សង្គមស៊ីវិល៖ អាជ្ញាធរកាយដីពលរដ្ឋធ្វើប្រឡាយរំដោះទឹក ខណៈក្រុមហ៊ុនឯកជនចាក់ដីលុបបឹង
នៅព្រឹកថ្ងៃទី២៧កុម្ភៈនេះ មានផ្ទុះហេតុការណ៍ប្រតាយប្រតប់គ្នារវាងកងកម្លាំងសន្តិសុខខណ្ឌព្រែកព្នៅ និងសហគមន៍សំរោងខាងត្បូងដែលនៅជាប់បឹងតាមោក។ ហេតុការណ៍នេះបានកើតឡើង បន្ទាប់ពីមានពលរដ្ឋមួយចំនួនរស់នៅក្នុងសហគមន៍សំរោងខាងត្បូងបានចុះទៅហាមឃាត់អេស្កាវ៉ាទ័រឲ្យបញ្ឈប់សកម្មភាពកាយដីរបស់ពលរដ្ឋដើម្បីធ្វើប្រឡាយទឹក។ រឿងរ៉ាវមួយនេះត្រូវបានសង្គមស៊ីវិលបញ្ចេញប្រតិកម្មអស់សំណើចដោយលើកឡើងថា បន្ទាប់ពីក្រុមហ៊ុនឯកជនចាក់ដីលុបបឹង អាជ្ញាធរបែរជាផ្ដើមកាយដីដែលកំពុងមានវិវាទជាមួយពលរដ្ឋដើម្បីធ្វើប្រឡាយរំដោះទឹកទៅវិញ។
ចុះផ្សាយនៅថ្ងៃ៖
ស្តាប់ - ០២:៣៨
ទោះបីមានផ្ទុះហេតុការណ៍ប្រតាយប្រតប់ក៏សកម្មភាពកាយដីធ្វើជាប្រឡាយរំដោះទឹកមិនបានផ្អាកដែរ។ ហេតុការណ៍ប្រតាយប្រតប់នេះបានធ្វើឲ្យស្ត្រីម្នាក់សន្លប់បាត់ស្មារតី និងការស្រែកយំរបស់ពលរដ្ឋផ្សេងទៀតដើម្បីទាមទាររកអ្នកទទួលខុសត្រូវលើទង្វើនេះ។ លោក ស៊ាង មួយឡៃ ប្រធានកម្មវិធីសិទ្ធិរស់នៅក្នុងទីក្រុងនៃសមាគមធាងត្នោតបានប្រាប់ពីសាវតានៃរឿងនេះថា នៅពេលដែលក្រុមហ៊ុនឯកជនលុបផ្ទៃបឹងតាមោកជិតអស់ក៏ធ្វើឲ្យគ្មានផ្លូវទឹក អាជ្ញាធរបានចាប់ផ្ដើមកាយប្រឡាយទឹកលើដីសហគមន៍ដែលកំពុងមានទំនាស់។ នេះហើយជាដើមចមនៃការផ្ទុះសកម្មភាពតវ៉ាប្រឆាំងនៅព្រឹកថ្ងៃទី២៧ ខែកុម្ភៈនេះ។
ការលើកឡើងរបស់លោកស៊ាង មួយឡៃនេះ នៅមិនទាន់មានការឆ្លើយតបជាថ្មីយ៉ាងណាពីអាជ្ញាធរពាក់ព័ន្ធ ឬសាលារាជធានីភ្នំពេញនៅឡើយទេ។ គួរបញ្ជាក់ថា ទីតាំងដីដែលកាយធ្វើជាប្រឡាយស្ថិតនៅខាងកើតបឹងតាមោក និងស្ថិតពីក្រោយសហគមន៍សំរោងខាងត្បូងខណ្ឌព្រែកព្នៅ រាជធានីភ្នំពេញ។ តាមលោក ស៊ាង មួយឡៃ ទីតាំងដីនេះមិនស្ថិតនៅក្នុងប្លង់គោលប្រើប្រាស់ដីក្នុងរាជធានីភ្នំពេញឡើយ។ ប្រធានកម្មវិធីសិទ្ធិរស់នៅក្នុងទីក្រុងនៃសមាគមធាងត្នោតដដែលបានបញ្ជាក់ថា សហគមន៍សំរោងត្បូងមានព្រំប្រទល់ជាប់បឹងតាមោក ហើយប្រជាពលរដ្ឋបានទៅរស់នៅទីនោះតាំងពីឆ្នាំ ១៩៩៦ ដោយមានផ្ទះចំនួន ៧៦ខ្នង។
ដូច្នេះសម្រាប់លោកស៊ាង មួយឡៃ ប្រជាពលរដ្ឋមិនបានរស់នៅលើដីបឹងទេ តែបែរជាតម្រូវឲ្យប្រជាពលរដ្ឋរុះរើលំនៅដ្ឋានចេញទៅវិញ។ ទោះយ៉ាងណា លោក ស៊ាង មួយឡៃមើលឃើញថា មួយរយៈចុងក្រោយនេះ អាជ្ញាធរបានប្តូរពីចោទពលរដ្ឋរស់នៅលើដីបឹងទៅជាការចោទរស់នៅលើដីចំណីផ្លូវរបស់រដ្ឋវិញម្ដង។ តែលោកមួយឡៃ មិនភ្លេចបញ្ជាក់ថា បើពលរដ្ឋសហគមន៍សំរោងខាងត្បូងពិតជារស់នៅកៀកចំណីផ្លូវមែន ពួកគេអាចបង្ខិតផ្ទះមកក្រោយបន្តិចក៏បាន ប្រសិនបើអាជ្ញាធរចង់ពង្រីកទំហំផ្លូវបន្ថែមមែន។
គួរបញ្ជាក់ថា រឿងរ៉ាវដដែលមួយនេះធ្លាប់ត្រូវបានអ្នកនាំពាក្យសាលារាជធានីភ្នំពេញ លោកម៉េត មាសភក្ដី បញ្ជាក់ប្រាប់វិទ្យុបារាំងអន្តរជាតិថា ពលរដ្ឋរស់នៅសហគមន៍សំរោងកំពុងរស់នៅលើសំណង់មិនរៀបរយទើបអាជ្ញាធររកទីតាំងថ្មីដើម្បីឲ្យពួកគាត់រស់នៅសមរម្យ។ តាមលោក ម៉េត មាសភក្ដី ទីតាំងថ្មីនោះនៅមិនឆ្ងាយប៉ុន្មានពីទីតាំងចាស់ ពោលស្ថិតនៅបណ្ដោយផ្លូវ១៥១ដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ