សមាជសភាចិនបានបិទបញ្ចប់ដោយផ្តល់អំណាចដល់បក្សកាន់តែធំលើរដ្ឋាភិបាល
សមាជសភាប្រជាមានិតបានបិទបញ្ចប់សម័យប្រជុំប្រចាំរបស់ខ្លួន នៅថ្ងៃចន្ទទី ១១មីនា ដោយអនុម័តគម្រោងច្បាប់ជាច្រើន មានជាអាទិ៍ច្បាប់ស្តីពីការគ្រប់គ្រងអំណាចរដ្ឋបាល។ បើតាមសារព័ត៌មានរដ្ឋ គម្រោងច្បាប់រដ្ឋបាលថ្មី បានបញ្ជាក់ជាផ្លូវការអំពីអំណាចដ៏ធំធេងរបស់បក្សកុម្មុយនិស្តក្នុងការត្រួតត្រារដ្ឋាភិបាល។
ចុះផ្សាយនៅថ្ងៃ៖
ស្តាប់ - ០២:៤១
ប្រជុំសម្រេចដោយបិទទ្វារ នៅរសៀលថ្ងៃចន្ទទី១១មីនា សភាចិនបានបោះឆ្នោតអនុម័តលើគម្រោងច្បាប់ជាច្រើន មានជាអាទិ៍ការធ្វើវិសោធនកម្មសើរើច្បាប់ស្តីពីការគ្រប់គ្រងរដ្ឋបាល ដោយផ្តល់អំណាចកាន់តែធំធេងឡើងទៅឱ្យបក្សកុម្មុយនិស្តក្នុងការត្រួតពិនិត្យពីលើរដ្ឋាភិបាល។ ច្បាប់ថ្មី ដែលអនុម័តដោយសំឡេងគាំទ្រ២៨៨៣ ទល់នឹងសំឡេងប្រឆាំង៨និងអនុប្បវាទ៩ បានកាត់ចិបយកអំណាចពីក្រុមប្រឹក្សារដ្ឋ ឈ្មោះផ្លូវការរបស់រដ្ឋាភិបាល និងរដ្ឋបាលជាន់ខ្ពស់ ដឹកនាំដោយលោកនាយករដ្ឋមន្ត្រី លី ឈាំង។ តាមក្បួន លោកនាយករដ្ឋមន្ត្រីលីឈាំង ដឹកនាំលើក្រសួងចំនួន២១ របស់រដ្ឋាភិបាលនិងមូលដ្ឋាន។ ជាងនេះទៅទៀត នៅក្នុងមាត្រាទើបចែងបញ្ចូលថ្មី ក្រុមប្រឹក្សារដ្ឋត្រូវមានតួនាទី ការពារដោយឥតងាករេ អំណាច និងសេចក្តីសម្រេចរបស់គណៈកម្មាធិការមជ្ឈិមបក្ស ហើយត្រូវដើរតាមមាគ៌ាបក្ស ស្របតាមគោលការណ៍ស៊ីជីនពីង តែមួយគត់។
ថ្វីបើច្បាប់ថ្មីនឹងមិនមកប្រែក្រឡាស់ដំណើរការរបស់ស្ថាប័នភ្លាមភ្លែតមែន ប៉ុន្តែបើតាមអ្នកជំនាញច្បាប់ ការកែប្រែច្បាប់គ្រប់គ្រងរដ្ឋបាលរបស់ក្រុមប្រឹក្សារដ្ឋ ដែលប្រព្រឹត្តទៅជាលើកទីមួយ គិតចាប់តាំងពីឆ្នាំ១៩៨២មកនេះ បញ្ជាក់យ៉ាងច្បាស់អំពីនិន្នាការដើរឆ្ពោះទៅរកផ្ទេរអំណាចរដ្ឋកាន់តែច្រើនឡើងៗទៅឱ្យគណបក្ស។ ពោលគឺរដ្ឋាភិបាលជាត្រូវអនុវត្តតាមសេចក្តីណែនាំរបស់បក្សដោយផ្ទាល់។ ដូច្នេះតួនាទីជានាយករដ្ឋមន្ត្រីរបស់លោក លី ឈាំង ត្រូវតិចទាបជាងនាយករដ្ឋមន្ត្រីអាណត្តិមុនៗ។
លោកRyan Mitchell សាស្រ្តាចារ្យច្បាប់នៃសកលវិទ្យាល័យចិននៅហុងកុង បានអះអាងថា នេះគឺជាការប្តូរផ្លាស់ដ៏សំខាន់ក្នុងការបែងចែងអំណាចប្រតិបត្តិនៅក្នុងប្រទេសចិន។ ពីមុនមក ថ្វីបើគេបានដឹងយ៉ាងច្បាស់ថាប្រធានគណបក្សកុម្មុយនិស្តជាបុគ្គលដ៏មានឥទ្ធិពលជាងគេបំផុតមែន តែការបែងចែកអំណាចក្នុងការគ្រប់គ្រងនយោបាយនិងរដ្ឋាភិបាល មិនសូវច្បាស់លាស់ទេ។ តាំងពីឡើងកាន់អំណាចនៅឆ្នាំ២០១២មក លោក ស៊ីជីនពីង បានបង្កើតគណៈកម្មាធិការមជ្ឈិមបក្សជាច្រើនសម្រាប់ត្រួតពីលើក្រសួងពាក់ព័ន្ធដោយផ្ទាល់តែម្តង ដោយខ្លះបញ្ជាគងដល់វិស័យនយោបាយសេដ្ឋកិច្ចនិងហិរញ្ញវត្ថុដែលធ្លាប់តែស្ថិតក្រោមដែនអំណាចរបស់នាយករដ្ឋមន្ត្រី។
សភាប្រជាមានិតចិនក៏បានបិទបញ្ចប់សមាជប្រចាំឆ្នាំ ដោយទទួលស្គាល់ដែរថាចិននឹងជួបការលំបាកក្នុងការសម្រេចកម្មវត្ថុនាំប្រទេសឱ្យមានកំណើនសេដ្ឋកិច្ច៥% ព្រោះវិស័យខ្លះបន្តទាញក្បាលម៉ាស៊ីនសេដ្ឋកិច្ចឱ្យដាំក្បាលចុះ ប៉ុន្តែគ្មានទេការប្រកាសផែនការលម្អិតស្តីអំពីមធ្យោបាយដោះស្រាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ