ក្រុមហ៊ុនប្រេងអារ៉ាប៊ីសាអូឌីតចំណេញកប់ពពក នៅឆ្នាំ ២០២២
ក្រុមហ៊ុនប្រេងរដ្ឋអារ៉ាប៊ី សាអូឌីត Saudi Aramco បានប្រកាសប្រាក់ចំណេញកប់ពពក នៅឆ្នាំ ២០២២។ នៅក្នុងរបាយការណ៍របស់ក្រុមហ៊ុនចេញផ្សាយនៅថ្ងៃអាទិត្យនេះ ក្នុងរយៈពេល ១ឆ្នាំ មុន ក្រុមហ៊ុនប្រេងធំបំផុតរបស់អារ៉ាប៊ីសាអូឌីតរកបានប្រាក់ចំណេញ ប្រមាណ ១៦១ពាន់លានដុល្លារ ពោលគឺកើនឡើងជាង ៤៦% បើធៀបនឹងឆ្នាំ២០២១។ ក្រុមហ៊ុនប្រេងអារ៉ាប៊ីសាអូឌីតរកបានប្រាក់ចំណេញក្រាសក្រែល ដោយមកពីតម្លៃប្រេងឡើងថ្លៃ និងតម្រូវការប្រេងកើនឡើង នៅក្រោយ រុស្ស៊ីចាប់ធ្វើសង្រ្គាមឈ្លានពានអ៊ុយក្រែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣០
នៅក្នុងប្រទេសនាំចេញប្រេង ធំជាងគេ នៅក្នុងពិភពលោក ក្រុមហ៊ុនប្រេងរដ្ឋអារ៉ាប៊ី សាអូឌីត Saudi Aramcoរកបានប្រាក់ចំណេញសុទ្ធចំនួន ១៦១,០៧ពាន់លានដុល្លារនៅឆ្នាំ មុន។ ធៀបនឹងឆ្នាំ២០២១ ប្រាក់ចំណេញរបស់ក្រុមហ៊ុនប្រេង Saudi Aramco បានកើនឡើង៤៦%។
នៅក្នុងសេចក្តីប្រកាសចេញផ្សាយ នៅថ្ងៃអាទិត្យ ក្រុមហ៊ុនប្រេងអារ៉ាប៊ីសាអូឌីត បានលើកឡើងពីប្រាក់ចំណេញដ៏ខ្ពស់បំផុតដែលក្រុមហ៊ុនជួបប្រទះ ពោលគឺទ្វេដង ប្រៀបធៀបនឹងរយៈពេលដូចគ្នា នៅឆ្នាំ ២០១៩ នៅមុនសម័យកូវីដ (៨៨,២ពាន់លានដុល្លារ)។
តម្លៃប្រេងកើនឡើងខ្ពស់ នៅក្រោយរុស្ស៊ីធ្វើសង្រ្គាមឈ្លានពានអ៊ុយក្រែន បូកផ្សំ នឹងយុទ្ធសាស្រ្តរបស់អារ៉ាប៊ីសាអូឌីត ដែលបង្កើនបរិមាណប្រេងលក់ នៅទីផ្សារអន្តរជាតិ ជាហេតុផលសំខាន់ ធ្វើឲ្យក្រុមហ៊ុនប្រេងរដ្ឋអារ៉ាប៊ី សាអូឌីតរកបានប្រាក់ចំណេញកប់ពពក នៅឆ្នាំ២០២២។
នៅក្រោយវិបត្តិកូវីដ និងដោយសារសង្រ្គាមរុស្ស៊ី ឈ្លានពានអ៊ុយក្រែន តម្រូវការប្រេងហក់កើនឡើងខ្ពស់ នៅទូទាំងពិភពលោក។ វាជាឱកាសដែលធ្វើឲ្យក្រុមហ៊ុនប្រេងធំៗ រកបានប្រាក់ចំណេញកប់ពពក នៅឆ្នាំ ២០២២។ ជាក់ស្តែង ក្រុមហ៊ុនប្រេងបារាំង អង់គ្លេស និងអាមេរិក ចំនួន ៥ ដូចជា Shell BP Chevron ExxonMobil TotalEnergiesទទួលប្រាក់ចំណេញសរុប ១៥០ពាន់លានដុល្លារ ឬ អាចដល់២០០ពាន់លានដុល្លារផង បើសិន គ្មានការដាក់ទណ្ឌកម្មឲ្យឈប់ទិញប្រេង ពីរុស្ស៊ី។
ប្រាក់ចំណេញរបស់ក្រុមហ៊ុនប្រេងនឹងបន្តមានច្រើនតទៅទៀត នៅ ឆ្នាំ២០២៣ ជាមួយ តម្លៃប្រេង នៅតែឡើងថ្លៃ បន្ទាប់ពីក្រុមប្រទេសផលិតប្រេង OPEC និងCartel ដែលមានអារ៉ាប៊ី សាអូឌីត និងរុស្ស៊ី ជាសហប្រធានសម្រេចកាត់បន្ថយការផលិតប្រេង នៅខែ តុលាកន្លងទៅ។ វ៉ាស៊ីនតោនធ្លាប់បានរិះគន់ខ្លាំងៗការសម្រេចចិត្តរបស់ក្រុមប្រទេសOPEC ដែលនឹងធ្វើឲ្យតម្លៃប្រេងឡើងថ្លៃខ្ពស់ ឧបសគ្គសម្រាប់ប្រទេសកំពុងអភិវឌ្ឍ។
នៅអារ៉ាប៊ីសាអូឌីត ប្រាក់ចំណេញខ្ពស់របស់ក្រុមហ៊ុនប្រេងរដ្ឋក៏ជាកត្តាជំរុញ សេដ្ឋកិច្ចរបស់ប្រទេសមហាសេដ្ឋីប្រេង ដែលមានកំណើនសេដ្ឋកិច្ច ៨,៧%ដែលជាកំណើនសេដ្ឋកិច្ចខ្ពស់ជាងគេបំផុត នៅក្នុងចំណោមប្រទេសមានសេដ្ឋកិច្ចលូតលាស់ខ្លាំង ហ្សេ ២០ ដែលនៅក្នុងនោះ មានអាមេរិក អង់គ្លេស បារាំង អាល្លឺម៉ង់ ឬចិនជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ