លោកម៉ាក្រុង ធ្វើដំណើរទៅ ម៉ូស៊ូល និងតំបន់គួកឌីស្ថានអ៊ីរ៉ាក់ ជាលើកទី១
បន្ទាប់ពីបានបើកសន្និសីទនៅទីក្រុងបាកដាត ជាមួយក្រុមប្រទេសតំបន់ដើមបូព៌ា លោកអេម៉ានុយអែល ម៉ាក្រុង បានបន្តដំណើរនៅថ្ងៃអាទិត្យនេះ ទៅកាន់ទីក្រុងម៉ូស៊ូល និងតំបន់គួកឌីស្ថានអ៊ីរ៉ាក់។ ម៉ូស៊ូលធ្លាប់ជាមូលដ្ឋានធំរបស់ក្រុមជីហាតអង្គការរដ្ឋអ៊ីស្លាម ហើយតំបន់គួកឌីស្ថានវិញ គឺជាតំបន់ស្វយ័តអ៊ីរ៉ាក់ ដែលបានដើរតួនាទីយ៉ាងសំខាន់បំផុត ក្នុងការប្រយុទ្ធយកឈ្នះ ក្រុមជីហាតអង្គការរដ្ឋអ៊ីស្លាម។
ចុះផ្សាយនៅថ្ងៃ៖
ស្តាប់ - ០២:២២
លោកម៉ាក្រុង បានធ្វើដំណើរជាលើកទីមួយ ទៅកាន់ទីក្រុងម៉ូស៊ូល អតីតដែនជំរកធំ របស់ក្រុមជីហាតអង្គការរដ្ឋអ៊ីស្លាម។ នេះគឺជាដំណើរជានិម្មិតរូប ដើម្បីបញ្ជាក់ពីការប្រឹងប្រែង និងការសន្យារបស់បារាំង ក្នុងការបន្តប្រយុទ្ធប្រឆាំងនឹងក្រុមចលនាភេរវកម្ម ដ៏ខ្មៅងងឹតនេះ។ លោកម៉ាក្រុង បានអះអាងប្រាប់ទៅភាគីអ៊ីរ៉ាក់ថា « មិនថាអាមេរិកសម្រេចចិត្តយ៉ាងណាទៅថ្ងៃមុខទេ តែសម្រាប់បារាំង គឺបារាំងនឹងបន្តជួយអ៊ីរ៉ាក់ នៅក្នុងប្រតិបត្តិការ បោសសំអាតក្រុមជីហាតអង្គការរដ្ឋអ៊ីស្លាម ព្រោះថាបារាំងមានសមត្ថភាពបច្ចេកទេស និងប្រតិបត្តិការ»។
នៅម៉ូស៊ូល លោកម៉ាក្រុងបានចុះទៅពិនិត្យដល់ទីតាំង សម្បតិ្តបេតិកភណ្ឌជាច្រើនកន្លែង ដែលអង្គការយូណេស្កូ កំពុងមានគម្រោងជួសជុល និងសាងសង់ឡើងវិញឲ្យដូចដើម។ ក្នុងនោះមានដូចជា វិហារអ៊ីស្លាមស៊ូនីត Al-Nouri ព្រមទាំងវិហារកាតូលិក Notre-Dame de l’Heure ដែលសុទ្ធតែជាសម្បតិ្តបេតិកភណ្ឌ ចំណាស់រាប់រយឆ្នាំ ហើយដែលត្រូវបានក្រុមជីហាតអង្គការរដ្ឋអ៊ីស្លាម វាយកម្ទេច។
អង្គការ យូណេស្កូ មានគម្រោងសាងសង់សម្បត្តិបេតិកភណ្ឌទាំងនេះឡើងវិញ ដោយចំណាយប្រាក់ប្រមាណ៥០លានដុល្លារ ឧបត្ថម្ភដោយអេមៀរ៉ាត់អារ៉ាប់រួម។ គំរោង « ធ្វើឲ្យម៉ូស៊ូលរស់ឡើងវិញ » នេះ នឹងសាងសង់ឡើងវិញផងដែរ នូវផ្ទះបុរាណ រចនាបទអូតូម៉ង់ ក្រោមការឧបត្ថម្ភរបស់សហភាពអឺរ៉ុប ក្នុងទឹកប្រាក់ប្រមាណ៤០លានអឺរ៉ូ។
ដោយឡែក បារាំងនឹងឧបត្ថម្ភដល់ការសាងសង់ សាលារៀនភាសាបារាំងបែបសាសនាគ្រឹស្ត នៅក្នុងតំបន់នេះ។ លោកម៉ាក្រុងបានបញ្ជាក់ថា បារាំងនឹងប្រឹងប្រែងគាំទ្រ ជួយសហគមន៍អ្នកកាន់សាសនាគ្រឹស្តនៅតំបន់ក្រុងម៉ូស៊ូល។ លោកបន្ថែមថា « អ៊ីរ៉ាក់នឹងគ្មានលំនឹង គ្មានតុល្យភាពទេ ប្រសិនណាបើគ្មានការគោរពសហគមន៍សាសនា និងជនជាតិភាគតិច ឲ្យបានស្មើភាពគ្នា »។
ចេញពីម៉ូស៊ូល លោកម៉ាក្រុងបានបន្តដំណើរតាមរថយន្តពាសដែក ទៅកាន់ទីក្រុងអ៊ែរប៊ីល ដែលជាទីក្រុងធំនៃតំបន់ស្វយ័តគួកឌីស្ថានអ៊ីរ៉ាក់ ដើម្បីជួបប្រជុំជាមួយលោក Netchirvan Barzani អភិបាលតំបន់ស្វយ័តនេះ។ នេះគឺជាដំណើរជានិម្មិតរូបមួយទៀត របស់ប្រធានាធិបតីបារាំង ដើម្បីតបស្នងអរគុណ ចំពោះប្រជាជនគួកអ៊ីរ៉ាក់ ដែលបានដើរតួនាទីយ៉ាងសកម្ម នៅសមរភូមិជួរមុខ ក្នុងការប្រយុទ្ធ ជាមួយក្រុមជីហាតអង្គការរដ្ឋអ៊ីស្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ