រដ្ឋអាជ្ញារបស់ICCសន្យាស៊ើបអង្កេតលើឧក្រិដ្ឋកម្មសង្រ្គាមក្នុងជម្លោះអ៊ីស្រាអែល-ហាម៉ាស
iរដ្ឋអាជ្ញានៃតុលាការព្រហ្មទណ្ឌអន្តរជាតិ លោកការីម ខាន់សន្យាប្រឹងអស់ពីសមត្ថភាពដើម្បីស៊ើបអង្កេតលើបទឧក្រិដ្ឋកម្មសង្រ្គាមដែលអាចកើតមានឡើងនៅក្នុងជម្លោះអ៊ីស្រាអែល និងក្រុមហាម៉ាសប៉ាឡេស្ទីននៅជិត២ខែមកនេះ។ នៅឆ្នាំ ២០២១ រដ្ឋអាជ្ញានៃតុលាការព្រហ្មទណ្ឌអន្តរជាតិ(ICC) ដែលមានទីតាំងនៅទីក្រុងឡាអេ ប្រទេសហូឡង់បានប្រកាសបើកការស៊ើបអង្កេតម្តងហើយ លើបទឧក្រិដ្ឋកម្មសង្រ្គាមកើតឡើងនៅដែនដីប៉ាឡេស្ទីន ដែលអាចជាស្នាដៃរបស់អ៊ីស្រាអែល និងក្រុមហាម៉ាសដែលគ្រប់គ្រងទឹកដីហ្កាហ្សា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០៥
ក្រោយពីបញ្ចប់ទស្សនកិច្ចនៅអ៊ីស្រាអែល និងនៅរ៉ាម៉ាឡារបស់ស៊ីហ្សកដានី ដែនដីគ្រប់គ្រងដោយអាជ្ញាធរប៉ាឡេស្ទីន កាលពីថ្ងៃអាទិត្យ រដ្ឋអាជ្ញានៃតុលាការព្រហ្មទណ្ឌអន្តរជាតិ លោកការីម ខាន់បានសន្យាថា តុលាការនៅទីក្រុងឡាអេនឹងប្រឹងប្រែងអស់ពីសមត្ថភាពដើម្បីស៊ើបអង្កេតលើបទឧក្រិដ្ឋកម្មសង្រ្គាមជាយថាហេតុនៅក្នុងជម្លោះអ៊ីស្រាអែលនិងហាម៉ាសលើកនេះ។
បើតាមរដ្ឋអាជ្ញានៃតុលាការព្រហ្មទណ្ឌកម្មអន្តរជាតិ(ICC) វត្តមានរបស់លោកនៅអ៊ីស្រាអែល និងនៅដែនដីប៉ាឡេស្ទីន មិនមែននៅក្នុងក្របខ័ណ្ឌនៃការស៊ើបអង្កេតរបស់តុលាការនៅទីក្រុងឡាអេ ប៉ុន្តែ នៅក្នុងអំឡុងទស្សនកិច្ច លោកបានជួបនិយាយជាមួយជនរងគ្រោះជាច្រើននាក់ទាំងនៅអ៊ីស្រាអែល និងក្នុងទឹកដីប៉ាឡេស្ទីន។
រដ្ឋអាជ្ញាតុលាការព្រហ្មទណ្ឌអន្តរជាតិធ្វើដំណើរទៅអ៊ីស្រាអែលទៅតាមការអញ្ជើញរបស់ក្រុមជនរងគ្រោះអ៊ីស្រាអែលដោយសារការវាយឆ្មក់របស់ពួកហាម៉ាសទៅលើទីក្រុងភាគខាងត្បូងអ៊ីស្រាអែលកាលពីថ្ងៃទី៧តុលា។ បើតាមលោកការីម ខាន់ លោកបានឃើញស្លាកស្នាមនៃអំពើឃោឃៅដែលមានការរៀបចំទុកជាមុន នៅលើទីតាំងដែលពួកហាម៉ាសវាយប្រហារដ៏ហិង្សាទៅលើប្រជាជនអ៊ីស្រាអែល។ នៅពាក់កណ្តាលខែវិច្ឆិកា ប៉ូលិសអ៊ីស្រាអែលបើកការស៊ើបអង្កេតទៅលើការប្រព្រឹត្តអំពើហិង្សាផ្លូវភេទពីសំណាក់ក្រុមប្រដាប់អាវុធហាម៉ាសនៅក្នុងអំឡុងនៃការវាយប្រហារទៅលើមហោស្រពសិល្បៈនៅថ្ងៃទី៧តុលា។ បើតាមរដ្ឋអាជ្ញាតុលាការព្រហ្មទណ្ឌអន្តរជាតិ ការវាយប្រហារដ៏ហិង្សារបស់ពួកហាម៉ាសនៅទឹកដីអ៊ីស្រាអែលដែលបានសម្លាប់មនុស្សប្រមាណ១២០០នាក់ គឺជាឧក្រិដ្ឋកម្មអន្តរជាតិធ្ងន់ធ្ងរដែលតុលាការក្រុងឡាអេមានតួនាទីត្រូវជំនុំជម្រះ។ រដ្ឋអាជ្ញាតុលាការក្រុងឡាអេសង្កត់ធ្ងន់ផងដែរពីការបាត់បង់ជីវិតប្រជាជននៅភាគីប៉ាឡេស្ទីនដោយសារការវាយប្រហារសងសឹករបស់អ៊ីស្រាអែល។ តាមតួលេខពីខាងក្រុមហាម៉ាស មានមនុស្សជាង ១៥០០០នាក់ ដែលភាគច្រើនជាប្រជាជនស៊ីវិលស្លាប់ដោយសារការទម្លាក់គ្រាប់ ការបាញ់ផ្លោងរបស់ទាហានអ៊ីស្រាអែលទៅលើទឹកដីហ្កាហ្សានៅជិត២ខែមកនេះ។
នៅឆ្នាំ២០២១ តុលាការព្រហ្មទណ្ឌអន្តរជាតិធ្លាប់បានប្រកាសបើកការស៊ើបអង្កេតលើឧក្រិដ្ឋកម្មនៅដែនដីប៉ាឡេស្ទីន ដែលអាចជាស្នាដៃប្រព្រឹត្តឡើងដោយទាហានអ៊ីស្រាអែល ក្រុមហាម៉ាស និងក្រុមប្រដាប់អាវុធប៉ាឡេស្ទីនមួយចំនួនទៀត។ យោងតាមរដ្ឋអាជ្ញាតុលាការព្រហ្មទណ្ឌអន្តរជាតិ ការិយាល័យរបស់លោកអាចពង្រីកការស៊ើបអង្កេតទៅលើជម្លោះអ៊ីស្រាអែល និងក្រុមហាម៉ាសលើកនេះ។ ប៉ុន្តែ រហូតមកដល់ពេលនេះ បុគ្គលិកស៊ើបអង្កេតរបស់លោកមិនទាន់អាចចូលទៅក្នុងទឹកដីហ្កាហ្សា ឬទៅស៊ើបអង្កេតនៅអ៊ីស្រាអែល ដែលមិនមែនជារដ្ឋសមាជិករបស់(ICC) និងជារដ្ឋដែលធ្លាប់តវ៉ាប្រឆាំងការសម្រេចរបស់តុលាការក្រុងឡាអេកន្លងមក។
អ្នកជំនាញច្បាប់ដែលស្និទ្ធិនឹងតុលាការព្រហ្មទណ្ឌអន្តរជាតិបាននិយាយប្រាប់ទីភ្នាក់ងារព័ត៌មានបារាំងAFP ដោយសារជម្លោះប្រដាប់អាវុធលើកនេះ ទាំងអ៊ីស្រាអែល និងក្រុមហាម៉ាសប៉ាឡេស្ទីនអាចរងការចោទប្រកាន់ដូចគ្នានៅតុលាការព្រហ្មទណ្ឌអន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ