កងទ័ពអាមេរិក អះអាងថាបានសម្លាប់មេធំម្នាក់ របស់ក្រុមជីហាតអង្គការរដ្ឋអ៊ីស្លាមនៅស៊ីរី
មេធំម្នាក់របស់ក្រុមជីហាតអង្គការរដ្ឋអ៊ីស្លាម ដែលសំងំលាក់ខ្លួននៅភាគឦសានស៊ីរី ត្រូវបានសម្លាប់ដោយប្រតិបត្តិការវាយប្រហារតាមយានដ្រូន របស់កងទ័ពអាមេរិក។ ផ្អែកតាមលិខិតប្រកាស របស់អគ្គបញ្ជាការដ្ឋានកងទ័ពអាមេរិក ប្រចាំនៅតំបន់ដើមបូព៌ា Centcom មេក្រុមជីហាតរូបនេះ គឺជាអ្នកចាត់ចែងបញ្ជា រៀបចំសកម្មភាពវាយប្រហារភេរវកម្ម ជាច្រើនដង នៅអឺរ៉ុប ក្នុងអំឡុងពេលដែលក្រុមជីហាតអង្គការរដ្ឋអ៊ីស្លាម កំពុងមានឥទ្ធិពលខ្លាំង។
ចុះផ្សាយនៅថ្ងៃ៖
ស្តាប់ - ០២:៤២
មេក្រុមជីហាតអង្គការរដ្ឋអ៊ីស្លាមម្នាក់ ឈ្មោះ Khaled Aydd Ahmad al-Jabouri ត្រូវបានសម្លាប់ ដោយប្រតិបត្តិវាយប្រហាររបស់កងទ័ពអាមេរិក នៅភាគឦសានស៊ីរី នៅថ្ងៃអង្គារទី៤មេសា។ កងទ័ពអាមេរិកអះអាងថា នៅក្នុងប្រតិបត្តិការសម្លាប់នេះ គឺពុំជនស៊ីវីលណាម្នាក់រងគ្រោះទេ។
Khaled Aydd Ahmad al-Jabouri ត្រូវគេស្គាល់ថា គឺជាមេក្លោងធំម្នាក់ របស់ក្រុមជីហាតអង្គការរដ្ឋអ៊ីស្លាម។ ជននេះមានតួនាទីរៀបចំផែនការ និងចាត់ចែងសកម្មភាពវាយប្រហារភេរវកម្មនៅអឺរ៉ុប។ ជាក់ស្តែង អំពើភេរវកម្មនៅទីក្រុងប៉ារីស ខែវិច្ឆិកា ឆ្នាំ២០១៥ ផ្តាច់ជីវិតមនុស្ស១៣០នាក់ ភេរវកម្មនៅទីក្រុងនីស ខាងត្បូងប្រទេសបារាំង ខែកក្កដាឆ្នាំ២០១៦ ស្លាប់មនុស្ស៨៦នាក់ ។ នៅឆ្នាំ២០១៦ដដែល ក្រុមជីហាតអង្គការរដ្ឋអ៊ីស្លាម បានធ្វើភេរវកម្មចំនួន៣លើកនៅទីក្រុងប្រុចសែល ស្លាប់មនុស្សជាង៣០នាក់ និងនៅខែសីហាឆ្នាំដដែល ភេរវកម្មនៅអេស្ប៉ាញ ស្លាប់មនុស្សប្រមាណ១៦នាក់ទៀត។ ភេរវកម្មទាំងអស់នេះ គឺសុទ្ធតែជាស្នាដៃរៀបចំ ចាត់ចែង របស់ Khaled Aydd Ahmad al-Jabouri។
យោងតាម អង្គការឃ្លាំមើលសិទ្ធិមនុស្សនៅស៊ីរី មេក្លោងជីហាតរូបនេះ បានចូលមកសំងំលាក់ខ្លួន នៅក្នុងខេត្ត Idlep ភាគឦសានស៊ីរី ប្រមាណជាង១០ថ្ងៃមកហើយ ដោយរស់នៅក្នុងតំបន់ដែលស្ថិតក្រោមការកាន់កាប់របស់ក្រុមជីហាត។ ប្រភពដដែលអះអាង ជននេះត្រូវបានសម្លាប់ ដោយយានដ្រូនបាញ់គ្រាប់ពីលើ ក្នុងពេលជននេះកំពុងដើរនិយាយទូរស័ព្ទតាមផ្លូវ។
លិខិតរបស់អគ្គបញ្ជាការដ្ឋានកងទ័ពអាមេរិកប្រចាំតំបន់ដើមបូព៌ា បានលើកឡើងថា ទោះក្រុមជីហាតអង្គការរដ្ឋអ៊ីស្លាម បានបាត់បងដែនដីគ្រប់គ្រង ចាប់ពីឆ្នាំ២០១៩ពិតមែន តែក្រុមនេះនៅតែអាចជាការគំរាមមួយ ដែលមិនអាចប្រហែសបាន។ ក្រុមជីហាតនេះ នៅតែអាចមានសមត្ថភាពបើកប្រតិបត្តិការវាយប្រហារភេរវកម្ម នៅក្នុងតំបន់ដើមបូព៌ា និងអាចទៅឆ្ងាយលើសពីនេះផង។
គួរបញ្ជាក់ដែរថា កងទ័ពអាមេរិក បន្តមានវត្តមាននៅភាគខាងជើងស៊ីរី ដោយសហការជាមួយកងកម្លាំងប្រជាធិបតេយ្យស៊ីរី និងក្រុមកួក ដើម្បីតាមដាន និងវាយប្រហារសំឡេសមេក្លោងរបស់ក្រុមនេះម្តងមួយៗ។ ខែតុលាឆ្នាំ២០១៩ មេក្លោងធំបង្អស់របស់ក្រុមជីហាតខ្មៅងងិតនេះ ឈ្មោះ Abou Bakr al-Baghdadi ត្រូវបានកងទ័ពអាមេរិកសម្លាប់បាននៅភាគឦសានស៊ីរី។ ឆ្នាំ២០២២ មេក្រុមជីហាត២នាក់ទៀតត្រូវបានសម្លាប់ ហើយកាលពីខែកុម្ភៈកន្លងទៅនេះ កងទ័ពអាមេរិកបានបើកប្រតិបត្តិការសម្លាប់មេក្លោងជីហាតម្នាក់ទៀត នៅតំបន់ឦសានស៊ីរីដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ