ភ្នាក់ងារថាមពលអន្តរជាតិ៖ ពិភពលោកនៅតែបញ្ចេញឧស្ម័នកាបូនិកក្រាស់ក្រែល ប៉ុន្តែ តិចជាងការព្យាករ
ការបញ្ចេញឧស្ម័នកាបូនិក នៅក្នុងវិស័យថាមពល នៅក្នុងពិភពលោកបានបន្តកើនឡើង នៅឆ្នាំ ២០២២។ របាយការណ៍របស់ទីភ្នាក់ងារថាមពលអន្តរជាតិ IEA ចុះផ្សាយ កាលពីថ្ងៃព្រហស្បតិ៍ បង្ហាញថា នៅឆ្នាំ ២០២២ ការបញ្ចេញឧស្ម័នកាបូនិក ក្នុងវិស័យថាមពលបានកើនឡើង ០,៩%។ យ៉ាងណាវាជាតួលេខទាប បើប្រៀបធៀបនឹងឆ្នាំ ២០២១ នៅពេលការបញ្ចេញឧស្ម័នកាបូនិកបានហក់កើនឡើងដល់៦% ដោយសារការចាប់ផ្តើមសេដ្ឋកិច្ច ក្រោយសម័យកូវីដ។ តាមទីភ្នាក់ងារថាមពលអន្តរជាតិ វិស័យថាមពលបញ្ចេញឧស្ម័នកាបូនិកតិចជាងការប៉ាន់ប្រមាណ ដោយមកពីការកើនឡើងនៃការប្រើប្រាស់ថាមពលស្អាតស្អំ ថាមពលកកើតឡើងវិញ ដូចជាថាមពលបានមកពី ផ្ទាំងសូឡា និងកង្ហារខ្យល់ ជាដើម។
ចុះផ្សាយនៅថ្ងៃ៖
ការបញ្ចេញឧស្ម័នកាបូនិក នៅក្នុងវិស័យថាមពលតំណាងឲ្យ៣ភាគ ៤នៃឧស្ម័នផ្ទះកញ្ចក់ ប្រភពនៃការឡើងកំដៅផែនដី និងការប្រែប្រួលអាកាសធាតុ។ នៅក្នុងរបាយការណ៍វិភាគរបស់អង្គការថាមពលអន្តរជាតិ ការបញ្ចេញឧស្ម័នកាបូនិកនៅក្នុងពិភពលោក នៅតែបន្តកើនឡើង គួរឲ្យព្រួយបារម្ភ នៅឆ្នាំ ២០២២។ ការជាប់គាំង មិនដំណើរការរបស់រោងចក្រអគ្គិសនីដើរដោយថាមពលនុយក្លេអ៊ែរ និងការត្រលប់ទៅប្រើប្រាស់កាន់តែច្រើន ថាមពលធ្យូងថ្ម សម្រាប់តម្រូវការអគ្គិសនី នារដូវរងា បណ្តាលឲ្យការបញ្ចេញឧស្ម័នកាបូនិក នៅក្នុងពិភពលោកកើនឡើង ០,៩%។ តាមទីភ្នាក់ងារថាមពលអន្តរជាតិ នៅក្នុងពិភពលោក វិស័យថាមពលជាប្រភពបញ្ចេញឧស្ម័នប្រមាណ ៣៦,៨ពាន់លានតោន នៅឆ្នាំ ២០២២។
អ្នកជំនាញធ្លាប់បារម្ភថា តម្រូវការថាមពលកើនឡើង សម្រាប់សកម្មភាពសេដ្ឋកិច្ចក្រោយសម័យកូវីដ និងការត្រលប់ទៅប្រើប្រាស់ថាមពលធ្យូងថ្ម ដើម្បី ផលិតអគ្គិសនី ក្នុងកាលៈទេសៈសង្រ្គាមអ៊ុយក្រែន នឹងអាចធ្វើឲ្យការបញ្ចេញឧស្ម័នកាបូនិក ក្នុងវិស័យថាមពលហក់កើនឡើងខ្ពស់ ដូចឆ្នាំ២០២១។ ប៉ុន្តែ របាយការណ៍របស់អង្គការថាមពលអន្តរជាតិបានបង្ហាញ នៅក្នុងការពិតជាក់ស្តែង ការបញ្ចេញឧស្ម័នកាបូនិក នៅក្នុងវិស័យថាមពល បានកើនឡើង ក្នុងកម្រិតមួយ ទាបជាងការរំពឹងទុក។
តាមការពន្យល់របស់ទីភ្នាក់ងារថាមពលអន្តរជាតិ តម្រូវការថាមពល នៅក្នុងពិភពលោក នៅបន្តកើនឡើងដដែល ប៉ុន្តែ និន្នាការប្រើប្រាស់ថាមពលស្អាតស្អំ ដូចជា ដែលថាមពលបានមកពីផ្ទាំងសូឡា វាយោអគ្គិសនី បានជួយឲ្យគេជៀសវាង មិនបញ្ចេញឧស្ម័នកាបូនិក ប្រមាណ ៥៥០លានតោន នៅឆ្នាំ ២០២២។
តាំងពីអាស៊ី ដល់អឺរ៉ុប និន្នាការត្រលប់ទៅប្រើប្រាស់ធ្យូងថ្ម ដើម្បីជំនួសហ្គាសរុស្ស៊ី ឬដោយសារសារឧស្ម័នឡើងថ្លៃ បានធ្វើឲ្យការបញ្ចេញឧស្ម័នកាបូនិកពីក្នុងរោងចក្រអគ្គិសនី ដើរដោយថាមពលធ្យូងថ្មកើនឡើង ១,៦% ចំណែកប្រេងជាប្រភពបញ្ចេញឧស្ម័នកាបូនិក២,៥%។
ដោយមិនរាប់បញ្ចូលចិន អាស៊ីជាទូទៅបានបញ្ចេញឧស្ម័នកាបូនិក បន្ថែម ៤,២% ដោយសារសកម្មភាព កំណើនសេដ្ឋកិច្ច ក្រោយកូវីដ។ នៅអាមេរិក ការបញ្ចេញឧស្ម័នកាបូនិកនៅក្នុងវិស័យថាមពលកើនឡើង ដោយសារតម្រូវការភ្លើងអគ្គិសនី ក្នុងរដូវរងា។ មានតែអឺរ៉ុបដែលធ្វើគំរូគេ ព្រោះការបញ្ចេញឧស្ម័នកាបូនិក នៅអឺរ៉ុបធ្លាក់ចុះ អស់ ២% បន្ទាប់ពី អឺរ៉ុបបង្កើនប្រើប្រាស់ថាមពលស្អាតស្អំ ដែលបានមកពីផ្ទាំងសូឡា កង្ហារខ្យល់ សម្រាប់ផលិតអគ្គិសនី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ