ហ្សេ២០ បរាជ័យ គ្មានចេញសេចក្តីថ្លែងការណ៍រួម ដោយចិនរារាំង
ជំនួបប្រជុំថ្នាក់រដ្ឋមន្ត្រីក្រសួងហិរញ្ញវត្ថុ និងធនាគារកណ្តាលនៃក្រុមប្រទេសមានសេដ្ឋកិច្ចលូតលាស់ខ្លាំងជាង២០ដំបូងនៅលើពិភពលោក ឬហ្សេ២០ នៅប្រទេសឥណ្ឌា បានបិទបញ្ចប់ នៅថ្ងៃសៅរ៍ទី ២៥កុម្ភៈនេះ ដោយគ្មានលទ្ធផល។ មូលហេតុគឺបណ្តាលមកពួកគេនិយាយមិនចុះសម្រុងនឹងគ្នាជាមួយចិន ជុំវិញពាក្យសង្គ្រាមនៅអ៊ុយក្រែន។
ចុះផ្សាយនៅថ្ងៃ៖
ស្តាប់ - ០២:២៣
កាលពីឆ្នាំទៅ ជំនួបកំពូលថ្នាក់រដ្ឋមន្ត្រីហិរញ្ញវត្ថុហ្សេ២០ នៅប្រទេសឥណ្ឌូណេស៊ី មិនអាចចេញសេចក្តីថ្លែងការណ៍រួមបានទេ។ នៅឆ្នាំនេះ ក៏គ្មានដែរសេចក្តីថ្លែងការណ៍រួមហ្សេ២០។
ឥណ្ឌាដែលជាប្រធានផ្លាស់វេនក្រុមហ្សេ២០ បានត្រឹមចេញសេចក្តីប្រកាសសង្ខេបលទ្ធផលនៃជំនួបប្រជុំ ថា សមាជិកហ្សេ២០ភាគច្រើនបានថ្កោលទោសសង្គ្រាមនៅអ៊ុយក្រែន ដោយវាយតម្លៃស្ថានភាព និងវិធានការដាក់ទណ្ឌកម្មផ្សេងៗគ្នា។ ប៉ុន្តែចិននិងរុស្ស៊ី មិនបានអនុម័តកថាខណ្ឌទាក់ទងនឹងអ៊ុយក្រែនទេ។
ជួបប្រជុំគ្នាពីរថ្ងៃ គឺនៅថ្ងៃសុក្រនិងសៅរ៍ទី ២៥កុម្ភៈ ក្រុមហ្សេ២០ ត្រូវសាកល្បងព្រមព្រៀងគ្នារកដំណោះស្រាយឱ្យបញ្ហាប្រឈមនៃសេដ្ឋកិច្ចពិភពលោកក្នុងបរិបទសង្គ្រាមអ៊ុយក្រែននិងវិបត្តិអតិផរណា ប៉ុន្តែកិច្ចពិភាក្សាជួបការលំបាកជាងឆ្នាំ មុនទៀត ព្រោះសង្គ្រាមនៅតែបន្ត។ ជាលទ្ធផល ជំហរខ្លះមិនសូវមានលក្ខណៈស្ថាបនាទេ។ នេះជាការសម្គាល់របស់រដ្ឋមន្ត្រីក្រសួងហិរញ្ញវត្ថុអេស្ប៉ាញ។ បើតាមប្រភពអ្នកទទួលខុសត្រូវជាច្រើនសុំមិនបញ្ចេញឈ្មោះវិញ ចិនចង់ប្រើពាក្យណាដែលស្រាល ក្នុងន័យមិនថ្កោលទោសសង្គ្រាមរុស្ស៊ីនៅអ៊ុយក្រែន ចែងក្នុងសេចក្តីថ្លែងការណ៍រួម។ ការជជែកពិភាក្សាគ្នារកពាក្យដ៏សមរម្យមួយ ប្រព្រឹត្តទៅរហូតដល់ម៉ោង២ទៀបភ្លឺ នៅតែពុំត្រូវគ្នា។
ឥណ្ឌាប្រធានផ្លាស់វេនហ្សេ២០ផ្ទាល់ ក៏មិនថ្កោលទោសអន្តរាគមន៍យោធារបស់រុស្ស៊ីទេ ឯចិនតាំងពីថ្ងៃទី ២៤កុម្ភៈ២០២២មក ក៏មិនដែលបន្ទោសរុស្ស៊ី ហើយក៏មិនដែលរិះគន់ជាសាធារណៈប្រតិបត្តិកាយោធារុស្ស៊ីដែរ តែប៉េកាំងតែងសម្តែងការគាំទ្រមូស្គូនៅពេលឃើញលោកខាងលិចដាក់ទណ្ឌកម្មលើរុស្ស៊ី។ ទាល់តែដល់ថ្ងៃខួបមួយឆ្នាំនៃការផ្ទុះសង្គ្រាម ទើបគេឃើញចិនចាប់ផ្តើមបញ្ជាក់ជំហរអព្យាក្រិត្យរបស់ខ្លួន លើកសំណើចរចាដោះស្រាយសង្គ្រាមអ៊ុយក្រែនតាមផ្លូវចរចា ដោយមាន១២ចំណុច។ តាំងខ្លួនជាអាជ្ញាកណ្តាល ចិនបានប្រកាសនៅថ្ងៃនេះថានឹងទទួលស្វាគមន៍ប្រធានាធិបតីបេឡារុស នៅថ្ងៃអង្គារ។ ចំណែកប្រធានាធិបតីបារាំង លោកម៉ាក្រុង ទំនងទៅជួបលោកស៊ីជីនពីង នៅខែដើមខែមេសា។
ហ្សេ២០ធ្លាប់បានឯកភាពកាលពីឆ្នាំ ២០២០ លើក្របខ័ណ្ឌរួមដើម្បីពិនិត្យមើលឡើងវិញបំណុលរបស់ប្រទេសក្រីក្រ ប៉ុន្តែការដាក់ឱ្យដំណើរការមានភាពយឺតយ៉ាវខ្លាំង និងត្រូវបានលើកមកជជែកខ្លះដែរក្នុងជំនួបនៅប្រទេសឥណ្ឌានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ