យបើកការស៊ើបអង្កេតមួយជាផ្លូវការ ស្តីពីការប្រើប្រាស់ឥទ្ធិពលរបស់ក្រុមហ៊ុនធំៗ ទៅលើវិស័យនយោបាយ ឬការស្រាវជ្រាវវិទ្យាសាស្ត្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ